වසරකට පියයුරු පිළිකා රෝගීන් තුන් දහස් පන්සීයක් හඳුනා ගැනෙන ශ්‍රී ලංකාවේ එම රෝගයෙන් වසරකට අවම වශයෙන් හත්සිය දෙනකු මිය යන බව අනාවරණය වී තිබේ.
රජය පවසන පරිදි දිනකට හඳුනාගන්නා පියයුරු පිළිකා රෝගීන් ගණන දහයක් වන අතර දිනකට දෙදෙනෙක් මියයති.
කාන්තාවන් අතර බහුලම පිළිකාව පියයුරු පිළිකාව වන අතර පිරිමින්ටද මෙම පිළිකාව සෑදීමේ ප්‍රවනතාවයක් පවතී.
නමුත් පිරිමින්ට සාපේක්ෂව කාන්තාවන්ට පියයුරු පිළිකා සෑදීමේ හැකියාව සිය ගුණයකින් වැඩි බව රජයේ ප්‍රවෘත්ති දෙපාර්තමේන්තුව පවසයි.
කාන්තාවන්ට සෑදෙන පිළිකා අතර පියයුරු පිළිකා 26%ක ප්‍රතිශතයක් ගනි.
ඔක්තෝබර් මාසය රෝස පැහැති මාසය වශයෙන් සලකමින් පියයුරු පිළිකා පිළිබද දැනුවත්කිරීම සදහා විශේෂයෙන් නම්කර ඇති බව රජයේ ප්‍රවෘත්ති දෙපාර්තමේන්තුව පවසයි.
අවුරුදු 20 සිට පියයුරු පරීක්ෂාව
පියයුරු පිළිකා පිළිබද දැනුවත් කිරීමේ මාසයේදී ඒ පිළිබදව සමාජය දැනුවත් කිරීමේ අරමුණෙන් ඔක්තෝබර් මස මුලදී සෞඛ්‍ය ප්‍රවර්ධන කාර්යාංශයේදී “කලින් හදුනාගමු ජීවිතය සුරකිමු” මැයෙන් පැවැති ප්‍රවෘත්ති සාකච්ඡාවකදී අනාවරණය කර ඇත්තේ කාන්තාවන්ට තරුණ වයසේදීම පියයුරු පිළිකා සෑදීමේ අවදානමක් පවතින බවයි.
“සාමාන්‍යයෙන් සෑම කාන්තාවක්ම වයස අවුරුදු 20 සිට පියයුරු පිළිකා පිළිබදව දැනුවත් විය යුතු වනවා මෙන්ම ස්වයං පියයුරු පරීක්ෂාවන්ද සිදුකරගැනීම වැදගත්. කල් ඇතුව හදුනාගැනීම තුළින් කාන්තාවන් දසදහසකට වැඩි පිරිසක් සුවය ලබා සමාජගතවී සිටිනවා.”විශේෂඥ වෛද්‍යවරුන් එහිදී පෙන්වා දී තිබේ.
එම මාධ්‍ය හමුවේදී අනාවරණය කර ඇති තොරතුරු අනුව ලංකාව තුළ පියයුරු පිළිකාවලින් 59%ක් පළමු සහ දෙවන අදියර වලදී හඳුනා ගැනෙයි.
එම අවස්ථා වල හඳුනා ගැනීමෙන් අතුරු ආබාධ හටගැනීමකින් තොරව ප්‍රතිකාර මගින් එම තත්ත්වය වළක්වා ගත හැකි බව රජයේ ප්‍රවෘත්ති දෙපාර්තමේන්තුව පවසයි.
මෙම ප්‍රවෘත්ති සාකච්ඡාවේදී, ප්‍රජා වෛද්‍ය විශේෂඥ ෂෙරීන් බාලසූරිය , ජාතික පිළිකා මර්දන ඒකකයේ අධ්‍යක්ෂ විශේෂඥ වෛද්‍ය ජානකී විදානපතිරණ, ජාතික පිළිකා මර්දන වැඩසටහනේ ප්‍රජා වෛද්‍ය විශේෂඥ නයනාද අල්විස් , ශ්‍රී ලංකා පිළිකා රෝග විශේෂඥ වෛද්‍යවරුන්ගේ සංගමයේ වෛද්‍ය ජාලිය ජයසේකර, ඉන්දිරා පිළිකා භාරයේ සභාපතිනී වෛද්‍ය ලංකා ජයසූරිය දිසානායක , දුම්කොළ සහ මධ්‍යසාර පිළිබද ජාතික අධිකාරියේ සභාපති වෛද්‍ය සමාධි රාජපක්ෂ යන වෛද්‍යවරුන් අදහස් දක්වා තිබේ.
Facebook Comments
