ජාතික ප්‍රශ්නයට විසඳුමක් ලෙස පාර්ලිමේන්තුව නියෝජනය කරන සියලු පක්ෂ වල එකතුවෙන් ඉදිරි සතියේදී බලය බෙදීම පිලිබඳ යෝජනා මාලාවක් ඉදිරිපත් කරන බවට සභානායකවරයා ප්‍රකාශ කර තිබේ.
බලය බෙදීම සම්බන්ධව පාර්ලිමේන්තුවේ සියලු පක්ෂ එකඟතාවයකට පැමිණ ඇති බව 02 සෙනසුරාදා ගලගෙදර පැවති උත්සවයක දී ලක්ෂ්මන් කිරිඇල්ල අමාත්‍යවරයා කියා සිටියේය.
“පාර්ලිමේන්තුව ගරු අග්‍රාමාත්‍යතුමාගේ මෙහෙයුම් කමිටුව තුල විද්‍යාමාන වුනා බලය බෙදීම සම්බන්ධව පාර්ලිමේන්තුවේ පක්ෂ අතර කිසිම අර්බුදයක් නැහැ.” යි අමාත්‍යවරයා සඳහන් කළේය.
මේ අතර පසුගියදා ජනපති හා අගමැතිවරයාගේ ප්‍රධානත්වයෙන් පාර්ලිමේන්තුව නියෝජන කරන පක්ෂ වල නියෝජිතයින් යෝජිත නව ව්‍යවස්ථාව සම්බන්ධව සාකච්ඡාවක් පවත්වන ලදී.
එම හමුවෙන් අනතුරුව මාධ්‍ය වෙත අදහස් දක්වමින් දෙමළ ජාතික සන්ධාන මන්ත්‍රී එම්.එ. සුමන්තිරන් කියා සිටියේ බලය බෙදීම පිළිබඳව මතභේදයක් නොමැති බවට සියලු දෙනා පිළිගත් බවයි.
දෙමළ ජාතික සන්ධාන නායක ආර්.සම්බන්ධ එම හමුවේදී මේ වසර අවසන් වීමට ප්‍රථම ජාතික ගැටලුව විසඳුමක් ඉල්ලා සිටි බවත් ඒ අනුව පළාත් සභා ශක්තිමත් කිරීම සමබන්ධ ඉදිරියේදී සාකච්ඡා කිරීමට එයට පැමිණ සිටි සියලු පක්ෂ නියෝජිතයින් එකඟ වු බව සුමන්තිරන් මන්ත්‍රීවරයා වැඩි දුරටත් කියා සිටියේය.
Facebook Comments
