සුදු නෙළුම් ව්‍යාපාරයේ මුලධර්මයන් පිළිගනිමින් ජාතික ප්‍රශ්නය විසඳීම වෙනුවෙන් කැප වී කටයුතු කල බවට හිටපු ජනාධිපතිනී මංගල සමරවීර අමාත්‍යවරයා පැසසීමට ලක් කර තිබේ.
මංගල සමරවීරගේ ධෛර්ය නොමැති නම් සුදු නෙළුම් ව්‍යපාරය අසර්ථක වන බවට 28 බ්‍රහස්පතින්දා ‘ඛේමාගේ කොලුවා’ තේමාව යටතේ මංගල සමරවීර දේශපාලන දිවියට දශක තුනක් පිරීම නිමිත්තෙන් පැවති උත්සවයේදී චන්ද්‍රිකා බණ්ඩාරනායක කුමාරතුංග කියා සිටියාය.
“සුදු නෙළුම් ව්‍යාපාරය සාර්ථක වෙන්නේ නැහැ මංගලගේ ධෛර්යය නැතිනම්. නමුත් මංගල ආඩම්බර වෙන්න ඕන ඒ මූලධර්මය පිළිගනිමින් ජාතික ප්‍රශ්නය වෙනුවෙන් කැපවීම පිළිබඳ. බොහෝ අය මේ ගමනින් ඉවත්වුණා. මංගල ඒ සිහිනය වෙනුවෙන් සටන් කළා.” සංහිඳියා කාර්යංශයේ සභාපතිනිය සඳහන් කළාය.
තම හොඳ කාලයේත් නරක කාලයේත් මංගල සමරවීර හොඳ මිතුරෙක් වු බව කී හිටපු ජනපතිනිය ඔහු කැබිනට් මණ්ඩලය තුල විශාල කාර්යභාරයක් ඉටු කල බව ද සිහිපත් කළේය.
වඳවී යන දේශපාලඥයන්
මංගල සමරවීර වැනි අභීත නිර්භීත නායකයන් අද දේශපාලන ක්ෂේත්‍රයේ සොයාගැනීමට අපහසු බවත්, ඕනෑම අභියෝගයකට ඔහු නිර්භයව මුහුණ දුන් බව ද හිටපු ජනපතිනී පැවසුවාය.
“බොහෝ රජයන්හි මංගලට පැවරුණු කාර්යය හොඳින් කරගෙන ගොස් තිබෙනවා.” යි ඇය සඳහන් කළාය.
නිර්භීතව කටයුතු කරමින් දැඩි අභියෝගවලට මුහුණ දීමේ හැකියාව ඇති මංගල සමරවීර ඉතාම වේගයෙන් ශ්‍රී ලංකාවෙන් වඳවී යන දේශපාලන වර්ගයාට අයත් වන බව ද හිටපු ජනාධිපතිනී චන්ද්‍රිකා බණ්ඩාරනායක කුමාරතුංග වැඩි දුරටත් පෙන්වා දුනි.
Facebook Comments
