හැත්තෑ දෙවැනි රාජ්‍ය නිදහස් දින උත්සවයේදී ජාතික ගීය සිංහලෙන් පමණක් ගායනා කිරීමට විරෝධය පා සිවිල් ක්‍රියාකාරීන් පිරිසක් කොළඹදී ජාතික ගීය සිංහලෙන් හා දෙමලින් ගායනා කර තිබේ.
රාජ්‍ය නිදහස් දින උත්සවයේදී ජාතික ගීය දෙමළ භාෂාවෙන් ගායනා නොකිරීමට විරෝධය පළ කරමින් ජාතික නිදහස් දින උත්සවය වර්ජනය කළ බව ශ්‍රී ලංකාවේ විශාලතම දෙමළ දේශපාලන පක්ෂ වන දෙමළ ජාතික සන්ධානය මාධ්‍ය වෙත කියා තිබුනි.
ජනාධිපති ගෝඨාභය රාජපක්ෂගේ ප්‍රධානත්වයෙන් රාජ්‍ය ජාතික උත්සවය නිදහස් චතුරස්‍රයේ පැවැත්වෙද්දී බොරැල්ල කනත්ත වට රවුමට රැස්වු සිවිල් ක්‍රියාකාරීන් පිරිසක් ජාතික ගීය භාෂා දෙකෙන්ම ගායනා කළහ.
හමුදා සන්නද්ධ සහ උත්තමාචාර රථ පෙරටු කර ගනිමින් පැවැත්වු රාජ්‍ය ජාතික දින උත්සවයට ශ්‍රී ලංකාවේ ජනාධිපති ධුරයට පත් පළමු හමුදා නිලධාරියා වන ගෝඨාභය රාජපක්ෂ පැමිණ සිටියේ හමුදා පදක්කම් ද පැලඳ ගෙනය.
සජිත් ප්‍රේමදාසගේ ද සහභාගිත්වයෙන් පැවැත්වුනු රාජ්‍ය නිදහස් දින උත්සවය සම්බන්ධයෙන් ඔහු නායකත්වය දරන එක්සත් ජාතික පෙරමුණ දක්වා තිබුනේ පරස්පර විරෝධී අදහස්ය.
ජනාධිපතිවරයාගේ කතාව රාජපක්ෂ විරෝධි මන්ත්‍රීවරයකු ලෙස හැඳින්වෙන මංගල සමරවීරගේ ප්‍රශංසාවට ලක්ව තිබුනි.
“අද ජනාධිපතිගේ කතාව විශිෂ්ටයි. දැන් ඔහු ඔහුගේ කතාව ක්‍රියාවට නැංවිය යුතුය. ශක්තිමත් නායකයෙක් යනු ප්‍රජාතන්ත්‍රවාදී රාමුවක් තුල දුෂ්කර තීරණ ක්‍රියාත්මක කල හැකි පුද්ගලයෙකි. 48 සිට අපේ ගමන හොඳ කථා කරන නායකනයන්ගෙන් පිරී තිබේ. දැන් වැඩ කිරීමට කාලයයි,” යනුවෙන් ඔහු සිය ට්විටර් ගිණුමේ සටහන් කර තිබේ.
දේශිය හා විදේශිය පෙරටු කර ගනිමින් පැවති ශ්‍රී ලංකාවේ 72 වන නිදහස් දින උත්සවයේදී ජාතික ගීය දෙමළෙන් ගායනා නොකිරිම ගැන පසුගිය රජයේ සංහිඳියා කටයුතු පිළිබඳ හිටපු ඇමැති මනෝ ගනේෂන් දුකත් ලැජ්ජාවත් පළ කරන ට්විටර් පණිවිඩයක් නිකුත් කර තිබුනි.
“ගෝඨාභය රාජපක්ෂ මහත්තයාගේ අලුත් ආණ්ඩුව ආවට පස්සේ ආණ්ඩුව ඇතුලෙන්ම හඬක් මතු වුනා දෙමළ භාෂවෙන් ජාතික ගීය ගායනා කරන්නට දෙමළ ජනතාවට අයිතියක් නැත කියලා. ඔවුන් සිංහල භාෂාවෙන් ගායනා කරන්න ඕනේ කියනවා මේක අති විශාල විදියට දෙමළ ජනතාවගේ හඬ යටපත් කිරීමක්, අයිතිය යටපත් කිරීමක්,” යැයි දෙමළ බසින් ජාතික ගායනා කිරිමෙන් අනතුරුව මාධ්‍ය වෙත අදහස් දක්වමින් එක්සත් සමාජවාදී පක්ෂයේ නායක සිරිතුංග ජයසුරිය කියා සිටියේය.
මේ අතර නිදහස් දිනය දෙමළ ජනයාගේ කළු දිනයක් බවට පවසමින් යාපනයේ හා කිලිනොච්චියේ කළු ධජ ඔසවා විරෝධය දක්වා තිබේ.
“සිංහල ජාතියේ නිදහස් දිනය දෙමළ ජාතියට කළු දිනයක්” බව සඳහන් බැනර් හා පුවරු යාපනය විශ්ව විද්‍යාලයේ ප්‍රදර්ශනය කර තිබෙනු දැක ගත හැකි වු බව අප යාපනය වාර්තාකරුවන් සඳහන් කරයි.
කිලිනොච්චියේ හා මඩකලපුවේ අතුරුදහන් වුවන්ගේ ඥාතීන් කළු කොඩි රැගෙන විරෝධතාවයක් දක්වා ඇත.
Facebook Comments
