අධ්‍යාපන ලේකම්වරයාගේ නියෝග වලට පටහැනිව පළාත්, කලාප අධ්‍යාපන බලධාරීන් මෙන්ම විදුහල්පතිවරු ද අත්තනෝමතිකව කටයුතු කිරීම හේතුවෙන් රට පුරා පාසල් තුළ කොරෝනා වෛරසය පැතිර යාමේ අවධානමක් ගැන දිවයිනේ ප්‍රමුඛතව ගුරු වෘත්තිය සිමිතියක් බිය පළ කර තිබේ.
දානටමත් කොවිඩි 19 වෛරසයේ අවදානමට ලක්ව ඇති රාජාංගනය යාය 01 විදුහලේ විදුහල්පතිවරයා මෙන්ම ගෝනාපීනුවල සාරාලංකාර විදුහලේ විදුහල්පතිවරයා ද එම නියෝග නොතකා හැරීම නිසා අවදානමකට ලක්වු බවයි ලංකා ගුරු සංගමය චෝදනා කරන්නේ.
“කොවිඞ් 19 ආසාධිත දරුවා වාර්තා වූ රාජාංගනය යාය 01 විදුහලේ විදුහල්පතිවරයා අධ්‍යාපන ලේකම්වරයාගේ නියෝගයට පටහැනිව එම පාසලේ සියලූම ශ්‍රේණිවල දරුවන් පාසලට කැඳවා තිබූ අතර, අවශ්‍ය ගුරුවරු පමණක් කැඳවීමට නියෝග කර තිබියදී ගෝනාපීනුවල සාරාලංකාර විදුහලේ විදුහල්පතිවරයා ගුරුවරු අනවශ්‍ය ලෙස පාසලට කැඳවා තිබුණි. මේ නිසා එම පාසල්වල දරුවන් සහ ගුරුවරු බරපතල අනාරක්ෂිත තත්වයකට පත්කර ඇත.”
එම සංගමයේ ප්‍රධාන ලේකම් ජෝසප් ස්ටාලින් ගේ අත්සනින් යුතුව නිකුත් කරන ලද නිවේදනයෙන් වැඩි දුරටත් චෝදනා කරන්නේ ගම්පහ කලාපයේ නියෝජ්‍ය කලාප අධ්‍යාපන අධ්‍යක්ෂවරියක විසින් අධ්‍යාපන ලේකම්වරයාගේ නියෝග පසෙක දමා ගම්පහ කලාපයේ පාසල්වල සියලූම ගුරුවරු පාසල්වලට කැඳවීමට නියෝග කර ඔවුන් ද අනාරක්ෂිත තත්ත්වය පත් කර ඇති බවටයි.
එමෙන්ම අධ්‍යාපන අමාත්‍යාංශ ලේකම්වරයාගේ නියෝගය අනුව පාසල් නොපැමිණි ගුරුවරියකට කොළඹ කලාප අධ්‍යාපන අධ්‍යක්ෂවරයා සේවය අතහැර යාමේ නියෝගයක් ද නිකුත් කර සෙසු ගුරුවරු බියගැන්වීමට කටයුතු කර ඇති බවටයි ලංකා ගුරු සංගමය පවසන්නේ.
දිවයිනේ ප්‍රදේශ ගණනාවක අධ්‍යාපන බලධාරින් විසින් අධ්‍යාපන ලේකම්වරයාගේ නියෝග තුට්ටුවකට මායිම් නොකරමිනි ගුරුවරුන් මෙන්ම පාසල් දරුවන්ද අනාරක්ෂිත බවටත් පත් කර ඇති බවද නිවේදනය කර ඇත.
“වැලිමඩ, හම්බන්තොට, හෝමාගම, ජයවර්ධනපුර, පිළියන්දල, මාතලේ, වත්තේගම, දෙනුවර, මහියංගනය, මහනුවර ඇතුළු අධ්‍යාපන කලාප ගණනාවකට අයත් පාසල්වල සියලූම ගුරුවරු පාසල්වලට ගෙන්වීමට කලාප අධ්‍යාපන බලධාරීන්, කොට්ඨාස අධ්‍යක්ෂවරු සහ විදුහල්පතිවරු කටයුතු කර තිබුණේ රෝග ව්‍යාප්තිය පාලනය වෙනුවෙන් අධ්‍යාපන ලේකම්වරයා ලබාදී තිබූ ඉහත නියෝග තුට්ටුවකට මායිම් නොකරමිනි.”
මින් පැහැදිලි වන්නේ පාසල් පද්ධතිය අධ්‍යාපන අමාත්‍යාංශයේ පාලනයෙන් ගිලිහී ඇති බවදැයි ප්‍රශ්න කරන ලංකා ගුරු සංගමය මෙම තත්වය පිළිබඳව ක්ෂණික අවධානය යොමු කරන ලෙස මනාප පොරයේ යෙදෙන අමාත්‍ය මණ්ඩලයෙන්ද ඉල්ලා සිටී.
Facebook Comments
