සටන් කර දිනාගත් වන්නියේ භූමිය ආපසු අත්පත් කරගැනීමේ වෑයමක් (VIDEO)

0

තිස් වසරකට අධික කාලයක් පදිංචිව සිටි භුමිය තමන්ට අහිමි කිරීම සදහා රජයේ බලධාරීන් ක්‍රියාකරමින් සිටින බවට චෝදනා කරන වන්නියේ ගම්වැසියන් පිරිසක් ඒ සඳහා කෙරෙන සැලසුම් වලට විරෝධය පල කරමින් සිටිති.

මුලතිව් මැරිටයිම්පත්තු ප්‍රාදේශීය ලේකම් කොට්ඨාශයට අයත් කේපාපුලව් ග්‍රාම නිලධාරී වසමේ සුරියපුරම් ගම් වැසියන් පවසන්නේ යුද්ධයේ අවසානයෙන් පසු වාඩිලා සිටි හමුදාවෙන් මහත් වැර වෑයමින් නිදහස් කරගන්නා ලද භූමි භාගයකින් අගෝස්තු මස 12 වන දිනට පෙර ඉවත් වන ලෙස ප්‍රාදේශිය ලේකම්වරයා ලිඛිතව දන්වා ඇති බවයි.

ගම්මානයේ ඉඩම් මැනීමට සති අන්තයේ පැමිණි මිනින්දෝරු දෙපාර්තමේන්තුවේ නිලධාරීන්ට ගම්වැසියන්ගේ විරෝධය හමුවේ එම කටයුතු නතර කිරීමට සිදුව තිබේ.

නිවාස සහ වගා කටයුතු සදහා 1990 දී ඉඩම් අක්කර 50 ක් ලබා දෙමින් රජය විසින් තම ග්‍රාමය නිර්මාණය කළ බව පවසන ගම් වැසියන් පෙන්වා දෙන්නේ මේ දක්වා එම ඉඩම් සදහා බලපත්‍රයක් හෝ ඔප්පුවක් රජය විසින් ලබා දී නොමැති බවයි.

තමන් එම භුමියේ 1990 වසරේ සිට 2009 වසර දක්වා අඛණ්ඩව පදිංචිව සිටියත් යුද්ධයේ අවසන් සමයේ යුද හමුදාව විසින් අල්ලා ගන්නා ලද තම ඉඩකඩම් 2017 දී නිදහස් කරගැනීමට හැකිවූයේ විශාල අරගලයකින් පසුව බව ගම්වැසියෝ සිහිපත් කර දෙති. ඒ සඳහා දින හත්සියයක් ඉක්මවූ අඛණ්ඩ විරෝධතාවක් දියත් කරන ලද්දේ කාන්තාවන්ගේ නායකත්වයෙනි.

එනැන් සිට යළි එම භුමියේ පදිංචිව සිටින ගම් වැසියන්ගේ අයිතිය තහවුරු කිරීම සදහා ඔප්පු ප්‍රදානය කරනවා වෙනුවට ආණ්ඩුව එම ඉඩම් යළි යුද හමුදාවටම පැවරීමට උත්සාහ කරන්නේදැයි සුරියපුරම් ගම් වැසියෝ ප්‍රශ්න කරති.

මුලතිව් වාර්තාකරුවන් පවසන්නේ මැරිටයිම්පත්තු ප්‍රාදේශිය ලේකම් උමාමගල් මනිවන්නන් විසින් සුරියපුරම් ගම් වැසියන් 19 දෙනකු වෙත ලිපි යොමුකරමින් අගෝස්තු මස 12 වන දිනට පෙර එම භුමියෙන් ඉවත් වන ලෙස දැනුම් දී ඇති බවයි.

ජනතාවට අයිතියක් නොමැති රජයේ භුමියක රැඳී සිටින බැවින් එම ස්ථානයෙන් ඉවත් වන ලෙස එහි වැඩි දුරටත් සදහන්ව ඇති බව වාර්තාකරුවෝ පවසති.

ගම් වැසියන් ප්‍රශ්න කරන්නේ 2017 වසරේදී තමන් යළි මුල් ගම් බිම් වල පදිංචිව මේ වන විට වසර තුනක් ගතව ඇති අතර හදිසියේම තමන්ට එම භුමියෙන් ඉවත් වන ලෙස දැනුම් දීම ගැටළු සහගත බවයි.

පොල් වැනි ස්ථිර බෝග මෙන්ම තාවකාලික බෝග ද වගා කරගනිමින් සිය ජීවනෝපාය කරගෙන සිටින තමන්ට යෑම සදහා වෙනත් කිසිදු ස්ථානයක් නොමැති බව පෙන්වා දෙන සුරියපුරම් ගම් වැසියන් රජයේ බලධාරීන්ගෙන් ඉල්ලා සිටින්නේ දශක ගණනාවක් තමන් පදිංචිව සිටි භුමියේ අයිතිය තමන්ට ලබා දෙන ලෙසයි.

මේ වන විටත් සූරියපුරම් ග්‍රාමයේ පවුල් 19 ක් පදිංචිව සිටින අතර නන්දිකඩාල් කලපුව ආසන්නයේ සීනියාමොට්ටෙයි සමීපයේ වනාන්තරයක් එලි කර කේපාපුලව් යනුවෙන් නම්කොට ඉදිකළ ආදර්ශ ගම්මානයේ යුද්ධයෙන් පසු පදිංචි කරවනු ලැබූ සූරියපුරම් ග්‍රාමයේ මුල් පදිංචිකාර පවුල් 22 ක ජනතාව ද සිය කෘෂි කාර්මික කටයුතු කරන්නේද එම භුමියේ බව ගම් වැසියෝ වැඩි දුරටත් පෙන්වා දෙති.

Facebook Comments

wedding people