මිනිස් සමාජයේ සංස්කෘතිය, සදාචාරය, මනුෂ්‍යත්වය, සමගිය හා සංහිඳියාව, බෙදා හදා ගැනීමට ඇති ලැදියාව මෙන්ම මිනිසා තුළ පවතින සත්ත්ව කරුණාව වැනි ගුණාංග තව තවත් සමාජය තුළ තහවුරු කරලීමට තෛපොංගල් උත්සවය මඟ සාදන බව ජනාධිපතිවරයා පවසයි.
කෘෂිකර්මාන්තයට නිසි බුහුමන පුදන තෛපොංගල් උළෙල ආහාර නිෂ්පාදනයෙන් ස්වයංපෝෂිත වීම කරා යාමට රජය ගන්නා උත්සාහය අර්ථවත් කරන අතරම එයට ශක්තිය සපයන අවස්ථාවක් බව 14 ඉරිදා යෙදී ඇති තෛපොංගල් උත්සවය වෙනුවෙන් ජනාධිපති මෛත්‍රීපාල සිරිසේන නිකුත් කල සුබ පැතුම් පණිවුඩයේ දැක්වේ.
මිනිස් සංහතිය ශිෂ්ටත්වය කරා පැමිණි ගමනේදී, කෘෂිකර්මාන්තය ප්‍රමුඛ කාර්යභාරයක් ඉටු කළ බව නොරහසක් බව පවසන ජනපති වත්මනෙහි දක්නට ලැබෙන කාර්මික හා තාක්ෂණික දියුණුව හමුවේ ගැමි ප්‍රජාව ගොවිකම අතහැර නගර කරා ඇදී යමින් සිටින පසුබිමක වුව, අතීත සම්ප්‍රදායන් සුරැකීමටත්, එය සැමරීමටත් නිමිත්තක් ලෙස තෛපොංගල් උත්සවය හඳුන්වා දෙයි.
කෘෂි සංස්කෘතියේ ගැඹුරු හරයන් යළි යළිත් අප වෙත සමීප කරමින් තෛපොංගල් උළෙල සමරන බැතිමතුන් සමඟ තමන්ද එක්වන බව ජනාධිපති මෛත්‍රීපාල සිරිසේන නිකුත් කල පණිවුඩයේ වැඩි දුරටත් සඳහන් වේ.
Facebook Comments
