බහු ජාතික සමාගම් වලින් ජන මාධ්‍යකරණයට ඇගිලි ගැසීම්

ප්‍රකෝටිපති බහුජාතික සමාගම් විසින් ජාත්‍යන්තර මාධ්‍ය ආයතන පවා වාරණයට ලක් කරන ආකාරය පිළිබඳව මෑතදී කරන ලද හෙලිදරව්වකින් අනාවරණය වී ඇත්තේ ඔවුන්ගේ බලපෑමට නතු නොවන මුල් පෙලේ මාධ්‍යවේදීන් හා මාධ්‍යවේදිනියන්ට පවා ගැලවිල්ලක් නැති බවයි.

ඔවුන්ගේ අලුත්ම ගොදුර වී ඇත්තේ ජාත්‍යන්තර විලාසිතා සඟරාවක ශ්‍රී ලංකාවේ ප්‍රධාන සංස්කාරක වරියයි.

බස්ෆීඩ් (Buzzfeed) ජාත්‍යන්තර සගරාව නොබෝදා පලකළ වාර්තාවක් මගින් හෙළිකොට ඇත්තේ ලංකාවේ විලාසිතා කර්මාන්තයේ නියුතු ආයතන විසින් සම පැහැපත් වර්ණගන්වන නිෂ්පාදනයන් ප්‍රචාරය සදහා තදබල පීඩනයක් ක්ෂ්ත්‍රයේ ජනමාධ්‍ය කරුවන්, නිරූපිකාවන්, පොළඹවන්නන්, හා විලාසිනියන් වෙත එල්ල කරන බවය.

 

මෙහිදී බස්ෆීඩ් සගරාව තම වාර්තාව සදහා ජාත්‍යන්තර කොස්මොපොලිටන් (Cosmopolitan) සගරාවේ, කොළඹ මධ්‍යස්ථානයේ ප්‍රධාන සංස්කාරකවරිය ලෙස කටයුතු කල කිනිතා ශෙනෝයි මාධ්‍යවේදිනියගේ අත්දැකීම ආසන්න නිමිත්ත ලෙස ඉදිරිපත් කර තිබේ. කිනිතා ශෙනෝයි බස්ෆීඩ් සඟරාවට කියා ඇත්තේ සම සුදුපිරියම් කරන්නේ යයි ප්‍රකාශිත ආලේපනයක් නිෂ්පාදනය කරන සමාගම් විසින් තමාගේ ජීවිතය කාලකන්නි කර දැමූ බව යි.

බස්ෆීඩ් සගරාව (Buzzfeed) මගින් කිනිතා ප්‍රසිද්ධියේ චෝදනා කර සිටින්නේ තමාගේ හැගීම් වලට විරුද්ධව කටයුතු කිරීමට ලෝකයේ විශාලම සමාගම් ජාලයක් වන යුනිලිවර් සමාගම විසින් අයුතු බලපැම් එල්ල කල බවයි. තමා වෙත සම සුදු පිරියම් කරන්නේ යයි කියන නිෂ්පාදන ඇතුලත් ‘දැකුම් පැසක්’ යුනි ලීවර් සමාගමේ විලේපන වර්ගයක් වන ‘පොන්ඩ්ස්’ වෙතින් ලැබුනු බවත්; මේ විලේපන පැස එවීම මගින් සමාගමේ අධිකාරීන් වැර දැරුවේ තමා වසගයට ගෙන තම සංස්කාරකත්වයෙන් යුත් කොස්මොපොලිටන් සමාජ මාධ්‍ය තුලින් එම නිෂ්පාදන වලට ප්‍රචාරක අනුග්‍රහය ලබා ගැනීම බවත් ඇය පවසා ඇත.

මේ මනහර ඇසුරුම් පැස බාරගත්තේ වී මුත් එම තෑග්ග සමග තිබූ බලාපොරොත්තුව ගැන නම් තමා තුල ක්ෂණිකව ම ඇති වූයේ වෙනස්ම හැගීමක් බව ශෙනෝයි පවසා ඇත්තීය.

“මම කොහෙත්ම මේ ඡවි වර්ණය සුදු වීමේ රම්‍යතාව පිලිබද සංකල්පය මත පදනම් වෙන්නේ නැහැ. තලෙලු පැහැයෙන් දිදුලන ඡවි වර්ණයෙන් යුත් ආසියානු කාන්තාවට තමාගේ සම සුදු කරගන්නැයි කීම මොන කථාවක් ද?” යි ඇය විමසයි.

එසේ මුත් යුනි ලිවර් “කොස්මොපොලිටන්” ප්‍රකාශනයන්හි ප්‍රචාරක දැන්වීම් වල අධිපතීත්වය දරයි. ඒ බලය මත මේ වෙළද සන්නාම ප්‍රදර්ශණයට බලකෙරෙන තර්ජනාත්මක පීඩනයක් සමාගම ඇයගේ සේව්‍යයා වෙත මුදා හැර තිබේ. මෙම මෙහෙයුමේ අවසාන ඵලය වූයේ ශෙනෝයි මෙම කර්මාන්තයෙන් සහමුළින්ම සමුගැනීම යි. අවසානවශයන් ඇය බස්ෆීඩ් වාර්තාවේ කියා ඇත්තේ තමා ජිවත් ව සිටියේ “භයංකාර දනව්වක” බවය.

බස්ෆීඩ් සඟරාව කළ විමසීමකට ප්‍රතිචාර දක්වමින් යුනිලීවර් සමාගමේ ප්‍රකාශිකාවක් පවසා ඇත්තේ තම නිෂ්පාදනයට ප්‍රචාරයක් ලබා දෙන ලෙස ඉල්ලීමේ “බරපතල වැරදි විනිශ්චය සම්බන්ධයෙන්” කොස්මොපොලිටන් පාලනාධිකාරියෙන් සමාව ඉල්ලා සිටි බවයි.

දැන් සඟරාව සමග දැඩි සම්බන්ද්ධතාවක් පවත්වාගෙන යන බව ඇය වැඩි දුරටත් පවසා තිබේ.

ගත වූ 2020 ජූලි දී හින්දුස්ථාන යුනි ලීවර් හා යුනි ලිවර් ශ්‍රී ලංකා එක්ව නිවේදනය කරන ලද්දේ තම සමාගමේ ජනප්‍රිය සුදු පිරියම් කිරිමේ ආලේපනය වන “ෆෙයාර් ඇන්ඩ් ලව්ලි” නිශ්පාදනය “ග්ලෝ ඇන්ඩ් ලව්ලි” ලෙසින් අළුතින් සන්නාම තැබූ බවයි. කෙසේ වෙතත් 1975 සිට 2019 පසුගිය වසර දක්වා කාලය තුලදී “ෆෙයාර් ඇන්ඩ් ලව්ලි” නාමයෙන් පැවැති නිෂ්පාදනයන් සමාගමේ ආදායමට එක්සත් ජනපද ඩොලර් මිලියන 500 ක මුදලක් එකතුකර දුන් බවද නිවේදනය පවසයි.