රැකියා කරන අවම වයස අවුරුදු දහඅට දක්වා ඉහළ දැමීමේ සැලසුමක්

හිටපු අමාත්‍යවරයකුගේ නිවසේ මෙහෙකාර සේවයේ යෙදී සිටි බාල වයස්කාර දියණියක් පිළිස්සුම් තුවාල සහිතව මරණයට පත් වීම රට පුරා විරෝධතා රැල්ලක් ඇති කිරීමට හේතු වෙද්දී, යම් අයෙකු සේවයේ යෙදිවිය හැකි වයස් මට්ටම ඉහළ දැමීම කෙරෙහි රජයේ අවධානය යොමුව තිබේ.

ශ්‍රී ලංකාවේ යම් පුද්ගලයෙකු යම් සේවයක යෙදවීමේ හැකි වයස අවුරුදු 18 දක්වා ඉහළ දැමීමට අදාළ නීති ඉදිරි මාස තුනක් ඇතුලත වැනි කාලය තුළදී බලාත්මක කරන බවයි කම්කරු අමාත්‍ය නිමල් සිරිපාල ද සිල්වා පවසන්නේ.

ස්ත්‍රීන්, තරුණයන් හා ළමයින් සේවයේ යෙදවීමේ පනත යටතේ හඳුන්වාදීමට නියමිත නියෝග මගින් අන්තරායකර රැකියා ලැයිස්තු සංශෝධනය කිරීමට අවශ්‍ය නියෝග නීති කෙටුම්පත් දෙපාර්තමේන්තුව විසින් දැනටමත් අවසාන කෙටුම්පත දක්වා සකස් කර පවතින බැවින් , එම ක්‍රියාවලියක් කඩිනම් කරන ලෙස ද අමාත්‍යවරයා අදාළ නිලධාරීන්ට උපදෙස් ලබා දී තිබේ.

එසේම වසර 100කට වඩා පැරණි ගෘහසේවක ප්‍රජාව⁣ට අදාළ නීතිරීති ද වෙනස් කරමින්, ඔවුන්ගේ සුභසාධනය සඳහා නව නීති රීති ගෙන එන බව ද අමාත්‍ය නිමල් සිරිපාල ද සිල්වා ප්‍රකාශ කර ඇත්තේ කම්කරු අමාත්‍යාංශයේ පැවැති ගෘහස්ථ සේවක අයිතිවාසිකම් ආරක්ෂා කිරීම සඳහා ගතයුතු ඉදිරි ක්‍රියාමාර්ග පිළිබඳ සාකච්ඡාවේදිය.

කම්කරු දෙපාර්තමේන්තුව, නීතිපති දෙපාර්තමේන්තුව, අධිකරණ අමාත්‍යංශය, ළමා හා කාන්තා කාර්යාංශය, ජාත්‍යන්තර කම්කරු සංවිධානය සහ එක්සත් ජාතීන්ගේ ළමා අරමුදල නියෝජිතයන්ගේ සහභාගීත්වයෙන් ජුලි 27 අගහරුවාදා එම සාකච්ඡාවක පවත්වා තිබේ.

ළමයින් සේවයේ යෙදවීම සහ ගෘහස්ථ සේවකයන්ගේ අයිතිවාසිකම් පිළිබඳව එහිදී සාකච්ඡා වී ඇත.

යම් පුද්ගලයෙක් නිවසක සේවයේ යොදවා ගන්නේ නම් ඒ පිළිබඳ තොරතුරු සේවා යෝජකයා විසින් දිස්ත්‍රික් කම්කරු නිලධාරියා හමුවේ ලියාපදිංචි කළ යුතු බවත්, ජාතික අවම වැටුප් පනත ට ගෘහස්ථ සේවක සේවිකාවන් ඇතුලත් කිරීම, එම ගෘහ සේවක සේවිකාවන් ආවරණය වන පරිදි (EPF) සේවක අර්ථසාධක අරමුදල් සහ සේවා නියුක්තියන්ගේ භාර අරමුදල් (ETF) පනත් සංශෝධනය කිරීමට ද එහිදී තීරණය වී ඇත.

ගෘහස්ථ සේවක ප්‍රජාවට වැඩ කරන වේලාවන්, විවේක කාලය සහ නිවාඩු ලබා දීමට අදාල නව රෙගුලාසි සකස් කිරිමටත් ඔවුන්ට ආරක්ෂිත හා සාධාරණ සේවා පරීක්ෂණ වල ලබාදීම සහතික කිරීමට ද එහි දී යෝජනා වී තිබේ.

මෙම සාකච්ඡාව සදහා කම්කරු අමාත්‍යාංශයේ ලේකම් මාපා පතිරණ කම්කරු හා කොමසාරිස් ජනරාල් නීතිඥ ප්‍රභාත් චන්ද්‍රකීර්ති ද එක්ව තිබේ.

ඇමැති නිවසේ මරණය

හිටපු අමාත්‍ය සහ වත්මන් පාර්ලිමේන්තු මන්ත්‍රී රිෂාඩ් බදියුදීන්ගේ නිවසේ මෙහෙකාර සේවයේ යොදවා සිටි බාල වයස්කාර දැරියක් වූ හැටන්, දියගම පදිංචි ජූඩ් කුමාර් ඉශාලිනී පිලිස්සුම් තුවාල සහිතව 2021 ජූලි මස 3 දින, කොළඹ ජාතික රෝහලට ඇතුළත් කර තිබුනි.

15 දා දැඩි සත්කාර ඒකක අංක 2 හි 73 වැනි වාට්ටුවේ ප්‍රතිකාර ලබමින් සිටිය දී ඇයගේ තුවාල හේතුවෙන් ඇය මිය ගියාය.

දිගුකාලයක් පුරා ඇය ලිංගිකව අපයෝජනයට ලක් වීම පිළිබඳ සැකය සම්බන්ධයෙන් ද පොලිස් පරීක්ෂණයක් පැවැත්වෙන බව කොළඹින් පලකෙරෙන ඇතැම් ජනමාධ්‍ය වාර්තා කර තිබුණි.

මිය ගිය දැරිය හිටපු අමාත්‍යවරයාගේ නිවසේ මෙහෙකාර සේවයට ගෙනැවිත් ඇත්තේ ඇයට අවුරුදු 15 මාස 11ක කාල සීමාවේදී බව ජනමාධ්‍ය වැඩි දුරටත් වාර්තාකර තිබේ.

දැරියට යුක්තිය ඉල්ලා දිවයිනේ ප්‍රදේශ රැසක මේ වන විටත් විරෝධතා මාලාවක් දියත් වෙමින් පවති.

අන්තරාදායක රැකියා සදහා බෑ

කම්කරු කොමසාරිස් ජනරාල් නීතිඥ ප්‍රභාත් චන්ද්‍රකිර්ති පෙන්වා දෙන පරිදි වයස අවුරුදු 16 ට වැඩි ළමයින්ට පමණක් රැකියා සදහා යොමුවීමේ අවස්ථාව මේ වන විට ශ්‍රී ලංකාව තුළ පවති.

එහෙත් එම වයස් සීමාවේ පසුවන ළමයින් අන්තරාදායක රැකියා සදහා යොදා ගත නොහැක.

මෙහෙකාර සේවය අන්තරාදායක රැකියාවක් ලෙස වර්ගීකර නොමැති බැවින් වයස අවුරුදු 16 ඉක්මවු අයෙකු මෙහෙකාර සේවයේ යෙදවීමේ හැකියාව මේ වනවිටත් මෙරට තුළ පවතී.

රැකියා 52 ක් අන්තරාදායක රැකියා ලෙස නම් කර තිබේ.

නව සංශෝධනයට අනුව රැකියාවේ ස්වභාවය සොයා බලා එම රැකියා සංඛ්‍යාව 76 දක්වා ඉහළ දැමීමට ද නියමිත බව කම්කරු කොමසාරිස් ජනරාල් නීතිඥ ප්‍රභාත් චන්ද්‍රකිර්ති ජනමාධ්‍ය වෙත පවසා ඇත.