කච්චතිව් දුපත යළි ඉන්දියාව සතු කරගැනීමේ තමිල්නාඩු මහ ඇමැතිගේ යෝජනාවට දකුණේ සිංහල නායකත්වයෙන් යුත් පක්ෂ කිසිදු ප්‍රතිචාරයක් දක්වා නැතත්, එම වැයමට උතුරේ දෙමළ පක්‍ෂවල විරෝධය එල්ල වී තිබේ.
තමිල්නාඩු හා උතුරු ලංකා ධීවරයන්ගේ ගැටලුව විසදීමට කච්චතිව් දුපත යළි ඉන්දියාවට පවරා ගන්නා මෙන් තමිල්නාඩු මහ ඇමැති එම්.කේ.ස්ටාලින් ඉන්දීය අග්‍රාමාත්‍ය නරේන්ද්‍ර මෝඩිගෙන් ඉල්ලා සිටියේ චෙන්නායි නුවර පසුගිය දා පැවති උත්සවයකදීයි.
මහ ඇමැති ස්ටාලින් පැවසුවේ තමිල්නාඩු ධීවරයන්ට අනුව ඉන්දු-ලංකා මුහුදේ ගැටලුවට හොඳම විසදුම වන්නේ කච්චතිව් යළි පවරා ගැනීම බවයි.
වවුනියාවේ පැවති උත්සවයකට එක්වූ තමිල් ඊළාම් විමුක්ති සංවිධානයේ නායක, පාර්ලිමේන්තු මන්ත්‍රී සෙල්වම් අඩෙයික්කලනාදන් කියා සිටියේ කච්චතිව් දුපත කිසිසේත්ම උතුරේ ධීවරයන්ට අත්හැර දැමිය නොහැකි බවයි.
“ඉන්දියාව එයාලගේ ආරක්ෂාව ගැන බය වෙන්න ඕනේ නැහැ. අපිට කොහොමත් කච්චතිව් ආපහු දෙන්න බැහැ. ආර්ථික අර්බුදයෙන් ගොඩ එන්න අපිට ඉන්දියාව, තමිල්නාඩු මහ ඇමැති කරන උදව් ගැන ස්තුති කළත්,කච්චතිව් පවරා ගන්න යෝජනාවට නම් අපි විරුද්ධයි,“ ඔහු පවසයි.
කච්චතිව් දුපත යළි ඉන්දියාවට පවරා ගැනීමට කර ඇති යෝජනාව සම්බන්ධයෙන් දෙමළ ජාතික සන්ධානය නියෝජනය කරන පාර්ලිමේන්තු මන්ත්‍රී චාල්ස් නිර්මලනාදන් ගෙන් මාධ්‍ය කළ විමසීමකදී ඔහු කියා සිටියේ උතුරු ධීවරයන්ගේ ස්ථාවරය නම් එය නැවත ලබා දිය නොහැකි බවයි.
එසේ කිරීමෙන් උතුරේ ධීවරයන්ට විශාල හානියක් සිදුවන බැවින් තමිල්නාඩු ඉල්ලීම කොහෙත්ම ඉටුකළ නොහැකි බවද මන්ත්‍රීවරයා පවසා තිබේ.
කච්චතිව් කොදෙව්ව පිලිබඳ ප්‍රශ්නය රටවල් දෙකක් අතර ගිවිසුමක් මගින් විසඳා ගත් දෙයක් බැවින් යළිත් ඒ පිළිබඳව යම් ගැටළුවක් මතු වන්නේ නම් දෙපාර්ශවය එක්ව සාකච්ජා කළ යුතු බව ඉලංගෙයි තමිල් අරසු කච්චි නායක මාවෙයි සේනාධිරාජා පවසයි.
ඉන්දු-ලංකා ධීවර ආරවුලට මෙතෙක් තිරසාර විසදුමක් ලැබී නොමැති බැවින් ඊට අදාලවම මෙම කච්චතිව් අර්බුදය ද ඉන්දියාව සමග රාජතාන්ත්‍රිකව විසඳා ගත යුතු බව ඉලංගෙයි තමිල් අරසු කච්චි නායකයා මාධ්‍යට සඳහන් කරයි.
කච්චතිව් හා නෙඩින්තිව් යනු උතුරේ ධීවර කර්මාන්තයේ ස්වාධිනත්වය තහවුරු කරන ප්‍රදේශ බැවින් එම ප්‍රදේශ කිසිවෙකුට ලබා දීමට නොහැකි බව උතුරු පළාත් සභාවේ හිටපු සභානායක සී.වී.කේ.සිවඥානම් අවධාරණය කරයි.
“එසේ කළහොත් අපේ ධීවරයන්ගේ ජීවනෝපායට දැඩි බලපෑමක් එල්ල වෙනවා.“
“අපේ ධීවරයන් පීඩාවට පත්වෙන්නේ ඉන්දීය ධීවරයන්ගෙන් පමණක් නොවේ.මඩකලපුවේ සිට මුලතිව් දක්වා මුහුදු සම්පත් කොල්ල කන්නේ දකුණෙන් එන සිංහල ධීවරයන්.“
ඉන්දීය අගමැතිනිය වූ ඉන්දිරා ගාන්ධි 1974 දී කච්චතිව් දුපත ලංකා ආණ්ඩුවට සාමකාමිව පවරා දුන්නේ එවකට අගමැතිනිය වූ සිරිමා බණ්ඩාරනායක සමග පැවති මිත්‍රත්වය හේතුවෙනි.
ඉන්දියාවට ඉතාමත් සමීපයෙන් පිහිටි කච්චතිව් කොදෙව්ව ඉන්දීය හා ලාංකික ධීවරයන්ට සිය මසුන් මැරීමේ කාර්යයේදී ඉතා වැදගත් මධ්‍යස්ථානයක් ලෙස සැලකේ. දුපතේ පිහිටි ඉපැරණි ශාන්ත අන්තෝනි දෙව් මැදුර දෙරටේම ධීවරයන්ගේ පුද සත්කාර ලබමින් වාර්ෂිකව දේව මංගල්‍යයක්ද පවත්වයි.
මන්නාරම් දිස්ත්‍රික් ධීවර සංගම් නායකයන් පසුගියදා මාධ්‍ය කැඳවා ආණ්ඩුවට චෝදනා කළේ කච්චතිව් දුපත දිගු කාලීනව ඉන්දියාවට බදු දීමේ සුදානමක් ඇති බවටයි.
ඊට දින කිහිපයකට පසු ගෝඨාභය -රනිල් ආණ්ඩුවේත් ධීවර ඇමතිවරයා ලෙස වැඩ බාරගත් ඩග්ලස් දේවානන්දා “කච්චතිව් දුපත ඉන්දියාවට බදු දීමේ සැලසුමක් නොමැති බව“ට සහතික විය.
ලංකාවේ ආර්ථිකය බිඳ වැටීම නිසා පීඩා විඳින ජනතාවට සහන සැලසීමට ප්‍රතිඋපකාරයක් වශයෙන් කච්චතීව් දූපත ආපසු ලබාගැනීමට ඉන්දීය ආණ්ඩුව කටයුතු කරනු ඇති බවට එරට ධීවරයන් අපේක්ෂාව පල කර තිබුණි.
Facebook Comments
