‘සංවර්ධනයෙන්’ ගම්බිම් අහිමිවීමට එරෙහිව නැගෙනහිර ජනතාවගේ අරගලයක්

සූර්ය පැනල මගින් බල ශක්තිය උත්පාදනය කර කෘෂිකර්මාන්තයට යොදවන මෙරට පළමු ව්‍යාපෘතියෙන් පීඩාවට පත් නැගෙනහිර පළාතේ ගම්වාසීන් පිරිසක් එම ව්‍යාපෘතිය සම්පුර්ණයෙන්ම නවතා දමන ලෙස බල කරමින් විරෝධතාවයක් දියත් කර තිබේ.

මඩකලපුව, වව්නතිව් ප්‍රාදේශිය ලේකම් කොට්ඨාසයට අයත් නාවට්කාඩු ගම්වැසියන් ජුලි 29 වැනි සදුදා ප්‍රදේශිය ලේකම් කාර්යාලය ඉදිරිපිටදී විරෝධතා දියත් කරමින් පෙන්වා දුන්නේ මෙම ව්‍යාපෘතිය හේතුවෙන් ගම් වැසියන්ගේ ජීවනෝපාය අහිමි වී ඇති අතර සෞඛ්‍ය ගැටළුද ඇති කරමින් පවතින බවයි.

පවුල් 280 ක් පමණ ජීවත් වන නාවට්කාඩු ගම්මානයට මීටර් 500 ක් පමණ දුරින් අක්කර 30 ක භුමි ප්‍රමාණයක් තුළ 2019 වසරේදී ආරම්භ කළ ව්‍යාපෘතියට මෑතකාලිනව තවත් අක්කර 30 ක පමණ ප්‍රමාණයක් ඈඳා ගනිමින් ව්‍යාපෘතිය පුළුල් කිරීම ආරම්භ කිරීමත් සමග ගම්මානයට මීටර් 100 ක් පමණ ආසන්න වන ප්‍රදේශය පුරා ව්‍යාපෘතිය පැතිර ඇති බවයි ගම්වාසීන් පවසන්නේ.

කිරි ගවයන් ඇති කිරීම බහුතර පිරිසකගේ ජීවනෝපාය වු ගම්මානයක මෙවැනි ව්‍යාපෘතියක් තව දුරටත් පුළුල් කිරීම නිසා මේ වන විටත් සිය කිරි ගවයන්ට අහිමිවු තෘණ භුමි නැන්තටම නැතිව යන බව පෙන්වා දෙන ගම්වාසින් අවධාරණය කරන්නේ සූර්ය පැනල ව්‍යාපෘතිය මගින් ඇතිවන විකිරණ නිසා ඇස් සහ සම ආශ්‍රිත රෝගාබාධ පැන නැගී ඇති බවයි.

ගමේ ජනගහනය වැඩි වීමත් සමග ඔවුන්ට අලුතින් නිවාස ඉදිකරගැනීම සදහා භුමියක් අහිමිවීම නිසා ඔවුන්ට නිවාසයක් ඉදිකරගැනීම සඳහා ලේ ඥාතීන්ගෙන් වෙන්ව පිටගම් බලා යාමට සිදු වන බවටත් ඔවුන් එහිදී පෙන්වා දී තිබේ.

ගම්වාසීන් තව දුරටත් චෝදනා කරන්නේ පසුගිය මාර්තු 3 වැනිදා සිට විරෝධතා දියත් කළ ජුලි 29 දක්වා වන කාලය තුළ අවස්ථා හතරකදී ප්‍රාදේශිය ලේකම්වරයා ඇතුළු බලධාරීන් සමග තමන් මුහුණ දී සිටින ගැටළුව සම්බන්ධයෙන් අවස්ථා හතරකදී සාකච්ඡා පැවැත්වු නමුත් කිසිදු විසදුමක් නොලැබුන බවයි.

විරෝධතාවයට එක්ව සිටි නාවට්කාඩු ගම්වාසියකු සදහන් කළේ සූර්ය පැනල ව්‍යාපෘතිය සම්පුර්ණයෙන්ම නවතා දමන තුරු විරෝධතා අඛණ්ඩව ඉදිරියට ගෙන යන බවයි.

“සුර්ය බල ශක්ති ව්‍යාපාතිය දැනටමත් විශාල ප්‍රදේශයක ක්‍රියාත්මක වෙනවා. ඉර එළියේ ඒ පැත්තට ගියොත් රස්නය මුණටම වදිනවා. ඇසට නොපෙනෙන තරමට ඒ රස්නය තියනවා. ඔවුන් මුලින්ම කුඩාවට පටන් ගත්තා. ඊට පස්සේ ටික ටික ලොකු ව්‍යාපෘතියක් බවට පත් කළා. අනාගතයේදී සුර්ය බල ශක්ති ව්‍යාපාතීයේ වැටත් අපේ නිවාස වැටත් එකම වෙනවා. ඒ නිසා ව්‍යාපෘතිය සම්පුර්ණයෙන්ම නවත්වන තුරු විරෝධතාව ඉදිරියට ගෙනි යනවා.”

විරෝධතා අවසානයේ සිය ඉල්ලීම් ඇතුලත් සන්දේශයක් වව්නතිව් ප්‍රාදේශිය ලේකම්වරයා වෙත භාර දීමටත් ගම්වාසීන් කටයුතු කර තිබේ.

පළාත් බද වාර්තාකරුවන් පවසන්නේ නාවට්කාඩු ගම්වැසියන් මුහුණ දී සිටින ගැටළුව සම්බන්ධයෙන් අදාල බලධාරීන් දැනුවත් කිරීමට ප්‍රාදේශිය ලේකම්වරයා එහිදී ගම්වැසියන්ට පොරොන්දු වු බවයි.

2022 ඔක්තෝබර්

සූර්ය පැනල මගින් බල ශක්තිය උත්පාදනය කර කෘෂිකර්මාන්තයට යොදවන මෙරට පළමු ව්‍යාපෘතිය වන මඩකලපුව දිස්ත්‍රික්කයේ, වව්නතිවු හි ඉදිකළ පොළව මත සවිකල සූර්ය පැනල ව්‍යාපෘතිය විවෘත කර තිබුනේ 2022 වසරේ ඔක්තෝබර් 11 වැනි දිනයි.

මෙම බලාගාරය වින්ඩ් ෆෝර්ස්, විදු ලංකා සහ හයි එනර්ජී සමාගම්වල ආයෝජනයක් බව බලශක්ති අමාත්‍ය කාංචන විජේසේකර එදින පවසා තිබුණි.

වාර්ෂිකව ගිගාවොට් පැය 20ක් එම ව්‍යාපෘතිය ඔස්සේ ජාතික විදුලි පද්ධතියට අලෙවි කිරීම ආයෝජකයන්ගේ අපේක්ෂාවයි.