වැක්සින් වෙනුවට අත්‍යාවශ්‍ය සේවා නියෝග පැනවීම ‘මර්දනයක්’

වැඩකරන ජනතාව මාරාන්තික වසංගතයෙන් ජීවිතය බේරා ගැනීම සදහා එන්නත් ඉල්ලූ විට ජනාධිපතිවරයා විසින් අත්‍යවශ්‍ය සේවා නියෝග පැනවීම මර්දනීය ක්‍රියාමාර්ගයක් ලෙස පෙන්වා දෙන වෘත්තිය සමිති එයට දැඩි විරෝධය පළ කර තිබේ.

කෝවිඩ් 19 වසංගතය පැතිරෙද්දී විවිධ ක්ෂේත‍්‍රවල වැඩකරන ජනතාවට ප‍්‍රමුඛතාවය ලබා නොදී විවිධ දේශපාලන හිතවත්කම් මත අවිධිමත්ව එන්නත් ලබාදීම මේ වන විට සිදුවෙමින් පවතින බවයි වැඩ කරන ජන බලය සංවිධානය පවසන්නේ.

මේ තත්වය තුළ ක්ෂේත‍්‍ර ගණනාවක වැඩකරන ජනතාව එන්නත් ලබාදෙන ලෙස බල කරමින් විවිධ වෘත්තීය ක්‍රියාමාර්ග ගන්නා බවට ප‍්‍රකාශ කර තිබු අතර ග‍්‍රාම නිලධාරීන් කෝවිඩ් 19 රාජකාරිවලින් ඉවත්වීමේ වෘත්තීය ක්‍රියාමාර්ගයක නිරත වූයේ එන්නත් ලබාදෙන ලෙස බල කරමිනි.

දැනටමත් කෝවිඩ් මර්දන රාජකාරිවල යෙදන හා අත්‍යවශ්‍ය සේවාවල යෙදනෙ බැංකු සේවකයන්, ග‍්‍රාම නිලධාරීන්, සමෘද්ධි නිලධාරීන්, බස්රථ සේවකයන්, දුම්රිය සේවකයන්, වරාය හා තැපැල් ආදී සේවාවල කටයුතු කරන සේවකයන් විශාල පිරිසක් කෝවිඩ් 19 ආසාදිතයන් බවට පත් වී ඇති බවයි වැඩ කරන ජන බලය සංවිධානය පවසන්නේ.

මෙම තත්වය මත ඔවුහු තමන්ට එන්නත් ලබාදෙන දෙස ඉල්ලමින් විවිධ බලපෑම් කරමින් සිටිති.

ඔවුන්ගේ එම මානූෂීය ඉල්ලීමට ඇහුම්කන් දී කෝවිඩ් 19 එන්නත්කරණ වැඩපිළිවෙල විධිමත්ව පවත්වාගෙන යාම වෙනුවට මැයි 27 දිනැති අති විශේෂ ගැසට්පත‍්‍රය මගින් ජනාධිපතිවරයා විසින් වරාය, ඛනිජතෙල්, ප‍්‍රවාහනය, දිස්ත්‍රික් ලේකම් කාර්යාල, ප‍්‍රාදේශීය ලේකම් කාර්යාල, ග‍්‍රාම නිලධාරීන්, සමෘද්ධි සංවර්ධන නිලධාරීන්, කෘෂි පර්යේෂණ සහාකාර නිලධාරීන් ඇතුළු දිස්ත්‍රික්ක හා ප‍්‍රාදේශීය ලේකම් කාර්යාල විසින් ක්ෂේත‍්‍ර මට්ටමේ සිදුකරන සියලූ කටයුතු, ශ‍්‍රී ලංකා මහ බැංකුව ඇතුළු සියලූම රාජ්‍ය බැංකු හා පළාත් පාලන ආයතන මගින් සිදුකරන කසල කළමනාකරණ සේවා අත්‍යවශ්‍ය සේවා ලෙස ප‍්‍රකාශයට පත් කරන තිබෙන බව නිවේදනයක් නිකුත් කරමින් වැඩ කරන ජන බලය සංවිධානය පෙන්වා දී තිබේ.

මෙම සේවාවල කටයුතු කරන පිරිස් ඍජුවම මහජනතාව හා විවිධ පාර්ශව සමග කටයුතු කරන අය වන අතර, ඔවුන් කෝවිඞ් 19 අවදානමට ඍජුවම ලක්වන පිරිස්ය.

“මෙම තත්වය තුළ මේ ආකාරයෙන් එම සේවා අත්‍යවශ්‍ය සේවා බවට පත් කිරීම වෘත්තීය ක්‍රියාමාර්ග මර්දන කිරීම සඳහා ගන්නා ලද මර්දනීය පියවරක් බව ‘වැඩකරන ජන බලය’ ලෙස අපි ප‍්‍රකාශ කර සිටින අතර, එම මර්දනකාරී තත්වය සම්බන්ධයෙන් දැඩි විරෝධය පළ කර සිටිමු.”

1979 අංක 61 දරණ අත්‍යවශ්‍ය මහජන සේවා පනත යටතේ පවතින නීති ප‍්‍රතිපාදන අනුව ඉහත මර්දනකාරී ගැසට් නිවේදනය නිකුත් කර ඇති බැවින් ග‍්‍රාම නිලධාරීන් විසින් තම වෘත්තීය ක්‍රියාමාර්ගය අද දහවල් තාවකාලිකව නතර කර ඇති බව වැඩ කරන ජන බලය සංවිධානය මැයි 28 සිකුරාදා නිකුත් කරන ලද නිවේදනයක සදහන්ය.

“ඒ සම්බන්ධයෙන් නිවේදනයක් නිකුත් කරන ශ්‍රී ලංකා එක්සත් ග‍්‍රාම නිලධාරී සංගමයේ ප‍්‍රධාන ලේකම් එස්.ඒ. අතුල සීලමන් ආරච්චි මහතා සඳහන් කර ඇත්තේ මෙය ශ‍්‍රී ලංකාවේ වෘත්තීය ක්‍රියාමාර්ගවලට වැට බැඳීම සඳහා රජයකට යොදා ගත හැකි ප‍්‍රබලම අවියක් බව නීතිඥයන් ප‍්‍රකාශ කර සිටි බවයි.”

මේ තත්වය තුළ වෘත්තීය ක්‍රියාමාර්ග මර්දනය සඳහා රජය මෙම අත්‍යවශ්‍ය සේවා නියෝග නිකුත් කර ඇති බව තවදුරටත් පැහැදිලි වන බවයි වැඩ කරන ජන බලය සංවිධානය පවසන්නේ.

ඉහත සේවාවන්වල යෙදෙන පිරිස් සම්බන්ධයෙන් ප‍්‍රමුඛතාවය ලබාදී ඔවුන්ට කෝවිඩ් 19 වැලැක්වීමේ එන්නත් කඩිනමින් ලබාදීමේ වැඩපිළිවෙලක් ක්‍රියාත්මක කරන ලෙසත්, වෘත්තීය ක්‍රියාකාරීත්වයන් මර්දනය සඳහා යොදා ගෙන ඇති ඉහත අත්‍යවශ්‍ය සේවා නියෝග වහා ඉවත් කරන ලෙසත්, කෝවිඩ් 19 එන්නත්කරණ වැඩපිළිවෙල දේශපාලන මැදිහත්වීම්වලින් හා ඥාති සංග‍්‍රහයන්ගෙන් තොරව විධිමත්ව ක්‍රියාත්මක කරන ලෙසත් ජොස්ප් ස්ටාලින්, රවී කුමුදේශ්, ජගත් ගුරුසිංහ සහ චින්තක බණ්ඩාර යන වෘත්තිය සමිති නායකයන්ගේ අත්සනින් නිකුත් කර තිබෙන මාධ්‍ය නිවේදනය මගින් තව දුරටත් බලකර තිබේ.