වන්නි සමූහ මිනීවලෙන් ගොඩගත් ද්‍රව්‍ය පිළිබඳ වාර්තාවක් අධිකරණයට

මුලතිව් සමුහ මිනී වළෙන් ගොඩගත් අස්ථි වල හිමිකරුවන් හදුනාගැනීම පහසු කිරීම සඳහා සමුහ සුසානයෙන් ගොඩගත් අනෙකුත් ද්‍රව්‍ය සම්බන්ධයෙන් වාර්තාවක් අස්ථි ගොඩගැනීමේ කටයුතු මෙහෙයවු අධිකරණ වෛද්‍ය නිලධාරීවරයා උසාවියට දැනුම් දී තිබේ.

අවුරුද්දකට මදක් වැඩි කාලයක් ගතකොට කොක්කුතොඩුවායි සමුහ සුසානයේ කැනීම් කටයුතු 2024 ජුලි 15 වැනිදා නිමා කරන විට පුද්ගලයන් 52 දෙනකුට අයත් අස්ථි කොටස් ගොඩ ගෙන තිබුනි.

එම සමූහ සුසානය සම්බන්ධ නඩුව මුලතිව් මහේස්ත්‍රාත් ධර්මලිංගම් ප්‍රදීපන් ඉදිරියේ 2025 පෙබරවාරි 27 වැනිදා විභාගයට ගැනීමෙන් අනතුරුව මුලතිව් දිස්ත්‍රික් රෝහලේ අධිකරණ වෛද්‍ය නිලධාරී කනගසභාපති වාසුදේවා ප්‍රදේශයේ මාධ්‍යවේදීන් සමග පවසා ඇත්තේ තමන් එදින අධිකරණයට වාර්තා දෙකක් ඉදිරිපත් කළ බවයි.

“මුලතිව් මහේස්ත්‍රාත් අධිකරණයේ කොක්කුතොඩුවායි සමුහ මිනි වල සම්බන්ධ නඩුව විභාගයට ගත් අවස්ථාවේදී සමුහ සුසානය සම්බන්ධයෙන් මම වාර්තා දෙකක් ඉදිරිපත් කළා. පළමුවැනි වාර්තාව කොක්කුතොඩුවායි සමුහ මිනි වලේ කැනීම් කර ගොඩගත් ඇටසැකිලි සමග තිබුන ඇඳුම් සම්බන්ධයෙන්. දෙවැනි වාර්තාව කොක්කුතොඩුවායි සමුහ මිනි වල කැනීමේදී ගොඩගත් අස්ථි කාගේදැයි හඳුනා ගැනීමට උපකාරී වන අනිකුත් ද්‍රව්‍ය සම්බන්ධයෙන්. ”

සමුහ සුසානයෙන් ගොඩ ගන්නා අස්ථි බලහත්කාරයෙන් අතුරුදහන් කරන ලද සිය සමීපතමයන්ගේදැයි හඳුනාගැනීමට අවශ්‍ය පියවර ගන්නා ලෙස ඉල්ලමින් ඥාතීන් විසින් මීට ඉහත දී අධිකරණයට දිවුරුම් පෙත්සම් කීපයක්ම ඉදිරිපත් කර තිබුනි.

දොස්තර වාසුදේවා විශ්වාසය පළ කරන්නේ අධිකරණයට ඉදිරිපත් කර ඇති වස්තු ඔවුන්ගේ ඥාතීන් විසින් හදුනා ගතහොත් මිනිස් අස්ථි වල අනන්‍යතාවය සොයා ගැනිමේ පහසුවක් ඇති වන බවටයි.

“දෙවැනි වාර්තාවේ කැණීම්වලදී හමුවූ අංක තහඩු, ඇඳුම්වල තිබු අංක සහ අනෙකුත් විස්තර ඉදිරිපත් කරලා තියනවා. මෙහිදී අංක තහඩු ඇති අයගේ ඥාතීන් කවුරුන් හෝ ඉදිරිපත් වුවහොත් මියගිය පුද්ගලයා පහසුවෙන් හඳුනාගන්න පුළුවන්.”

වල දමා සිටියවුන්ගේ ජීව දත්ත රැගත් අවසන් වාර්තාව සති හයක කාලයක් තුළ අධිකරණයට ඉදිරිපත් කිරීමේ අපේක්ෂාව අධිකරණ වෛද්‍ය නිලධාරි වාසුදේවා මාධ්‍යවේදීන් හමුවේ වැඩි දුරටත් පලකොට තිබේ.

“අවසන් වාර්තාව නිකුත් කරන අවස්ථාවේ දී මියගිය පුද්ගලයා මිය ගියේ කුමක් නිසාද? ඔවුන්ගේ වයස, උස යනාදී විස්තර ඇතුළත් වාර්තා සති හයක් ඇතුළත ඉදිරිපත් කරනවා.”

කොක්කුතොඩුවායි විමර්ශනයට පුරෝගාමී වී සිටි වෝහාරික පුරාවිද්‍යාඥ මහාචාර්ය රාජ් සෝමදේව විසින් 2024 මාර්තු මාසයේ අධිකරණයට දැනුම් දී තිබුනේ සමූහ මිනීවලෙන් ගොඩගන්නා ලද අස්ථි කොටස් අනූව දශකය මැද භාගයේ අවිධිමත් ලෙස වල දමන ලද විමුක්ති කොටි සාමාජිකයන්ගේ බවයි.

ඔවුන් නිසැකයෙන්ම වෙඩි පහරින් මියගොස් ඇති බව ඔහුගේ නිගමනයයි.

කොක්කුතොඩුවායි මහාවිද්‍යාලයේ සිට කෝකිලායි දෙසට මීටර් 200ක් පමණ දුරකින් 2023 ජුනි 29 වැනි බ්‍රහස්පතින්දා හවස් යාමයේ මිනිස් සිරුරු කොටස් සහ ඇඳුම් කොටස හමුවී තිබුනේ ජල සම්පාදන දෙපාර්තමේන්තුවේ කාර්ය මණ්ඩලය ජලනල එළීමට පොළව හාරමින් සිටියදී ය.

කොක්කුතොඩුවායි සමූහ සුසානය සම්බන්ධ නඩුව 2025 මාර්තු 27 වැනිදා යළි විභාගයට ගැනීමට නියමිත බව පළාත් බද වාර්තාකරුවෝ වැඩි දුරටත් පවසති.