ශ්‍රී ලංකාවේ සිවිල් යුද්ධය සමයේ යුද අපරාධ සහ මානව වර්ගයාට එරෙහි අපරාධ සම්බන්ධයෙන් චෝදනා ලැබ සිටින ආරක්ෂක මාණ්ඩලික ප්‍රධානී ඇතුළු තිදෙනකුට එරෙහිව ඉලක්කගත සම්බාධක පනවන ලෙසට අන්තර්ජාතික මානව හිමිකම් සංවිධානයක් එක්සත් රාජධානියෙන් ඉල්ලා සිටි.
ආරක්ෂක මාණ්ඩලික ප්‍රධානී ශවේන්ද්‍ර සිල්වා, හිටපු ආරක්ෂක ලේකම් කමල් ගුණරත්න සහ නැගෙනහිර පළාත් හිටපු මහ ඇමති සිවනේසතුරෙයි චන්ද්‍රකාන්තන් හෙවත් පිල්ලෙයාන්ට එරෙහිව සම්බාධක පනවන ලෙසට ඉල්ලා සිටින “සාමය සහ යුක්තිය සඳහා වූ ශ්‍රී ලංකා ව්‍යාපාරය (Sri Lanka Campaign for Peace & Justice) ” නම් අන්තර්ජාතික මානව හිමිකම් සංවිධානය පෙන්වා දෙන්නේ කුරිරු යුද්ධය අවසන් වී දශක ගණනක් ගෙවී ඇතත් යුද අපරාධ ඇතුළු කල් ගිය බරපතල මානව හිමිකම් උල්ලංඝනය වලට සම්බන්ධ ඉහළ පෙළේ නිලධාරීන් අඛණ්ඩව දණ්ඩ මුක්තිය භුක්ති විඳිමින් සිටින බවයි.
ඇමරිකා එක්සත් ජනපදය, ශවේන්ද්‍ර සිල්වා වැනි යුද අපරාධ චෝදනා ලද සමහර ශ්‍රී ලාංකිකයන්ට එරෙහිව ගෝලීය මැග්නිට්ස්කි පනත යටතේ සම්බාධක පනවා ඇති බව අවධාරණය කරන මෙම මානව හිමිකම් සංවිධානය, වගවීම සඳහා වන ගෝලීය ව්‍යාපාරය ශක්තිමත් කිරීමටත් ශ්‍රී ලාංකික වින්දිතයන්ට යුක්තිය ලබාදීම සඳහා සහාය වීමටත් එක්සත් රාජධානියට මෙය හොඳ අවස්ථාවක් බව පෙන්වා දී තිබේ.
“එක්සත් ජාතීන්ගේ සංවිධානය පිහිටුවන ලද ශ්‍රී ලංකා වගවීමේ ව්‍යාපෘතියේ අඛණ්ඩ ප්‍රයත්න මගින් සාක්ෂි සුරැකීම සහ යුක්තිය සඳහා උනන්දු කිරීම අවශ්‍යතාව අවධාරණය කෙරෙන නමුත් ජාත්‍යන්තර වශයෙන් එල්ල කෙරෙන පීඩනයකින් තොරව, මෙම ප්‍රයත්නයන් ඇණහිටීමේ අවදානමක් ඇති බව” සාමය සහ යුක්තිය සඳහා වූ ශ්‍රී ලංකා ව්‍යාපාරය වැඩිදුරටත් කියා සිටියි.
Facebook Comments
