ඉන්දු-ලංකා සාකච්ඡාවලින් පසුවත් ඉන්දීය ධීවර මුහුදු කොල්ලයේ අඩුවක් නෑ

සිමා මායිම් පැන ලංකා මුහුදේ මසුන් කොල්ලකන ඉන්දීය ධීවරයන් උතුරේ ධීවරයන්ගේ ලක්ෂ ගණනක දැල් වලට හානි සිදු කළ බවට පොලීසියට පැමිණිල්ලක් ඉදිරිපත් කර තිබේ.

ඉන්දීය ධිවරයන් මෙරට මුහුදු සීමාවට ඇතුළු වීම වලකාලිම සදහා අවශ්‍ය පියවර ගැනීමට මැදිහත් වන ලෙසද ඉල්ලමින් නොවැම්බර් 24 වැනිදා උතුරේ දෙමළ ධිවර නායකයන් දෙදෙනකු විසින් කයිට්ස් පොලීසියට ඉදිරිපත් කළ පැමිණිල්ලේ සදහන් පරිදි පසුගිය මාසයේත් මේ මාසයේත් ඉන්දිය ධිවරයන් විසින් මෙරට ධිවරයන්ගේ ලක්ෂ 16 ට අධික වටිනාකමකින් යුතු දැල් විනාශ කර තිබේ.

පොලීසියට පැමිණිල්ල ඉදිරිපත් කිරීමෙන් පසු උතුරේ එක්සත් ධීවර සංගම් එකතුවේ ප්‍රකාශක අන්නලිංගම් අන්නරාසා මාධ්‍යවේදීන් වෙත පවසා තිබුනේ ඉන්දීය ධීවරයන් මෙය සැලසුම් සහගතව සිදු කරන ක්‍රියාවක් බවයි.

”පසුගිය 21 වැනිදා රැකියාව සදහා මුහුදට ගිය පිරිස 23 වැනිදා ගිහිල්ලා බලන කොට ධීවරයන් හතර දෙනකුගේ ලක්ෂ ගානක් වටිනා දැල් ඉන්දීය ටෝලර් යාත්‍රා විසින් නීති විරෝධිව ඇදගෙන ගිහිල්ලා තියෙනවා. මේක ධිවර කර්මාන්තය තම ජීවන උපාය කරගත් ජනතාව එතනින් ඉවත් කරන ක්‍රියාවක්. ඉන්දීය ට්‍රෝලර් යාත්‍රා මේක සැලසුම් සහගතව කරන වැඩක්.”

පොලිසියට පැමිණිලි කිරීමට අන්නලිංගම් අන්නරාසා හා එක්ව සිටි අනලතිව් ධීවර සමුපකාර සමිතියේ සභාපති ජෝන් බොස්කෝ මාධ්‍ය වෙත සදහන් කළේ උතුරේ ධිවරයන් ඉන්දිය ධිවරයන්ගෙන් විදින පීඩාව සම්බන්ධයෙන් කිසිදු බලධාරියකු විසදුමක් ලබා දෙන ආකාරයක් පෙනෙන්නට නොමැති බවයි.

”මේ සම්බන්ධයෙන් ඉන්දීය ආණ්ඩුවට සහ ශ්‍රී ලංකා ආණ්ඩුවට දැනුම් දී ඇතත් ඔවුන් කිසිදු පියවරක් ගන්නා බවක් පෙනෙන්නට නැහැ. අපිව මෙහෙම මරන්නද මෙයාලගෙ සැලසුම. තැන් කීයකට, නායකයෝ කී දෙනෙකුට, දැනුම් දුන්නත් ඔවුන් යමක් කරනවා පේන්නේ නෑ. අපිව මෙහෙම මරලා දාන එක තමයි සැලසුම වගේ පේන්නේ. ”

2024 ඔක්තෝබර් මාසයේ 24 සහ 25 යන දෙදින තුලදීත් ඉන්දීය ධිවරයන් විසින් උතුරේ ධිවරයන් 9 දෙනකුගේ ලක්ෂ ගාණක් වටිනා දැල් විනාශ කළ අවස්ථාවේ යාපනයේ පිහිටි ධීවර හා ජලජ සම්පත් අමාත්‍යාංශයේ කාර්යාලයට ඔක්තෝබර් 27 වැනිදා පැමිණිලි කළත් කිසිදු ප්‍රතිපලයක් අත් නොවු බව ඔහු වැඩි දුරටත් සදහන් කළේය.

ධීවර ජලජ සහ සාගර සම්පත් අමාත්‍ය රාමලිංගම් චන්ද්‍රසේකර් නොවැම්බර් 24 වැනිදා යාපනයේදී ධීවර සංගම් නායකයන් සමග පැවැති සාකච්ඡාවකින් අනතුරුව මාධ්‍ය වෙත ප්‍රකාශ කර තිබුනේ ශ්‍රී ලංකාවේ ධීවරයන්ගේ ජීවිත සමග සිදු කරන සෙල්ලම නතර කරන ලෙස ඉන්දිය ධීවරයන්ගෙන් මෙන්ම එරට ධීවර බලධාරීන්ගෙන් ඉල්ලා සිටින බවයි.

”ඇත්තටම ඒක පාලනය කරන්න ඕන. ඒකට විකල්ප අදහස් නැහැ. ශ්‍රී ලංකා මුහුදු ප්‍රදේශය අපේම මුහුදු ප්‍රදේශයයි. එය ඉන්දියාවට අයත් මුහුදු ප්‍රදේශයක් නෙමෙයි. අපේ සම්පත් කොල්ලකෑමට ඔවුන්ට කිසි අයිතියක් නැහැ. එයට ඉඩ දෙන්නත් බෑ. අපේ දරුවන්ට අයිති විය යුතු සම්පත් විනාශ කරන වැඩ තමයි ඔවුන් කරන්නේ. අද ඉන්දියන් බෝට්ටු අපේ මිනිස්සුන්ගේ ජීවිතත් එක්ක සෙල්ලම් කරනවා. මේ සෙල්ලම නවත්වන්න කියලා ඉන්දීය ධීවරයින්ගෙන් සහ ඔවුන්ගේ බලධාරීන්ගෙන් කාරුණිකව ඉල්ලා සිටිනවා.”

ඉන්දීය යාත්‍රා ශ්‍රී ලංකා මුහුදු සීමාවේ සිදුකරන අනවසර ධීවර කටයුතු වැළැක්වීම සඳහා පසුගිය මාසයේ පැවැති ඉන්දු- ශ්‍රී ලංකා සාකච්ඡාවලින් පසු ඉන්දීය බෝට්ටු ආක්‍රමණය ඉහළ ගොස් ඇති බවට උතුරේ එක්සත් ධීවර සංගම් එකතුවේ ප්‍රකාශක අන්නලිංගම් අන්නරාසා නොවැම්බර් 24 වැනිදා කයිට්ස් පොලීසිය ඉදිරිපිටදී මාධ්‍යවෙත පවසා තිබුනි.

”පසුගිය මස 29 වැනිදා ශ්‍රී ලංකා සහ ඉන්දීය නිලධාරීන් සාකච්ඡා පැවැත්වීමෙන් පසුව ඉන්දීය බෝට්ටු ආක්‍රමණය ඉහළ ගොස් තිබෙනවා. අපේ මිදුලටම ඇවිත් මාළු අල්ලනවා. විපතට පත් ධීවරයන්ට වන්දි ලබාදිය යුතුයි.”

6 වැනි නිලධාරී මට්ටමේ රැස්වීම

ධීවර ජලජ සහ සාගර සම්පත් අමාත්‍යාංශයේ නිල වෙබ් අඩවිය පවසන පරිදි ඉන්දියාව සහ ශ්‍රී ලංකාව අතර ධීවර කටයුතු පිළිබඳ ඒකාබද්ධ ක්‍රියාකාරී කමිටුවේ 6 වැනි නිලධාරී මට්ටමේ රැස්වීම 2024 ඔක්තෝබර් 29 වන දින කොළඹදී පවත්වා ඇත්තේ උතුරු නැගෙනහිර ප්‍රදේශ ආශ්‍රිත ශ්‍රී ලංකා මුහුදු සීමාවේ ඉන්දීය ධීවර යාත්‍රා මගින් සිදුකරන තහනම් ධීවර කටයුතු වැළැක්වීම ප්‍රධාන අරමුණ කරගනිමිනි.

2022 මාර්තු මස රැස්වීමෙන් අනතුරුව මෙම කමිටුව නැවතත් එලෙස රැස්වී ඇත්තේ වසර දෙක හමාරකට ආසන්න කාල පරිච්ඡේදයකින් පසුවය.

මෙවර සාකච්ඡාවේදී විශේෂ අවධානය යොමු වු කරුණු ධීවර ජලජ සහ සාගර සම්පත් අමාත්‍යාංශයේ නිල වෙබ් අඩවිය සදහන් කර ඇත්තේ පහත අයුරිනි.

”උතුරු නැගෙනහිර ප්‍රදේශ ආශ්‍රිත ශ්‍රී ලංකා මුහුදු සීමාවට ඉන්දීය යාත්‍රා ඇතුළුවීම වැළැක්වීම සඳහා දෙරටේ නීතිය ක්‍රියාත්මක කිරීමේ බලධාරීන්ගේ ඒකාබද්ධ මුර සංචාර තර කිරීම, දෙරට විසින් අත්අඩංගුවට ගත් ධීවරයින් සම්බන්ධ නීතිමය කටයුතු අවසන් කිරීමෙන් පසු එම ධීවරයන් කඩිනමින් නිදහස් කිරීම, දෙරටේ වෙරළ ආරක්ෂක බළකායන් විසින් පවත්වාගෙන යනු ලබන හදිසි ඇමතුම් යාන්ත්‍රනය ශක්තිමත් කිරීම, ශ්‍රී ලංකා මුහුදු සීමාවේදී මියගිය ඉන්දීය ධීවරයන් පිළිබඳ පවත්වන පරීක්ෂණවල වර්තමාන තත්ත්වය සොයා බැලීම, සහ දෙරටේ පර්‍යේෂණ ආයතන විසින් ධීවර ක්ෂේත්‍රයට අදාළ ඒකාබද්ධ පර්‍යේෂණ පැවැත්වීම යන කරුණු පිළිබඳව මෙවර රැස්වීමේදී විශේෂ අවධානය යොමු විය. ”

ඉන්දීය ධීවර යාත්‍රා මගින් ශ්‍රී ලංකා මුහුදු සීමාවේ සිදු කරන යාන්ත්‍රික පතුලේ ඇදගෙන යන දැල් භාවිතය (Bottom trawling) හේතුවෙන් සාගර සම්පත්වලට සිදුවන හානිය පිළිබඳව හා එය වැළැක්වීමට ක්‍රියා කිරීමේ වැදගත්කම පිළිබඳව ශ්‍රී ලංකා රජයේ නියෝජිතයන් විසින් මෙහිදී කරුණු අවධාරණය කරන ලද බවත් එහි සදහන්ය.

මීට අමතරව, ශ්‍රී ලංකාවේ බහුදින යාත්‍රාවලට අරාබි මුහුදට ගමන් කිරීමට සහ ආපසු පැමිණීමට පහසුකම් සැලසීම සඳහා ඉන්දීය මුහුදු සීමාව හරහා ප්‍රවේශ මාර්ගයක් ලබාදෙන ලෙස කර ඇති ඉල්ලීමට කඩිනම් ප්‍රතිචාරයක් ලබා දෙන ලෙසද ශ්‍රී ලංකා නියෝජිත කණ්ඩායම විසින් ඉල්ලා තිබේ.

ධීවර කටයුතු පිළිබඳ ඒකාබද්ධ ක්‍රියාකාරී කණ්ඩායමේ රැස්වීම් නිතිපතා පැවැත්වීමටත්, එකඟ වූ කරුණු පිළිබඳ ප්‍රගතිය අධීක්ෂණය කිරීමටත් දෙපාර්ශයේ එකඟතාවය පළවු බව ධීවර ජලජ සහ සාගර සම්පත් අමාත්‍යාංශයේ නිල වෙබ් අඩවිය වැඩිදුරටත් නිවේදනය කර ඇත.