නාවික හමුදාවෙන් අලි මෙහෙයුමක් (VIDEO)

0

ත්‍රිකුණාමල දිස්ත්‍රික්කයේ රවුන්ඩ් දුපතට සහ කෙවුලියා තුඩුව අතර වු මුහුදු ප්‍රදේශයේ සැඩ පහරකට හසුව මුහුදේ ගසාගෙන යමින් සිටි අලි දෙදෙනෙකු බේරා ගැනීමට නාවික හමුදාව සමත්ව තිබේ.

නැගෙනහිර නාවික විධානයට අනුයුක්ත නාවිකයින් පිරිසක් විසින් ඊයේ (23) උදෑසන එම අලි දෙදෙනා බේරා ගත් බවයි නාවික හමුදාව පවසන්නේ.

මුර සංචාරයේ නියුතු වෙරළබඩ යාත්‍රාවක් (IPC) මගින් මෙම අලි දෙදෙනා ගසාගෙන යන බව පළමුවෙන්ම නිරීක්ෂණය කර ඇත.

පසුව ඒ සඳහා මුර සංචාරයේ නියුතු තවත් වේග ප්‍රහාරක යාත්‍රා තුනක් සහ නාවික හමුදා කිමිදුම් අංශයේ නාවිකයන් කණ්ඩායමක් ද මෙම මෙහෙයුමට කඩිනමින් පිටත් කර යැවීමට නාවික හමුදාව කටයුතු කරන ලදී.

මෙම මෙහෙයුම සඳහා ත්‍රිකුණාමලය වන ජීවී දෙපාර්තමේන්තුවේද සහය ලැබී ඇති අතර ඔවුන්ගේ උපදෙස් මත නාවික හමුදාව විසින් අලි දෙදෙනා බේරා ගැනීමේ මෙහෙයුම දියත් කරන ලදි.

දැඩි පරිශ්‍රමයක් දරමින් අලි දෙදෙනාට උපද්‍රවයක් සිදු නොවන ලෙස මුහුදේ සිට නිරුපද්‍රිතව ගොඩබිම දෙසට රැගෙන ඒමට නාවික පුද්ගලයින් කටයුතු කළ අතර, අලි දෙදෙනා කෙවුලියා තුඩුව (ෆවුල් තුඩුව) ප්‍රදේශයට මුදා හැරිමට කටයුතු කෙ‍රිණි.

පසුගිය ජුලි 11 වන දින කෝක්කුතුඩුවායි සිට නාවික සැතපුම් 8 ක් පමණ දුරකදී සැඩ පහරට හසුව මුහුදේ ගසාගෙන යමින් සිටි අලියෙකු බේරා ගැනීමටද නාවික හමුදාව කටයුතු කරන ලදි.

 

 

Facebook Comments

wedding people