බලයට පත්වීමට පෙර පාලක පක්ෂයේ දැඩි දෝෂ දර්ශනයට ලක්වූ ත්‍රස්තවාදය වැළක්වීමේ පනත යොදාගෙන උතුරේ දෙදරු පියෙක් පොලීසිය විසින් අනුර කුමාර දිසානායක ආණ්ඩුව යටතේ පළමු වතාවට අත්අඩංගුවට ගෙන තිබේ.
දෙමළ ඊලාම් විමුක්ති කොටි සංවිධානයේ නායකයාගේ ඡායාරූපයක් මුහුනු පොතේ පළ කිරීම, එසේ අත් අඩංගුවට ගන්නා ලද උතුරේ දෙදරු පියකුට එරෙහිව පොලීසිය නගා ඇති චෝදනාවයි.
පළාත් බද වාර්තාකරුවන් පවසන්නේ නොවැම්බර් 30 වැනිදාට එළිවන විට ත්‍රස්ත මර්දන හා විමර්ශන කොට්ඨාශය (CTID) විසින් මෙලෙස අත්අඩංගුවට ගෙන ඇත්තේ යාපනයේ, ඉනුවිල් බටහිර, චුන්නාක්කම් හි පදිංචි මනෝහරන් ගජන්දරූබන් බවයි.
සුළු ජාතීන්ට එරෙහිව අසමානුපාතිකව යොදාගන්නා බවට දේශීය හා විදේශීය වශයෙන් දැඩි ලෙස දෝෂ දර්ශනයට ලක්ව තිබෙන ත්‍රස්තවාදය වැළැක්වීමේ පනත යොදා ගනිමින් අත්අඩංගුවට ගන්නා ලද තිස් හත් හැවිරිදි ගජන්දරූබන්ගෙන් ත්‍රස්ත මර්දන පොලීසිය ප්‍රශ්න කරමින් සිටින බවයි ඔවුන් වැඩි දුරටත් පවසන්නේ.
උතුරු නැගෙනහිර දෙපළාතේ දහස් සංඛ්‍යාත ජනතාවගේ දෛනික ජීවිතයට මහත් බාධා ගෙන දෙමින් ඇද හැලුනු ධාරානිපාත වර්ෂාව නොසලකා හරිමින් එම දෙපළාතේ දෙමළ ජනයා නොවැම්බර් 27 දා ස්ථාන රැසකම මලින්, ගඳින්, පහනින් සහ කදුලින් යුද්ධයේදී ඝාතනයට ලක් වු සිය සමීපතමයන් මාවීරර් නාල් (மாவீரர் நாள்) ලෙසින් අනුස්මරණය කිරීමට කටයුතු කර තිබුනි.
උතුරු නැගෙනහිර දෙපළාතේ මහවිරු සැමරුම් පැවැත්වීම සම්බන්ධයෙන් නව රජයේ ස්ථාවරය පැහැදිලි කරමින් කැබිනට් මාධ්‍ය ප්‍රකාශක අමාත්‍ය වෛද්‍ය නලින්ද ජයතිස්ස නොවැම්බර් 26 වැනි අගහරුවාදා සදහන් කර තිබුනේ ත්‍රස්තවාදී හා තහනම් සංවිධානයක සැමරුම්, ලාංඡන, කොඩි, පතාක කිසිවක් ප්‍රදර්ශනය කිරීමට අයිතියක් නොමැති බවයි.
”යම් තැනක තමන්ගේ මිය ගිය ඥාතීන් සමරනවනම්, පුද්ගලිකව ඒකට බාධා කරන්න රජයට අයිතියක් නැහැ. ඥාතීන් සැමරීම කියලා කියන්නේ එකක්. එල්.ටී.ටී.ඊ හෝ වෙනත් ත්‍රස්තවාදී සංවිධානයක් ප්‍රවර්ධනය කිරීම කියලා කියන්නේ තව එකක්. ඒ නිසා කිසි සේත්ම ඔය දෙක පටලවා ගත යුතු නැහැ. අපි බෝහෝම පැහැදිලිව කියලා තියනවා ඥාතීන් සමරන්න ඒ ගොල්ලන්ට තියන අයිතියට ගරු කරන අතරේ වෙනත් ආකාරයට නීති විරෝධි සහ රජය විසින් තහනම් කරන ලද කිසිවකට අවස්ථාවක් ලැබෙන්නේ නැහැ.”
පුද්ගලිකව සිදු කරන සැමරුම්වලට බාධා කිරීමට අයිතියක් නොමැති බවට නව රජයේ ස්ථාවරය වී තිබුනත් උතුරු නැගෙනහිර පුරා මෙවරත් පෙර ලෙසම පැවැතියේ සාමුහික මහවිරු අනුස්මරණ බවයි පළාත් බද වාර්තාකරුවන් පවසන්නේ.
ත්‍රස්තවාදය වැළක්වීමේ පනත අහෝසි කිරීම වෙනුවෙන් දෙමළ ජාතික සන්ධානයේ ප්‍රධානත්වයෙන් පසුගිය ආණ්ඩු සමයේ දියත් කෙරුණු මහජන පෙත්සම් ව්‍යාපාරයට උද්යෝගිමත් දායකත්වයක් සැපයූ ජනාධිපති ඇතුළු ජාජබ නායකත්වය ප්‍රකාශ කොට ඇත්තේ පනත සංශෝධනය සම්බන්ධ පියවර ගැනීම පාර්ලිමේන්තුවට පවරන බවයි.
Facebook Comments
