ශ්‍රී ලංකාව වෙනුවෙන් ඒකීය රාජ්‍ය අහෝසි කළ නව ආණ්ඩුක්‍රම ව්‍යවස්ථාවක් ඉල්ලා සිටින උතුරේ දෙමළ දේශපාලන පක්ෂයක් මෛත්‍රී-රනිල් පාලන සමයේ සකස් කළ ව්‍යවස්ථා කෙටුම්පත පිළි නොගන්නා බව යළිත් වරක් සපත කර තිබේ.
“මහවිරුවන් 50,000 ක් ජීවිත පූජා කළා. අවසන් යුද්ධයේදී පමණක් ලක්ෂ එකහමාරක් ජනතාව ජීවිත පූජා කර තිබෙනවා. මේ කැපකිරීම් වලින් පස්සේ අපිට දේශපාලන විසඳුමක් කියන්නේ ඒකීය රාජ්‍ය ප්‍රතික්ෂේප කරන, විශේෂයෙන්ම 2016 ඉඳන් හදන ආණ්ඩුක්‍රම ව්‍යවස්ථාව අපිට කවදාවත් පිළිගන්න බෑ. අපේ ජාතිය, අපේ ස්වෛරීභාවය, ස්වයං නිර්ණ අයිතිය, පිළිගත් සමාජ ගිවිසුමක් ලිවිය යුතුයි. ඒ ගිවිසුම දෙමළ දේශය සහ ස්වෛරීභාවය පිළිගත යුතුය.”
දෙමළ ජාතික ජනතා පෙරමුණේ ප්‍රධාන ලේකම් සෙල්වරාසා ගජේන්ද්‍රන් ඒ බව කියා සිටියේ චන්ද්‍රිකා බණ්ඩාරනායක කුමාරතුංග පාලන සමයේ අගනගරයේදී 25 වසරකට පෙර වෙඩි තබා ඝාතනය කරන ලද කීර්තිමත් අධිනීතිඥ හා සමස්ත ලංකා දෙමළ කොන්ග්‍රසයේ හිටපු නායක කුමාර් පොන්නම්බලම්ගේ ගුණානුස්මරණ සභාව යාපනයේ දී අමතමිනි.
මෛත්‍රී-රනිල් පාලන සමයේ කෙටුම්පත් කළ ඒකීය රාජ්‍යයත් බුද්ධාගමට ප්‍රමුඛස්ථානයත් සුරකින ව්‍යවස්ථාව ශ්‍රී ලංකාවේ අලුත් ආණ්ඩු ක්‍රම ව්‍යවස්ථාව ලෙස සම්මත කරගැනීමේ අභිලාෂය අනුර කුමාර දිසානායක ජනාධිපතිවරයාගේ රජය වෙතින් මේ වනවිට පලවී ඇත.
ජනවාරි 5 වැනි ඉරිදා යාපනයේ කලෙයිතුදු ශාලවේ පැවැති කුමාර් පොන්නම්බලම් 25 වැනි ගුණ අනුස්මරණයේ දී දෙමළ ජාතික ජනතා පෙරමුණේ ප්‍රධාන ලේකම්, හිටපු පාර්ලිමේන්තු මන්ත්‍රී සෙල්වරාසා ගජේන්ද්‍රන් වැඩි දුරටත් කියා සිටියේ දෙමළ ජනතාවගේ අයිතිවාසිකම් දිනා ගැනීම වෙනුවෙන් දකුනේ ආණ්ඩුවට කල් දී බලා සිටීම මෝඩකමක් බවයි.
“සිංහල, බෞද්ධ ස්වෝත්තමවාදය තමන්ටම වලක් හාරලා, දුෂණය කරලා, වංචා කරලා, බලය අවභාවිත කරලා, ආර්ථික අර්බුදයකට වැටිලා තියන මේ තත්වය තුළ මේ වැටුනු තැනම තියාගෙන පුළුවන් තරම් බරපතල පීඩනයක් දුන්නොත් විතරයි දෙමළ ජනතාව එක්ක ඒකාබද්ධව ගමන් කරන්න ඕන, ශ්‍රී ලංකාව තුළ ස්ථාවරත්වයක් ඇති කරන්න ඕන කියලා එයාලාට අයිතිවාසිකම් දෙන්න ඕන කියලා හිතන්නේ. නැතිනම් එයාලා ආර්ථිකය ශක්තිමත් කර ගත්තොත් දෙමළ ජනතාවට ජීවිතයේ කවදාවත් අයිතිවාසිකම් ලැබෙන්නේ නැහැ. ඒ නිසා අපි ඒ අයට කාලය දෙන්න හිතුවොත් ඒක මෝඩකමක්. ”
ස්වයං නිර්ණය මත පදනම් වූ දේශපාලන විසඳුමක් ලබා ගැනීම සදහා දෙමළ ජනයා ඒකරාශි කරමින් ප්‍රජාතන්ත්‍රවාදී දේශපාලන ව්‍යාපාරයක් වේගයෙන් ගොඩනැගීමේ අවශ්‍යතාවයත් හිටපු මන්ත්‍රීවරයා එහිදී පෙන්වා දී තිබුනි.
“කොපමණ බැරැරුම් ලෙස ජනතාව එක්රැස් කරලා අපගේ අයිතීන් ඕන කියන ප්‍රජාතන්ත්‍රවාදී දේශපාලන ව්‍යාපාරයක් පුළුවන් තරම් වේගයෙන් ගොඩ ගන්න පුළුවන්නම් ඒක තමයි අපේ විමුක්තිය, අපිට වේගවත් කළ හැකි අවස්ථාවක් වෙන්නේ. මේ අයිතිවාසිකම් ලබා දිය යුතුයි. අපේ දේශය ස්වෛරීභාවය සහ ස්වයං නිර්ණය මත පදනම් වූ දේශපාලන විසඳුමක් අපිට ඕන. ඒ ව්‍යවස්ථාව අපිට අවශ්‍ය පදනම මත ගෙන ආ යුතුයි. ඒ පිඩනය දේශය සහ ජාත්‍යන්තර මට්ටමේ ඇති කරන්න අපි එක්ව කටයුතු කළ යුතුයි.”
කුමාර් පොන්නම්බලම් 25 වැනි ගුණ අනුස්මරණය ආරම්භ කරමින් පහන් සිළු දල්වා තිබුනේ ඔහුගේ පුත් දෙමළ ජාතික ජනතා පෙරමුණේ (TNPF) නායක පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් විසිනි. අනුස්මරණයේ ප්‍රධාන ආරාධිත දේශනය යාපනය විශ්ව විද්‍යාලයේ කලා පිඨාධිපති මහාචාර්ය සිව සුබ්‍රමනියම් රගුරාම් විසින් පවත්වා තිබුනේ ‘ජන ගත කළ යුතු දේශපාලනය’ මාතෘකාව පදනම් කරගනිමිනි.
කුමාර් පොන්නම්බලම් 25 වැනි ගුණ අනුස්මරණ සභාව අමතමින් දෙමළ ජාතික ජනතා පෙරමුණේ (TNPF) නීතිඥ කනගරත්නම් සුගාස් සදහන් කළේ කුමාර් පොන්නම්බලම් තමන් පෙනී සිටි බලය බෙදීම සම්බන්ධයෙන් ස්ථාවරය දකුණේ ද පැවසීමටද බිය නොවු නායකයකු ලෙසයි.
“බලය බෙදීම කියන්නේ එකක්, බලය විමධ්‍යගතකරණය කියන්නේ තව එකක් කියලා කුමාර් පොන්නම්බලම් පැහැදිලි අදහසක හිටියා. දෙමළ ජනතාව වශයෙන් අප ඉල්ලා සිටින්නේ බලය බෙදා ගැනීම මිස විමධ්‍යගත කිරීමක් නොවන බව ඔහු පැහැදිලි කළා. දෙමළ ජාතිකයන්ට විතරක් නෙමෙයි ඔහු සිංහ ගුහාවේ හිටගෙනත් දැඩිව කිව්වා.”
රටේ පැවැති ආණ්ඩුක්‍රම ව්‍යවස්ථාවට අනුව දෙමළ ජනතාවට යුක්තිය ඉටු නොවන බව කීර්තිමත් නීතිඥයකු වු කුමාර් පොන්නම්බලම් පැහැදිලිව ලෙසම තේරුම් ගෙන සිටි බවයි නීතිඥ කනගරත්නම් සුගාස් එහිදි වැඩි දුරටත් පවසා තිබුනේ.
“බොහෝ නීතීඥයන් සහ ජනාධිපති නීතීඥයන් කරන වැරැද්ද නම්, ඔවුන් ඉගෙන ගත් මූලධර්ම තුළ, තමන් උගත් මතවාදය තුළ, ඉගෙන ගත් ශ්‍රී ලංකාවේ ඒකීය දේශපාලන ව්‍යවස්ථාව තුළ දෙමළ ජනයාට විසඳුමක් සෙවීමයි. කුමාර් පොන්නම්බලම් ඒ වැරැද්ද කළේ නැහැ. තමන් හැදෑරූ ශ්‍රී ලංකා නීතියේ, තමන් හැදෑරූ ශ්‍රී ලංකාවේ ආණ්ඩුක්‍රම ව්‍යවස්ථාවේ හෝ ඔහු වැඩ කළ අධිකරණ පද්ධතිය තුළ දෙමළ ජනතාවට යුක්තිය හෝ විසඳුමක් නොමැති බව ඔහු ඉතා පැහැදිලිව තේරුම් ගෙන සිටියා.”
විසිපස් වසරකට ඉහතදී චන්ද්‍රිකා බණ්ඩාරනායක කුමාරතුංග පාලන සමයේ අගනුවරදී ඝාතනය කරන ලද සමස්ත ලංකා දෙමළ කොන්ග්‍රසයේ හිටපු නායක කුමාර් පොන්නම්බලම් අධිනීතිඥවරයා සිහිපත් කරමින් යාපනයේ පැවැති අනුස්මරණයට ඉලංගෙයි තමිල් අරසු කච්චි (ITAK) නායක, පාර්ලිමේන්තු මන්ත්‍රී සිවඥානම් ශ්‍රී ධරන් මෙන්ම දෙමළ ජන මාධ්‍ය ආයතන වල අධ්‍යක්ෂකවරුන් සහ සංස්කාරකවරු කිහිප දෙනකුද එක්ව සිටි බවයි පළාත් බද වාර්තාකරුවන් පවසන්නේ.
මරා දමා ගෙවී ගිය විසි පස් වසර තුළ කුමාර් පොන්නම්බලම් අධිනීතිඥවරයාට යුක්තිය ඉටු වී නොමැති සේම ‘කඩිනමින් පරීක්ෂණ අවසන් කළ හැකි’ බවට රජය විසින් තෝරාගෙන ඇති කල්ගිය නඩු හතට 2000 වසරේ ජනවාරි 5 වැනිදා වැල්ලවත්ත, රාමක්‍රිෂ්ණන් පාරේදී වෙඩි තබා නිහඩ කෙරුණු කුමාර් පොන්නම්බලම්ගේ ඝාතනය ඇතුලත් වී නැත.
Facebook Comments
