කඳුකර දෙමළ ජනතාව වෙනුවෙන් සටන් වැදීමට උතුරට ආරාධනයක්

වර්ග සංහාරය සහ වර්ග විනාශය උතුරේ දෙමළ ජනයාට පමණක් සීමා නොවුවක් බව පෙන්වා දෙන වතුකරයේ ජනයාගේ අයිතීන් වෙනුවෙන් සටන් වදින පියනමක් කඳුකර දෙමළ ජනයාගේ අයිතීන් දිනා ගැනීම සදහා උතුරේ දෙමළ ජනයාගේ සහයෝගය ඉල්ලා තිබේ.

“වර්ග සංහාරය හා වර්ග විනාශය යන වදන් අතර උතුරත් කඳුකරයත් එකට ගමන් කළ යුතු කාලය එළැඹ තියනවා. මම ඔයාලට ආරාධනා කරනවා.”

කඳුකර ජනයා රැකගැනීමේ ව්‍යාපාරයේ උපදේශක මාරිමුත්තු සතිවේල් පියතුමා මැයි 28 වැනිදා එම ඉල්ලීම සිදු කළේ වතු කම්කරුවන් මෙරටට රැගෙන විත් වසර 200 ක් සම්පුර්ණවීම නිමිත්තෙන් යාපනය වීරසිංහම් ශාලාවේ පැවැති උත්සව සභාවක් අමතමිනි.

ග්‍රාමීය කම්කරු සංගමය විසින් සංවිධානය කර තිබු ඒම උත්සවයේදී මාරිමුත්තු සතිවේල් පියතුමා අවධාරණය කළේ දෙමළ වර්ග සංහාරය සහ විනාශය උතුරට පමණක් සීමා නොවුවක් බවයි.

1964 වසරේදී ඉන්දියානු අගමැති ලාල් බහදූර් ශාස්ත්‍රී සමග සිරිමාවෝ බණ්ඩාරනායක අගමැතිනිය එළඹි සම්මුතිය ද කඳුකරයේ වර්ග සංහාරය සදහා නිදසුනක් ලෙස පියතුමා පෙන්වා දෙයි.

බ්‍රිතාන්‍ය යටත් විජිත යුගයේ දී තේ සහ රබර් වතුවල වැඩ කිරීම සඳහා ගෙනෙන ලද ඉන්දියානු සම්භවයෙන් යුත් මිලියනයක් පමණ දෙමළ පිරිසගේ පුරවැසිභාවය ගැන ඉන්දියානු අගමැති ලාල් බහදූර් ශාස්ත්‍රී සමග සම්මුතියකට එළැඹීමට බණ්ඩාරනායක අගමැතිනිය කටයුතු කළාය.

ඇය 1964 වසරේ ඔක්තෝබර් මාසයේ දී ඉන්දියාවට ගිය අවස්ථාවේ දී සිරිමා-ශාස්ත්‍රී ගිවිසුමට අත්සන් තබන ලදී.

ඒ අනුව 525,000ක පිරිස ඉන්දියාවට ආපසු යැවීමට ද, 300,000කට ලංකාවේ පුරවැසිභාවය පිරිනැමීමට ද එකඟත්වය පළ විය.

කඳුකර ජනයා රැකගැනීමේ ව්‍යාපාරයේ උපදේශක මාරිමුත්තු සතිවේල් පියතුමා පෙන්වා දෙන්නේ එම ගිවිසුම නිසා එකම පවුලේ සාමාජිකයන්ට සිය සමීපතමයන්ගෙන් වෙන් වී රටවල් දෙකක් තුළ ජීවත් වීමට සිදු වු බවයි.

වතු කම්කරුවන්ගේ ඡන්ද අයිතිය අහිමි කිරීම හා 1983 වසරේ සිදුවු කලු ජුලිය ද වර්ග සංහාරයේම අවස්ථා බව පෙන්වා දෙන මාරිමුත්තු සතිවේල් පියතුමා ප්‍රශ්න කරන්නේ කඳුකර ජනතාව ද ජාතියක් ලෙස පිළිගත යුතු බව 1960 වසරේදීම ඉලංගෙයි තමිල් අරසු කච්චි පැවසුවත් එම ඉල්ලීමට සිදු වූයේ කුමක්ද? යන්නයි.

“එකට ගමන් කරන්න බැරි උනේ ඇයි?” ඔහු තව දුරටත් විමසා සිටි.

උතුරේ පමණක් නොව කඳුකරයේ ද දේශපාලනඥයන් ද ජනතාව වෙනුවෙන් දේශපාලනය නොකරන බවට චෝදනා කළ පියතුමා රැස්ව සිටි ජනයාගෙන් ඉල්ලා සිටියේ තම ඉල්ලීම ජනතා ව්‍යාපාරයක් බවට පත් කළ යුතු බවයි.

“උතුරේ පමණක් නෙමෙයි කඳුකරයේ ද දේශපාලනඥයන් දේශපාලනය කරන්නේ ජනතාව වෙනුවෙන් නෙමෙයි. බටහිර රටවල් වලට අවශ්‍ය දේශපාලනය තමයි ඔවුන් කරමින් ඉන්නේ. ඒ නිසා අපි අද ආරම්භ කළ මේ ගමන ජනතා ව්‍යාපාරයක් බවට පත් කළ යුතුයි.”

2023 වසරට වතු කම්කරුවන් මෙරටට රැගෙන විත් වසර 200 ක් සම්පුර්ණ වුවද කඳුකර දෙමළ ජනයාගේ ජිවිත යහපත් කිරීමට කිසිදු ආණ්ඩුවක් මේ දක්වා නිසි පියවර ගෙන නොමැත.

දරිද්‍රතා දර්ශකයන්ට අනුව සියයට 51 ක ප්‍රමාණයක් හමුවන්නේ වතු කරයෙනි.

නාගරිකයන් අතරින් සියයට 43 ක් ද, ගැමියන් අතරින් සියයට 33 ක් ද, දරිද්‍රතාවෙන් පෙළෙන බවට සංඛ්‍යා ලේඛන මගින් පෙන්නුම් කර තිබේ.

ඒ අනුව දරිද්‍රතාවයෙන් පෙළෙන සියයට 51 ක්වූ වැඩි ජන කොටසක් වාර්තා වනුයේ වතු කම්කරු ජිවිත ඇසුරින් බවට රටේ ආහාර අර්බුදය ගැන ගෘහ මට්ටමේ සමීක්ෂණවලදී සනාථ වූ බව නූතන වහල්භාවය පිළිබඳ එක්සත් ජාතීන්ගේ විශේෂ වාර්තාකරු ටොමෝයා ඔබෝකාටා සඳහන් කර තිබුණි.

එක්සත් ජාතීන්ගේ ආහාර හා කෘෂිකර්ම සංවිධානයේ සහ ලෝක ආහාර සංවිධානයේ විශේෂ ඒකාබද්ධ වාර්තාව වූ ශ්‍රී ලංකාවේ ආහාර අර්බුදය ගැන තක්සේරුව, ලෝක ආහාර සංවිධානයේ අධීක්ෂණ වාර්තාව, ශ්‍රී ලංකා හා ජාත්‍යන්තර රතු කුරුස සංවිධානයේ ආර්ථික සමාලෝචනය සහ නූතන වහල්භාවය පිළිබඳ එක්සත් ජාතීන්ගේ විශේෂ වාර්තාකරු ටොමෝයා ඔබෝකාටා මානව හිමිකම් කොමිෂන් සභාවට ඉදිරිපත් කළ වාර්තාව ඇතුළු ජාත්‍යන්තර සංවිධාන හතරක් මගින් වතු කම්කරුවන් මුහුණ දී තිබෙන දුෂ්කර තත්වය පෙන්නුම් කර තිබේ.