මහනුවර සහ තදාසන්න ප්‍රදේශවල පදිංචි මුස්ලිම් ජනයා ඉලක්ක කරමින්, රාජ්‍ය අනුග්‍රහය ලත් සිංහල බෞද්ධ මැර කණ්ඩායම් විසින් සත් වසරකට එපිටදී මුදාහල ප්‍රචණ්ඩ ක්‍රියා සම්බන්ධ විමර්ශන වාර්තාව ප්‍රකාශයට පත් කිරීම ශ්‍රි ලංකා මානව හිමිකම් කොමිසම විසින් තවදුරටත් දිනෙන් දින කල් දමමින් සිටී.
ගෙවුණු වසරේදි පමණක් අවස්ථා දෙකකදීම කොමිසමේ ඉහළ නිලධාරින් විසින් වින්දිතයන් සහ මාධ්‍ය හමුවේ පවසා තිබුණේ ඉදිරි මාස කිහිපය තුළදි අදාල විමර්ශන වාර්තාව ප්‍රකාශයට පත් කරන බවයි.
විමර්ශන වාර්තාවට බාලගිරි දෝශය
කන්ද උඩරට මුස්ලිම්වරුන්ට එරෙහිව මුදා හැරුණු ප්‍රචණ්ඩ ක්‍රියාවන්ට රාජ්‍ය අනුග්‍රහය ලත් දේශපාලන මැර කණ්ඩායම් සහ ආරක්ෂක අංශ සම්බන්ධව සිටි බවට විශ්වසනීය තොරතුරු මූලාශ්‍ර මත පදනම්ව පසුගිය වසරේ ජූලී මාසයේ දී එළි දැක්වුණු “කන්ද උඩරට මුස්ලිම් විරෝධි කැරැල්ලට වසර 6 යි: යුක්තිය කෝ?” වාර්තා චිත්‍රපටියෙන් අනතුරුව ශ්‍රි ලංකා මානව හිමිකම් කොමිසමේ කොමසාරිස් ආචාර්ය ගෙහාන් ගුණතිලක මාධ්‍ය හමුවේ පවසා තිබුණේ ඉදිරි මාස කිහිපය ඇතුළත අදාල වාර්තාව ප්‍රසිද්ධ කරන බවකි. නමුත් වසර ගෙවුණු තැන යළි දෙසැම්බරයේදී ප්‍රදේශයේ ජනමාධ්‍යවේදියකු වන එම්.අයි.එම් මුසාදික් විසින් ලිඛිතව කරනු ලැබු විමසුමකට පිළිතුරු ලෙස කොමිසම පවසා ඇත්තේ එළැඹෙන 2025 ජනවාරි මාසයේදී වාර්තාව ප්‍රසිද්ධ කිරීමට කටයුතු කරනා බවයි.
සත් වසරක් තිස්සේ වසන් කරන සාක්ෂි
මහනුවර සහ ඒ ආශ්‍රිත ප්‍රදේශවල මුස්ලිම් ජනයාට එරෙහිව මුදා හැරුණු ප්‍රචණ්ඩ ක්‍රියාවලින් අනතුරුව එවකට කොමිසමේ සිටි සභාපතිනිය වූ ආචාර්ය දීපිකා උඩගමගේ ගේ ප්‍රධානත්වයෙන් යුත් ඉහළ පෙළේ විමර්ශන කණ්ඩායමක් ප්‍රදේශයේ මුස්ලිම් ජනයාද ඇතුළු විවිධ පාර්ශව මහනුවර තැපැල් සංකීර්ණ ශ්‍රවණාගාරයට කැඳවමින් සාක්ෂි ලබා ගෙන තිබුණේ වින්දිතයන්ට යුක්තිය ඉටු කර දෙන බව පවසමිනි.
ප්‍රදේශයේ මුස්ලිම් ජනයාට ශාරීරිකව සහ මානසිකව අඩන්තේට්ටම් කළ, ඔවුන්ගේ නිවාස සහ ව්‍යාපාරික ස්ථානද ඇතළු දේපල ගිනි තබා විනාශ කළ මැර කණ්ඩායම් පිළිබඳවත්, එම මැර කණ්ඩායම්වලට ආරක්ෂාව සහ රැකවරණය දුන් පොලිස් විශේෂ කාර්ය බලකායද ඇතුළු ආරක්ෂක සේනා පිළිබඳවත් අදාළ සාක්ෂි විමසීමේදි කොමිසම හමුවේ ලිඛිත, වාචික මෙන්ම ඡායාරූප සහ වීඩියෝ සාක්ෂි ද ලබා දී තිබුණු බව වින්දිත මුස්ලිම් ජනයාද ඇතුළු මැදහත් පාර්ශව අවධාරණය කරයි. ආචාර්ය දීපිකා උඩගමගේ ගේ පාලන සමයේ දී පමණක් විවිධ කාල වකවානු දක්වමින් කිහිප අවස්ථාවකදීම කොමිසම මාධ්‍ය වෙත පවසන ලද්දේ විමර්ශන වාර්තාව “ඉදිරියේදී” ප්‍රකාශයට පත් කරන බවකි.
මහාචාර්ය උඩගමගේ ට පසුව විශ්‍රාමික විනිසුරු රෝහිණි මාරසිංහ කොමිසමේ සභාපතිත්වයට පත් වූ අතර ඇයගේ දෙවසකර පාලන කාලය තුළ දී හෝ පවා අදාළ විමර්ශන වාර්තාව ප්‍රසිද්ධියට පත් කිරීමේ පමාව පිළිබඳව කිසිදු නිශ්චිත පැහැදිලි කිරීමක් නොකරන ලදි . වර්තමාන සභාපති ශ්‍රේෂ්ඨාධිකරණයේ විශ්‍රාමික විනිසුරු එල්.ටී.බී දෙහිදෙණිය යටතේ එය ප්‍රකාශයට පත් කරන බව කොමිසමේ ඉහළ නිලධාරින් විසින් පවසා තිබුණ ද මේ දක්වා එසේ සිදුකර නොමැත.
මුස්ලිම්වරුන්ට නැති අනෙකුත් අයට ඇති හිමිකම්
මහනුවර මුස්ලිම් විරෝධි ප්‍රචණ්ඩ ක්‍රියා පිළිබඳ මානව හිමිකම් කොමිසමේ විමර්ශන වාර්තාව හත් අවුරුද්දක් තිස්සේ ප්‍රකාශයට පත් නොකර සිටීමට හේතු ලෙස කොමිසමේ ඉහළ නිලධාරින් විටෙන් විට නොයෙක් හේතු දක්වා සිටි අතර, එයින් බොහෝමයක් වූයේ තාක්ෂණික කාරණාවන්ය. සංස්කරණ දෝශ නිවැරදි කිරීම්, ත්‍රෛ භාෂාවෙන් එක්වැරම ප්‍රකාශයට පත් කිරීමේ සැලසුම, වරින් වර පත් වූ සභාපතිවරුන් සහ කොමසාරිස් මණ්ඩලය විසින් අදාල වාර්තාව නැවත සමාලෝචනය කිරීම ආදිය ඒ අතරින් ප්‍රධාන විය. නමුත් ගෙවුණු සත් වසරක කාල සීමාව පුරා මානව හිමිකම් කොමිසම විසින් විවිධ ආකාරයේ වාර්තා කිහිපයක්ම ප්‍රකාශයට පත් කරන ලදී. එයින් බොහෝමයක් සිද්ධි අධ්‍යයන සහ ස්ථානීය විමර්ශන මත පදනම්ව සකස් කරන ලද ඒවාය. නමුත් පුදුම සහගත තත්වය නම් ඒ කිසිදු වාර්තාවට බල නොපෑ තාක්ෂණික සහ පරිපාලන ගැටලු ගණනාවක් කන්ද උඩරට මුස්ලිම්වරුන්ට එරෙහි ප්‍රචණ්ඩ ප්‍රහාරයේ විමර්ශන වාර්තාවට පමණක් බලපෑමය.
වාර්තාව යට ගසන්නේ ආරක්ෂක අංශ සහ ඉහළ දේශපාලන සබඳතාවන් රකින්නද?
2018 මාර්තුවේ දින කිහිපයක් තිස්සේ ක්‍රියාත්මක වුණු ප්‍රචණ්ඩ ක්‍රියා පොලිස් විශේෂ කාර්ය බලකායේ රැකවරණය සහිතව සිදුකරනු ලැබුවේ දේශපාලන අනුග්‍රහය ලත් මැරවරයන්, මහසෝන් බලකාය වැනි සිංහල ජාතිවාදී සංවිධාන සහ පිටස්තරින් කැඳවා ගත සංවිධානාත්මක පිරිස් විසින් යැයි පසුව සාක්ෂි සහිතව පාර්ලීමේන්තුව හමුවේද හෙළිදරවු වුණි. එමෙන්ම ප්‍රචණ්ඩ ක්‍රියා මැඩලීම සඳහා පොලීසිය සහ ආරක්ෂක අංශ සැලකිය යුතු කාර්යභාරයක් ඉටු නොකළ බව පාර්ලීමේන්තු කමිටු වාර්තාවල පවා ලියැවී තිබේ.
හිටපු කතානායක කරු ජයසූරියගේ ප්‍රධානත්වයෙන් යුතුව 2019 දී පිහිටුවනු ලැබු “ශ්‍රි ලංකාවේ ජාතික හා ආගමික සහජීවනය සහතික කිරීම පිණිස” නම් පාර්ලීමේන්තු විශේෂ තාරක සභා වාර්තාවේ මුස්ලිම් විරෝධි ප්‍රචණ්ඩ ක්‍රියා පිළිබඳව මෙසේ දැක්වෙයි.
” කළුතර, ගාල්ල, අම්පාර සහ මහනුවර දිස්ත්‍රික්කවල මෑතකදි උද්ගත වූ සිදුවීම්වලට අදාළව නීතිය ක්‍රියාත්මක කිරීමේදි පොලිස් දෙපාර්තමේන්තුව සිදුකර ඇති සමාව දිය නොහැකි තරමේ ප්‍රමාදය මෙන්ම, ප්‍රචණ්ඩ ක්‍රියා සිදුකළ අයට එරෙහිව නඩු පැවරීමට නීතිපති දෙපාර්තමේන්තුව අසමත්ව තිබේ”.
මැර ක්‍රියා මෙහෙය වූවන්ට ඉහළ තනතුරු
ප්‍රචණ්ඩ ක්‍රියා සිදුවන බවට පෙර දැනුවත්ව සිටි බවටත්, ප්‍රහාරකයන් ආරක්ෂා කළ බවටත් චෝදනා එල්ල වුණු එවක මධ්‍යම පලාත භාරව සිටි ජ්‍යෙෂ්ට නියෝජ්‍ය පොලිස්පති එස්.එම් වික්‍රමසිංහ පසුව මහජන පැමිණිලි හා දුක් ගැනවිලි විමර්ශනය කිරීමේ ඔම්බුඩ්ස්මන්වරයා ලෙස පත් කෙරිනි. පසුව, ජනාධිපති ගෝඨාභය රාජපක්ෂ වීසින් 2022 මාර්තු 31 වන දින සිට එම වසරේම මැයි 15 අතර කාලය තුළ සිදුවු ” දිවයිනේ ගිනි තැබීම්, මංකොල්ලකෑම්, පුද්ගල ඝාතන ඇතුළු සියළු ආකරයේ දේපල හානී හා ජීවිත හානි පිළිබඳ විමර්ශන කිරීමේ ජනාධිපති කොමිසමේ” සමාජිකයකු ලෙසද ඔහු පත් කරන ලදි. එසේ පත් කරන ලද්දේ මහනුවර මුස්ලිම් විරෝධි ප්‍රහාරය මෙහෙයවන ලද පුද්ගලයන් සහ බෞද්ධ භික්ෂුන් විසින්ම අදාල ප්‍රහාරයට නියෝජ්‍ය පොලිස්පතිවරයාගේ ඇති සම්බන්ධය ප්‍රසිද්ධියේම කියා පාමින් සිටින විටකදිය.
දිගන ප්‍රහාරය පිළිබඳ මානව හිමිකම් කොමිසම් විමර්ශනයේ එලි නොබසින වාර්තාව ගැන වසරකට ඉහතදී තිරගත කෙරුණු වාර්තා චිත්‍රපටය මෙතනින් නරඹන්න,
Facebook Comments
