මියගිය අයෙක් වෙනුවෙන් පහනක් දැල්වීම හෝ සිහිකිරීමට ඕනම කෙනෙකුට අයිතියක් පවතින බව මෙන්ම එය රටේ ජාතික ආරක්ෂාවට තර්ජනයක් නොවන බවයි අමාත්‍ය, ෆීල්ඩ් මාර්ෂල් සරත් ෆොන්සේකා පවසන්නේ.
ශිවාජිලිංගම් යනු ප්‍රභාකරන්ගේ ලේ ඥාතියෙකු බව කියා තිබුණු නමුත් යුද මෙහෙයුම් සිදුවන කාලයේ එහෙව් හඳුනාගැනීමක් නොතිබුණු බව පවසන අමාත්‍යවරයා ඕනම කෙනෙකුට යුද්ධයෙන් මිය ගිය තම ඥාතීන් සිහිපත් කිරීමට බාධාවක් නොවන බවද සඳහන් කළේය.
එම්.කේ ශිවාජිලිංගම් විසින් වෙල්ලමුල්ලවයික්කාල් ප්‍රදේශයේ යුද්ධයෙන් මිය ගිය ඥාතීන් සිහිකිරීමේ වැඩසටහනක් පැවැත්වීම සම්බන්ධයෙන් මාධ්‍යවේදියෙකු විසින් අසන ලද ප්‍රශ්නයට ප්‍රතිචාර දක්වමින් අමාත්‍ය සරත් ෆොන්සේකා මේ බව පැවසීය.
උතුරු පළාත් ප්‍රධාන අමාත්‍ය සී.වී. විග්නේෂ්වරන්ගේ ප්‍රධානත්වයෙන් යුද්ධයේදී මියගිය අයවලුන් සැමරීමේ සතියේ අවසන් සැමරුම් වැඩසටහන අද(18) පෙරවරුවේ මුලතිව් මුල්ලිවයික්කාල් වෙරළ තීරයේදී සිදුකිරීමට නියමිතව තිබේ.
මෙහිදී යුද්ධයෙන් මියගිය දෙමළ ජනතාවගේ නම් කෙටු ශිලා පුවරුවකින් යුත් සිහිවටනයක් මුල්ලිවයික්කාල් මුහුදු තීරයේ යුධ සැමරුම අසළ ස්මාරකයක් වශයෙන් තැන්පත් කිරීමට ද සැළසුම් කර ඇති බවයි සංවිධායකයින් පවසන්නේ.
Facebook Comments
