මාධ්‍යවේදීන්ගේ සුබ සාධනය වෙනුවෙන් විශේෂ අවධානය යොමු කරන බව මුදල් හා ජනමාධ්‍යය ඇමැති මංගල සමරවීර පවසයි.
තමන් ජනමාධ්‍ය අමාත්‍යාංශය මීට පෙර හෙබවූ අවස්ථාවේද මාධ්‍යවේදීන් වෙනුවෙන් නිවාස යෝජනා ක්‍රමයක් පවා ක්‍රියාත්මක කළ බව කී ඇමතිවරයා නවීන තත්ත්වයන්ට ගැළපෙන අයුරින් මාධ්‍යවේදීන් සඳහා විශේෂ සුබ සාධන වැඩපිළිවෙළක් ක්‍රියාත්මක කරන බව සඳහන් කළේය.
මල්වතු මහනායක හිමියන් බැහැදැක ආශීර්වාද ලබා ගැනීමෙන් පසු මාධ්‍ය හමුවේ අදහස් දක්වමින් 24 සෙනසුරාදා ඇමැතිවරයා මේ බව පැවසුහ.
යල්පැන ගිය සුරාබදු නීතී ප්‍රතිසංස්කරණය කළ යුතුව තිබෙන බවත් රජය අපේක්ෂා කරන දේ මෙම නීති මගින් ඒ ආකාරයෙන්ම ලැබෙනවාද යන්න ප්‍රශ්නයක් බව පැවසු ඇමතිවරයා මෙරට මත්පැන් පානය කරන පිරිස අතරින් 61 % ක් පානය කරන්නේ කසිප්පු ඇතුළු ප්‍රමිතියෙන් තොර නීති විරෝධී මත්පැන් බවද අවධාරණය කළේය.
මෙම තත්ත්වය වෙනස් කරන්නේ කෙසේද යන්න පිළිබඳව රජයේ අවධානය යොමුව තිබෙන බව සහ ඒ සඳහා කමිටු කිහිපයක් පත්කර තිබෙන බවත් හෙතෙම කීය.
බියර් හා වයින් සඳහා නව බලපත්‍ර ක්‍රමයක් හඳුන්වා දෙනවාද නැද්ද පිළිබඳව ඉදිරියේදී තීන්දුවක් ගන්නා බවද ඇමැතිවරයා කීවේය.
Facebook Comments
