හිටපු මුදල් ඇමැතිවරයාට එරෙහි විශ්වාස භංග යෝජනාවට එජාපයේ සහාය ලැබෙනු ඇති බවට ඒකාබද්ධ විපක්ෂය විශ්වාසය පල කරයි.
ඒකාබද්ධ විපක්ෂයේ මන්ත්‍රීන් තිස් දෙනෙකුට වැඩි පිරිසකගේ අත්සනින් යුත් විශ්වාස භංග යෝජනාව 03 බ්‍රහස්පතින්දා පාර්ලිමේන්තු නියෝජ්‍ය මහලේකම් නීල් ඉද්දවෙල වෙත බාර දී ඇත.
මුදල් විශුද්ධිකරනය සහ මුදල් ගණුදෙනු වාර්තා කිරිමේ පනත් උල්ලංඝනය කිරීම, අර්ජුන් ඇලෝසියස් ආරක්ෂා කිරීම, අයථා අර්ථික ප්‍රතිලාභ භුක්ති විදීම මෙන්ම විශාල මුල්‍ය ගණුදෙනු වලට සහභාගී වීම හේතුවෙන් රවී කරුණානායක අමාත්‍යවරයා කෙරෙහි පාර්ලිමේන්තුවේ විශ්වාසය කඩ වී ඇතැයි එම යෝජනාවේ සඳහන්ව තිබේ.
අමත්‍යවරයා තවදුරටත් ඇමති ධුරයක් දැරිම ජාතික ආර්ථිකයේ ගෞරවයට සහ කීර්ති නාමයට හානියක් බැවින් වත්මන් විදේශ ඇමතිවරයා සියලු අමාත්‍ය ධුර වලින් වහා ඉල්ලා අස්විය යුතු බව ඒකාබද්ධය විපක්ෂය සිය විශ්වාස භංගය හරහා යෝජනා කරයි.
ඒකාබද්ධ විපක්ෂයට අමතරව ශ්‍රී ලංකා නිදහස් පක්ෂය, ජනතා විමුක්ති පෙරමුණ මෙන්ම එක්සත් ජාතික පක්ෂයේ ඇතැම් මැති ඇමැතිවරුන් සිය විශ්වාස භංග යෝජනවාට සහාය පල කරනු ඇතැයි බන්ධුල ගුණවර්ධන මන්ත්‍රීවරයා පැවසීය.
Facebook Comments
