පාර්ලිමේන්තුවට බෝම්බ ගැසීමට විමල් වීරවංශ කර ඇති තර්ජනය සම්බන්ධයෙන් කතානායකවරයා සිය අවධානය යොමු කරන බව දැනුම් දෙද්දි මන්ත්‍රීවරයාගේ නායකත්වයෙන් යුත් පක්ෂය “තැති ගෙන” සිටී.
විමල් වීරවංශ මන්ත්‍රීවරයා පාර්ලිමේන්තුවට බෝම්බ ගැසීමට කරන ලද තර්ජනය ජාතික නිදහස් පෙරමුණේ මතය නොවන බව 25 බ්‍රහසපතින්දා එම පක්ෂයේ ජාතික සංවිධායක පියසිරි විජේනායක මාධ්‍ය හමුවකදී කියා සිටියේය.
වීරවංශ විසින් රචිත කෘතියක් එළි දැක්වීම සඳහා තුම්මුල්ලේ සම්බුද්ධ ජයන්ති මන්දිර ශ්‍රවණාගාරයේ පැවැති උළෙලක් අමතමින් “මෙතරම් භයානක ව්‍යවස්ථා කෙටුම්පතක් සම්මත කරන්නට යද්දී ඊට පක්‍ෂව අත ඔසවන්නේ නැතිව සිටින මන්ත්රීවරුන් 76 දෙනෙකු නැති පාර්ලිමේන්තුවකින් කොස් කොටන්නද ඊට පහුවෙනිදා පාර්ලිමේන්තුවට බෝම්බයක් දමා ඉවර කර දැමිය යුතු,” යි වීරවංශ මන්ත්‍රීවරයා ප්‍රකාශ කර තිබුණි.
එම ප්‍රකාශයෙන් “තමන් තැති ගැනිමට” පත් වු බව පවසන පියසිරි විජේනායක පක්ෂයේ මධ්‍යම කාරක සභාව රැස්වු විගස මේ ප්‍රකාශය සම්බන්ධයෙන් ජාතියෙන් සමාව ගත යුතු බවට යෝජනාවක් ඉදිරිපත් කරන බව වැඩි දුරටත් ප්‍රකාශ කළේය.
විමල්ට අසනීපයි
මේ අතර හදිසි රෝගී තත්ත්වයක් හේතුවෙන් විමල් වීරවංශ මන්ත්‍රීවරයා 24 අඟහරුවාදා පුද්ගලික රෝහලකට ඇතුල් කර තිබේ.
පාර්ලිමේන්තුවට බෝම්බ ගසන බවට පාර්ලිමේන්තු මන්ත්‍රී විමල් වීරවංශ කර ඇති ප්‍රකාශ සම්බන්ධව කතානායක කරු ජයසුරිය දැඩි අවධානය යොමු කර ඇති බව 24 අඟහරුවාදා රජය නිවේදනය කළේය.
එම ප්‍රකාශය සම්බන්ධව කතානායක කරු ජයසුරිය වෙත ආණ්ඩු පක්ෂයේත් විපක්ෂයේත් මන්ත්රීවරුන් ඇතුලු විවිධ පාර්ශව විසින් කරනු ලැබූ පැමිණිළි වලට ප්‍රතිචාර දක්මින් පාර්ලිමේන්තුව රැස් වූ විගසම සභාවේ අවධානයට ද යොමු කර, සුදුසු ඉදිරි පියවර ගැනීමට අපේක්ෂා කරන බව ඔහු දැනුම් දී තිබේ.
ප්‍රජාතන්ත්‍රවාදී පාලන ක්‍රමයේ කේන්ද්‍රස්ථානය වන පාර්ලිමේන්තුව පිළිබඳව පළ කර ඇති මෙම තර්ජනාත්මක ප්‍රකාශය කිසි ලෙසකින් හෝ සුළුවෙන් නොකතන ලෙස ද එම සෑම පාර්ශවයක් විසින්ම කතානායකවරයාගෙන් ඉල්ලීම් කර ඇති බව රජය පවසයි.
Facebook Comments
