යහපලන රජය පොරොන්චු වු පරිදි නව ව්‍යවස්ථාව වෙනස් නොකොට ජනාධිපතිවරණයකට යාම සඳහා ජනාධිපතිවරයා සැලසුම් කිරීම සම්බන්ධයෙන් ආණ්ඩුව පිහිටවීමට උර දුන් වාමාංශික නායකයෙක් සිය කනගාටුව පල කර තිබේ.
අලුතින් ව්‍යවස්ථාවක් සම්පාදනය කිරීම සඳහා දීපව්‍යාප්තව විමසන ලද සම්පිණ්ඩනය කොට භාර දී ඇති විද්වත් වාර්තාව පාර්ලිමේන්තුවේ සංවාදයට භාජන නොකර මැතිවරණ වලට සූදානම් වීම නව සමසමාජ නායකයා විසින් හඳුන්වන ලද්දේ ළාමක කටයුත්තක් ලෙසිනි.
“ඒකාධිපති ව්‍යවස්ථාව වෙනස් කරලා, බලය බෙදීම ශක්තිමත් කරලා, ප්‍රජාතන්ත්‍රවාදී මානව හිමිකම් රකින ව්‍යවස්ථාවක් හදනවා කියන එක තමයි ප්‍රධාන පොරොන්දුව වුනේ. ඒ පොරොන්දුව අමතක කරලා මේ විදියට කටයුතු කිරීම ලාමකයි,” යනුවෙන් ආචාර්ය වික්‍රමබාහු කරුණාරත්න කියා සිටියේය.
අවම වශයෙන් ජනතාව විමුක්ති පෙරමුණ විසින් යෝජනා කර ඇති විධායක ජනාධිපති ධුරය අවසන් කරන පනත හෝ සම්මත කර පාර්ලිමේන්තුව හරහා ජනාධිපතිවරයෙකු පත් කර ගැනීමට කටයුතු සලසා ගත යුතු බව කී නව සම සමාජ පක්ෂ නායක වික්‍රමබාහු කරුණාරත්න ආණ්ඩුවේ වෑයම පරාජය කිරීම සඳහා පෙළ ගැසෙන ලෙස ප්‍රජාතන්ත්‍රවාදී බලවේග වලට යෝජනා කළේය.
Facebook Comments
