පොලිස් විරෝධය නොතකමින් අධිකරණය අවසර යටතේ යාපනය මහනගර සභාවේ ප්රධානත්වයෙන් විමුක්ති කොටි සංවිධානයේ දේශපාලන නායකයකු අනුස්මරණය කර තිබේ.
දෙමළ අයිතිය වෙනුවෙන් උපවාසයක යෙදී සිටියදී මියගිය ත්යාගී දිලීපන් නමින් ප්රකට රාසයියා පාර්තීපන්ගේ සමාධිය අබියස සමරුවක් පැවැත්වීමට සහ සැරසිලි කිරීමට එරෙහිව යාපනය පොලිසිය අධිකරණයෙන් කළ ඉල්ලීම 25 අඟහරුවාදා අධිකරණය විසින් ප්රතික්ෂේප කිරීමෙන් අනතුරුව සමරුව පැවැත්වුනි.
එම ගුණානුස්මරණයට අවසර දීමෙන් යාපනයට පැමිණෙන සිංහල සංචාරකයන් බිය පත්වී, වාර්ගික හා ආගමික සංහිඳියාවට බාධා පැමිණෙනු ඇතැයි පොලිසිය අධිකරණයට කියා තිබුන අතර ත්රස්තවාදී සංවිධානයක සාමාජිකයකු සැමරීම නීති විරෝධී බවටද පොලිසිය අධිකරණයට කරුණු දක්වා ඇත.
සමරුව තහනම් කිරීමට කරන අද ඉල්ලීම ඉවත ලූ යාපනය මහේස්ත්රාත් සින්නතුරෙයි සදීස්කරන් දිලීපන් සැමරීමේ නීත්යානුකූල භාවය පිළිබඳ නඩු විභාගය ඔක්තෝබර් 29 දාට කල් දමා තිබේ.
ඉල්ලීම් පහක්
සිංහල හමුදා කඳවුරු දෙමළ පළාත් වලින් ඉවත් කර ගත යුතුයි, දෙමළ ජනතාවගේ පළාත්වල තාවකාලික දෙමළ ආණ්ඩුවක් නිර්මාණය කරනා තෙක් පුනුරුත්ථාපන වැඩ තාවකාලිකව අත්හිටවිය යුතුයි, දෙමළ ජනතාවට අයිති ගම් පළාත්වල සිංහලයන් පදිංචි කරවීම කරගෙන යාම නැවැත්විය යුතුයි, දෙමළ පළාත්වල සිංහල පොලිස් ස්ථාන පිහිටුවීම නතර කළ යුතුයි, ත්රස්තවාදය වැලැක්වීමේ පනත යටතේ පොලිස් ආරක්ෂක මූලස්ථාන වල සිටින දේශපාලන රැඳවුම්කරුවන් වහා නිදහස් කළ යුතුයි ආදී ඉල්ලිම් ඉදිරිපත් කරමින් 1987 සැප්තැම්බර් 15 වනදා දිලීපන් උපවාසයක් ආරම්භ කළේය.
උතුරු නැගෙනහිර පුරා සතියක් පැවති ගුණ සමරු මාලාව නිමාවට පත් වුනේ ලුතිනන් කර්නල් දිලීපන්ගේ 31 වැනි ගුණානුස්මරණය නල්ලූර් කන්දසාමි කෝවිල අබියස දිලීපන් සමාධිය අසලිනි.
සමරු සංවිධායකයන් වෙනුවෙන් අධිකරණයට කැඳවා තිබුනු යාපනය මහනගර සභා කොමසාරිස් එස් ජයසීලන් වෙනුවෙන් පෙනී සිටියේ දෙමළ ජාතික සංධාන මන්ත්රී එම් ඒ සුමන්දිරන්ය.
හින්දු බැතිමතුන් දේව නමස්කාරය සඳහා පමණක් යොදාගන්නා සිරුරේ කොකු ගසාගෙන සිදුකරන එල්ලුම් කාවඩි පූජාවක් තරුණයන් දෙදෙනකු විසින් එදින පැවැත්වීම මින් පෙර නොවූ විරූ උපහාරයක් ද පවත්වමිනි.
එකොලොස් දිනක් උපවාසිකව දිවි පිදූ දෙමළ නායකයා අනුස්මරණය කරමින් යාපනය විශ්ව විද්යාලයේ ද ගුණානුස්මරණයක් පවත්වා ඇත.
Facebook Comments
