කොකේන් ඇතුළු මත්ද්‍රව්‍ය භාවිතා කරන මැති ඇමැතිවරුන් සම්බන්ධව මාධ්‍යයට කී පරිදි රන්ජන් රාමානායක අමාත්‍යවරයා මෙතෙක් කිසිවෙකුට දැනුම් දී නොමැති බවට පාර්ලිමේන්තුවේදී හෙළිව තිබේ.
“ආණ්ඩු පක්ෂයේ පාර්ලිමේන්තු මන්ත්‍රීවරුන්ගේ රැස්වීමේදී මේ ප්‍රශ්නය ගැන දිර්ඝ වශයෙන් සාකච්ඡා කෙරුවා. හෙළිරව් වෙච්ච තොරතුරු අනුව අදාළ මන්ත්‍රීවරුන්ගේ නම් ගරු අගමැතිතුමාට හෙළි කරලත් නැහැ, කතානායකතුමාට හෙළි කරලත් නැහැ, පක්ෂයේ සභාපතිතුමාට හෙළි කරලත් නැහැ, CID එකට හෙලි කරලත් නැහැ කියන එක කණ්ඩායම් රැස්විමේදි අනාවරණය වුණා.” යැයි සභානායක ලක්ෂ්මන් කිරිඇල්ල පාර්ලිමේන්තුවට පැවසීය.
කොකේන් ඇතුළු මත්ද්‍රව්‍ය භාවිතා කරන ඇමැතිවරුන් හා පාර්ලිමේන්තු මන්ත්‍රීවරුන් 24 දෙනෙකු සම්බන්ධ තොරතුරු තමන් කථානායකවරයාට හා අපරාධ පරීක්ෂණ දෙපාර්තමේන්තුවට භාරදුන් බව මහාමාර්ග හා මාර්ග සංවර්ධන රාජ්‍ය අමාත්‍යවරයා 18 සඳුදා මාධ්‍ය වෙත පැවසීය.
මේ අතර කොකේන් ඇතුළු මත්ද්‍රව්‍ය භාවිතා කරන මැති ඇමතිවරුන් 24 දෙනෙකු පාර්ලිමේන්තුවේ සිටී නම් ඒ ගැන තමන්ට ලිඛිතව දැනුම් දෙන ලෙස කතානායක කරු ජයසූරිය රන්ජන් රාමානායක අමාත්‍යවරයාට දැනුම් දුන් බව මාධ්‍ය වාර්තා කර තිබුණි.
අමාත්‍යවරයා කොකේන් ඇතුළු මත්ද්‍රව්‍ය භාවිතා කරන මැති ඇමැතිවරුන් පිළිබඳව කතානායකවරයාට පසුගිය දිනෙක දුරකථනයෙන් දැනුම් දී ඇති නමුත් එය දුරකථනයෙන් නොව ලිඛිතව ලබාදෙන්නැයි කතානායකවරයා දැනුම් දී තිබු බවටයි එම මාධ්‍ය වාර්තා කර තිබුණේ.
කෙසේ වෙතත් රන්ජන් රාමානායක ඇමැතිවරයා ප්‍රකාශ කල පරිදි කොකේන් මත්ද්‍රව්‍ය භාවිතා කරන මැති ඇමැතිවරුන් සිටී දැයි සෙවීමට අග්‍රාමාත්‍ය රනිල් වික්‍රමසිංහ විශේෂ කමිටුවක් පත් කර ඇත.
අමාත්‍ය ලක්ෂ්මන් කිරිඇල්ලගේ ප්‍රධානත්වයෙන් යුත් කමිටුව සඳහා රාජ්‍ය අමාත්‍ය ඉරාන් වික්‍රමරත්න, පාර්ලිමේන්තු මන්ත්‍රී ආශු මාරසිංහ සහ එක්සත් ජාතික පක්ෂ විධායක කමිටු සාමාජික නිශ්ශංක නානායක්කාර පත් කර තිබේ.
Facebook Comments
