ජනාධිපති අපේක්ෂක සජිත් ප්‍රේමදාස හට සහාය දැක්වීමට එක්සත් වාමාංශික පෙරමුණ තීරණය කිරීම නිසා එහි ප්‍රධාන ලේකම් ලාල් විජේනායක පක්ෂයෙන් ඉවත් වී තිබේ.
ජනාධිපතිවරණයේදී සජිත් ප්‍රේමදාසට සහාය දැක්වීය යුතු බවට ජයම්පති වික්‍රමරත්න මන්ත්‍රීවරයා ප්‍රමුඛ කණ්ඩායමක් තීරණය කර තිබු අතර පක්ෂයේ ප්‍රධාන ලේකම් ලාල් විජේනායක ඇතුළු පිරිසක් අනුර කුමාර දිසානායක හා එක්විය යුතු යැයි යෝජනා කර තිබුනි.
කෙසේ වෙතත් මේ පිළිබඳව සාකච්ඡා කිරීමට 23 බදාදා එක්සත් වාමාංශික පෙරමුණේ මධ්‍යම කාරක සභාව රැස්වී ඇති අතර එහිදි බහුතර මතය වී ඇත්තේ හංසයා ලකුනින් තරග කරන සජිත් ප්‍රේමදාස හට සහාය දිය යුතු බවයි.
මේ මොහොතේ අවශ්‍යතාව වන්නේ ඉදිරියේදී ඇති විය හැකි ෆැසිස්ට්වාදී පාලනයට එරෙහි ගෝඨාභය රාජපක්ෂ පරාජය කිරීම බවයි මධ්‍ය කාරක සභා රැස්වීමේදී සජිත් ප්‍රේමදාසට සහාය දක්වන ජයම්පති වික්‍රමරත්න හා චමීර පෙරේරා ප්‍රමුඛ පිරිස පෙන්වා දී ඇත්තේ.
ගෝඨාභය රාජපක්ෂ බලයට පත්වුවහොත් රටේ අනාගතය යළි වතාවක් අඳුරු යුගයකට තල්ලු වී යන බවට එම කණ්ඩායම අනතුරු අඟවා ඇති අතර එබැවින් මේ මොහොතේ ජයගත හැකි සජිත් ප්‍රේමදාස හට සහයෝගය ලබා දිය යුත් බවට මධ්‍යම කාරක සභාවේ 40කට වැඩි පිරිසකගේ තීරණය වී ඇත.
අනුර කුමාර දිසානායකට සහය දැක්වීමට තමන් ගෙන එන ලද යෝජනාව පරාජයට පත්වීම හේතුවෙන් සියලු තනතුරු වලින් හා පක්ෂයෙන් ඉවත් වන බවට නීතිඥ ලාල් විජේනායක පැවසු බව නම සඳහන් නොකරන ලෙස ඉල්ලා සිටි එක්සත් වාමාංශික පෙරමුණේ මධ්‍යම කාරක සභා සාමාජියකු සිලෝන් නිව්ස් වෙත කියා සිටියේය.
ජාතික ජන බලවේගයේ ජනාධිපති අපේක්ෂකයා හට සහාය දැක්වීමට මුලින් පියවර ගත් පාර්ලිමේන්තු මන්ත්‍රී ජයම්පති වික්‍රමරත්න සජිත් ප්‍රේමදාස හට සහාය දැක්වීමට එක්වු බවට සිලෝන් නිව්ස් මීට පෙර වාර්තා කළේය.
එක්සත් වාමාංශික පෙරමුණ සජිත් ප්‍රේමදාස හට සහාය දැක්වීමට තීරණය කළ බවට සමාජ මාධ්‍ය හා වෙබ් අඩවි ඔස්සේ පැතිර යන පුවත් අසත්‍ය බවට පක්ෂයේ ප්‍රධාන ලේකම් ලාල් විජේනායක මීට පෙර මාධ්‍ය හමුවක් පවත්වමින් කියා තිබුනි.
Facebook Comments
