පක්ෂ දේශපාලනයෙන් බැහැර වී ශ්‍රී ලාංකීය සියලු ජනකොටස්වල සංහිඳියාව වෙනුවෙන් නවමු ගමනක් ආරම්භ කිරීමට සජිත් ප්‍රේමදාසගේ පරාජයට වගයුතු බවට එජාප ප්‍රබලයන්ගේ දෝෂ දර්ශනයට ලක්ව සිටින මන්ත්‍රීවරයෙක් තීරණය කර තිබේ.
ජනාධිපතිවරණයේ නිල ප්‍රතිඵල නිකුත්වූ මොහොතේම පරාජය පිළිගෙන සිය අමාත්‍යධුරයෙන් ඉල්ලා අස්වූ මංගල සමරවීර 22 සිකුරාදා සිය නිල නිවසින් බැහැර යන අවස්ථාවේදී ඔහුගේ හිතවතුන් හට මේ බව ප්‍රකාශ කර ඇත.
මංගල සමරවීර විසින් මෙවර ජනාධිපතිවරණයට ඉදිරිපත්වූ ගෝඨාභය රාජපක්ෂට එරෙහිව එක්සත් ජාතික පෙරමුණෙන් ඉදිරිපත් කිරීමට සිටින සුදුසුම පුද්ගලයා එජාප නියෝජ්‍ය නායක සජිත් ප්‍රේමදාස බවට තීන්දු කර ඒ වෙනුවෙන් පක්ෂය තුල අභ්‍යන්තර අරගලයක් ගෙන ගිය අතර තම අපේක්ෂකයා දිනවීමට ද ඔහු මහත් සේ වෙහෙස විය.
කෙසේ වෙතත් සජිත් ප්‍රේමදාසගේ මැතිවරණ පරාජයෙන් පසුව මංගල සමරවීර ඊට වගකිව යුතු බවට ලක්ෂ්මන් කිරිඇල්ල, රවී කරුණානායක හා දයා ගමගේ යන හිටපු ඇමතිවරුන් තිදෙනා පසුගියදා පැවති එජාපෙ පාර්ලිමේන්තු මන්ත්‍රී කණ්ඩායම් රැස්වීමේදී චෝදනා කර තිබුනි.
පාස්කු ඉරිදා ප්‍රහාරයෙන් පසුව මුස්ලිම් ජාතිකයින් ඉලක්කකර ගනිමින් සිදුවූ ප්‍රහාර හමුවේ මංගල සමරවීර විසින් කරනු ලැබූ ඇතැම් ප්‍රකාශවලින් සිංහල බෞද්ධ සමාජය ප්‍රකෝපයට පත්ව තිබීම මෙම පරාජයට මුලිකම කාරණය බව එම හිටපු ඇමතිවරුන් ප්‍රකාශ කර තිබුන ද එජාප නායක රනිල් වික්‍රමසිංහ එකී චෝදනා පිළිගත නොහැකි බව සඳහන් කර තිබේ.
යහපාලන රජය විදෙස් කටයුතු අමාත්‍ය ධුරය හෙබවු මංගල සමරවීර මන්ත්‍රීවරයා එවක දී ශ්‍රී ලංකාවට එල්ල වී තිබු ජාත්‍යන්තර විරෝධය සමනය කිරීමට සමත් විය.
ශ්‍රී ලංකා රජය එක්සත් ජාතින්ගේ සංවිධානය සමඟ හවුලේ ගිවිසගත් සංහිඳියාව ඇති කිරීමට මංගල සමරවීර මහත් සේ වෙහෙසුන අතර රට තුල සිටින ජාතිවාදී කල්ලි වලට ඔහු සෘජුව වාග් ප්‍රහාර එල්ල කිරීම හේතුවෙන් ඔවුන්ගේ වෛරයට ලක්ව සිටියේය.
Facebook Comments
