මහින්ද රාජපක්ෂ සමයේ සිදුවු මාධ්‍යවේදීන් පැහැර ගැනීම හා මරා දැමීම ගැන පරීක්ෂණ මෙහෙයවු අපරාධ පරීක්ෂණ දෙපාර්තුමේන්තු අධ්‍යක්ෂක එම තනතුරින් ඉවත් කර තිබේ.
අපරාධ විමර්ශනය පිළිබඳව ප්‍රසිද්ධියක් උසුලන රහස් පොලිස් අධ්‍යක්ෂ ධුරයෙන් ඉවත් කරන ලද නියෝජ්‍ය පොලිස්පති ශානි අබේසේකර ගාල්ල දිසාව බාර නියෝජ්‍ය පොලිස්පතිවරයාගේ පුද්ගලික සහකාර ලෙස 21 බ්‍රහසපතින්දා සිට පත් කරන ලද බවයි ජාතික පොලිස් කොමිස නිවේදනය කරන්නේ.
ස්ථනා මාරුව ලබන විට මාධ්‍යවේදී ප්‍රගීත් එක්නැලිගොඩ පැහැර ගැනීම, සන්ඩේලීඩර් කර්තෘ ලසන්ත වික්‍රමතුංග ඝාතනය, මාධ්‍යවේදී කීත් නොයාර්ට සහ රිවිර හිටපු කර්තෘ උපාලි තෙන්නකෝන්ට පහර දීම මෙන්ම රතුපස්වල නිරායුධ සිවිල් වැසියන්ට වෙඩි තබා තිදෙනකු ඝාතනය කිරීම ඇතුළු සංවේදී විමර්ශන රැසක් ඔහුගේ අධීක්ෂණය යටතේ අපරාධ පරීක්ෂණ දෙපාර්තමේන්තුවෙන් විමර්ශනය කෙරෙමින් තිබුනි.
ඊට අමතරව දැඩි ආන්දෝලනයක් ඇති කළ රගර් ක්‍රීඩක වසීම් තාජුදීන් ඝාතනය, බැඳුම්කර ගනුදෙනුව, විද්‍යා දැරියගේ ප්‍රධාන ඝාතකයාට රැකවරණය ලබා දීම වැනි තවත් විමර්ශන රැසක් ශානි අබේසේකරගේ අධීක්ෂණයෙන් සිදු විය.
අවම වශයෙන පුද්ගලයින් 250 දෙනෙකු ඝාතනය වු පාස්කු ප්‍රහාර මාලාව සම්බන්ධය පරීක්ෂණ මෙහෙයවුවේද නියෝජ්‍ය පොලිස්පතිවරයා විසිනි.
රෝයල් පාර්ක් ඝාතනය, අඟුලාන ද්විත්ව මිනී මැරුම, උඩතලවින්න ඝාතනය, මොහොමඩ් සියාම් ඝාතනය, කෝටි දෙකේ මංකොල්ලය, ටවුන්හෝල් බෝම්බය ඇතුළු සුප්‍රසිද්ධ පරීක්ෂණ රැසක් මෙහෙයවූ ජ්‍යෙෂ්ඨ පොලිස් අධිකාරී ශානි අබේසේකරගේ විමර්ශනවල ප්‍රතිඵලයක් ලෙස නියෝජ්‍ය පොලිස්පතිවරයකුට පවා මරණ දඩුවම හිමි වී තිබේ.
නියෝජ්‍ය පොලිස්පති ශානි අබේසේකර අපරාධ පරීක්ෂණ දෙපාර්තමේන්තුවේ අධ්‍යක්ෂ ලෙස පත් කිරීමට පොලිස් කොමිෂන් සභාව තීරණය කරනු ලැබුවේ 2017 සැප්තැම්බර් හත් වැනිදාය.
රාජපක්ෂ පාලන සමයේදී රජයේ ආරක්ෂක අංශ විසින් සිදු කරන ලද අපරාධ සම්බන්ධ සොයා බලන විමර්ශන නිලධාරින්ට “එළියට බහින්න බැරි තත්ත්වයක්” උදා කර ඇති බවට පාස්කු ප්‍රහාර සොයා බැලීමේ පාර්ලිමේන්තු තේරිම් කාරක සභාව හමුවේ සාක්ෂී ලබා දෙමින් හෙතෙම මුල් වරට ප්‍රසිද්ධියේ ප්‍රකාශ කළේය.
දේශපාලන නායකයින්, මාධ්‍යවේදීන් හා බෞද්ධ භික්ෂුන් තමන් ඇතුළු විමර්ශකයින් ඩයස්පෝරවෙන් යැපෙන පුද්ගලයින් හා දඩ බල්ලන් ලෙසට අසත්‍ය චෝදනා කර ඇති බව නියෝජ්‍ය පොලිස්පති ශානි අබේසේකර සාක්ෂි ලබා දෙමින් කියා සිටියේය.
Facebook Comments
