රට පුරා මත්ද්‍රව්‍ය ගලායාම වැලක්වීමට අසමත් පොලිසිය පාසල් තුලට ගෙනැවිත්, පාසල් සිසුන්ද සම්බන්ධ කරගනිමින් ‘නව සමාජ බුද්ධි ඒකකයක්’ පිහිටුවීමට ආරක්ෂක අමාත්‍යාංශ සැලසුමට දිවයිනේ ප්‍රමුඛතම ගුරු සංගමයක් දැඩි විරෝධය පළ කර තිබේ.
ලංකා ගුරු සංගමය පවසන්නේ පාසල් පද්ධතිය තුළ මත් ද්‍රව්‍ය භාවිතාව වැලැක්විමේ අවංක උවමනාවක් ආණ්ඩුවට පවතින්නේ නම් ඔවුන් කළ යුත්තේ රටේ මත්ද්‍රව්‍ය සංසරණය වැලක්වීමට කටයුතු කිරීම බවයි.
“ආණ්ඩුවට අවංක උවමනාවක් තියනවානම් පාසල් පද්ධතිය තුළ මත් ද්‍රව්‍ය භාවිතාව වලක්වන්න, ඒ සදහා ඕන තරම් පාසලට ගලා ඒම වලක්වන්න වැඩ පිළිවෙලක් හදන්න ඕන. ඒ ගලා ඒම වලක්වන්න තාම වැඩපිළිවෙලක් හදා ගන්න බැරි වෙලා තියනවා. රට තුලට එන එක වලක්වන්න බැරි වෙලා තියනවා. එහෙම තියෙද්දි ප්‍රතිළුලය තමයි අල්ලන්න යන්නේ. ඒක නිසා අපි පැහැදිලිවම මේවා සම්බන්ධයෙන් නව නීති ගෙනල්ලා මේ පාසල් පද්ධතිය හරහා මේ කටයුතු සිදු කරනවාට අපි සම්පුර්ණයෙන් විරුද්ධයි.”
ලංකා ගුරු සංගමයේ ප්‍රධාන ලේකම් ජෝසප් ස්ටාලින් නොවැම්බර් 8 වැනිදා කොළඹදී මාධ්‍ය හමුවක් කැදවමින් මේ බව සදහන් කළේ ජාතික බුද්ධි ඒකකය සමග ඒකාබද්ධව නව සමාජ බුද්ධි ඒකකයක් පිහිටුවා එහි කටයුතු මේ වනවිට ආරම්භ කර ඇති බවට ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකොන් හෙළි කිරිමෙන් පසු ඒ සම්බන්ධයෙන් අදහස් දක්වමිනි.
නොවැම්බර් 2 වැනිදා රන්ටැඹේ ජාතික ශිෂ්‍යභට බළකා පුහුණු මධ්‍යස්ථානයේදී පැවැති ජාතික ශිෂ්‍යභට බළකායේ වාර්ෂික හර්මන් ලූස් සහ ද සොයිසා ශූරතාවලිය – 2023 හිවිසිරයාමේ පෙළපාලියේ ප්‍රධාන ආරාධිත අමුත්තා ලෙස සහභාගි වෙමින් ආරක්ෂක රාජ්‍ය අමාත්‍ය ප්‍රමිත බණ්ඩාර තෙන්නකොන් වැඩි දුරටත් පවසා තිබුනේ පාසල් පද්ධතිය තුළ සිදුවන විවිධ විෂමාචාර ක්‍රියා මැඩපැවැත්වීම සඳහා එම නව බුද්ධි කොට්ඨාසය හරහා අවශ්‍ය පියවර ගන්නා බවයි.
“අපි මේ වසර තුළ ජාතික බුද්ධි ඒකකයත්, ජාතික ශිෂ්‍ය භට බළකායත් සමග එකතුව සමාජ බුද්ධි එකකයක් පිහිටුවීමට තීරණය කළා. ඒ වැඩපිළිවෙල අපි මේ වසරේ ආරම්භ කළා. ඒ අනුව පාසල් තුළ සිදුවන අකටයුතුකම්, මත්ද්‍රව්‍ය උවදුර අවම කරන්න සහ නැති කරන්න වගේම මුලින්උපුටා දමන්න මේ බුද්ධි එකකය ඉවහල් කර ගැනීමට අපට හැකිවෙයි. ඒ වගේම ජාතික වීරයන් තරුණ පරපුර අතරින් බිහි කරන්න ජාතික වැඩපිළිවෙලක් ආරම්භ කළා.”
ජ්‍යෙෂ්ඨ ගුරු සංගම් නායකයා අවධාරණය කරන්නේ යම් හෙයකින් පාසල් තුළ මත් ද්‍රව්‍ය භාවිතය වැඩි වී ඇත්නම් ඊට අවශ්‍ය පියවර ගත යුත්තේ අධ්‍යාපන බලධාරීන් බවයි. ඔහු තව දුරටත් පෙන්වා දුන්නේ ආරක්ෂක අංශවලට රාජකාරි ඇත්තේ පාසලෙන් පිටත බවයි.
“පාසල් තුළ දරුවෝ අතර යම් විදිහක මත්ද්‍රව්‍ය භාවිතය වැඩි වෙලා තියනවානම් ඒකට අවශ්‍ය ක්‍රියාමාර්ග ගන්න කටයුතු කරන්නේ අධ්‍යාපන අමාත්‍යාංශය. දැන් පොලීසියට ආරක්ෂක අංශ වලට කටයුතු තියෙන්නේ පාසලෙන් එළියේ. ඔවුන් පාසල තුළට මේවා ගලාගෙන ඒම රටට ඒවා ගලාගෙන ඒම වැලැක්වීමට අදාල කටයුතු තමයි කරන්න ඔන.”
ආණ්ඩුවේ මෙම ක්‍රියාකලපය පසුපස වෙනත් අරමුණක් පවතින්නේදැයි ගුරු සංගම් නායකයා සැක පළ කළේය.
“පාසල් පද්ධතිය තුළ පොලීසිය මැදිහත් වෙලා නැතිනම් හමුදාව මැදිහත්වෙලා පාසල් පද්ධතිය තුළ වලක්වන්න කටයුතු කරනවානම් මේක සම්පුර්ණයෙන්ම විහිලුවක්. මේ ලැස්ති වෙන්නේ වෙන කටයුත්තකට කිලයා අපි කියන්න ඕනේ.”
ජාතික ශිෂ්‍ය භට බළකාය ද සම්බන්ධකරගනිමින් ආණ්ඩුව පිහිටුවා තිබෙන සමාජ බුද්ධි ඒකකයට ලංකා ගුරු සංගමයේ අනුමැතිය පලවී ඇති බවට ප්‍රධාන ධාරාවේ ඉංශ්‍රිසි පුවත්පතක් පළ කර ඇති පුවත මේ වනවිට අන්තර්ජාලයෙන් ඉවත් කරගෙන තිබේ.
Facebook Comments
