දෙමළ සරසවි සිසුන් පොලිසියට විරුද්ධව මානව හිමිකම් කොමිසමේ

ඉඩම් අයිතිය වෙනුවෙන් අඛණ්ඩ අරගලයක නිරතව සිටින නැගෙනහිර පළාතේ කිරි ගොවීන්ට සහයෝගිතාව දක්වා ආපිට පැමිණෙමින් සිටියදී පොලීසිය විසින් අත්අඩංගුවට ගැනීම ප්‍රජානත්ත්‍ර විරෝධී බවට හෙලා දකිමින් දෙමළ විශ්වවිද්‍යාල සිසුන් පිරිසක් ශ්‍රී ලංකා මානව හිමිකම් කොමිෂන් සභාවට පැමිණිලි කර තිබේ.

මඩකලපුවේ පිහිටි ශ්‍රී ලංකා මානව හිමිකම් කොමිෂන් සභාවේ ප්‍රාදේශිය කාර්යාලයට නොවැම්බර් 6 වැනිදා පැමිණිලි කිරීමෙන් අනතුරුව මඩකලපුව මාධ්‍ය සමාජයේදී මාධ්‍ය හමුවක් පවත්වමින් නැගෙනහිර විශ්වවිද්‍යාලයේ කලා සහ සංස්කෘතික පීඨයේ ශිෂ්‍ය සංගම් නායක කේ. රොබින්සන් සදහන් කළේ පොලීසියේ ක්‍රියාකලාපය තමන් තරයේ හෙළා දකින බවයි.

“රැළිය අවසන් කරලා යාපනය බලා යනකොට සන්දිවේලියේ බස් රථය නවත්තලා ප්‍රජානත්ත්‍ර විරෝධි ලෙස සිසුන් සම්බන්ධයෙන් කටයුතු කළා. මෙය අපි තරයේ හෙලා දකිනවා. මේ රට ප්‍රජාතන්ත්‍රවාදී රටක්. නිදහස, නීතියේ ආධිපත්‍යය, සියලූ ආකාරයේ යහපාලන වැඩපිළිවෙළ ක්‍රියාත්මක වෙනවා කිව්වත් ප්‍රායෝගිකව එය කළ නොහැකි තත්වයක් තමයි දකින්න ලැබෙන්නේ.”

ඉඩම් අයිතිය ඉල්ලා මයිලත්තමඩු, මාදවනෙයි කිරි ගොවීන්ගේ අඛන්ඩ විරෝධතාවයට දින 52 ක් සපිරුන නොවැම්බර් 5 වැනිදා යාපනය සහ නැගෙනහිර විශ්වවිද්‍යාල වල සිසුන් ඔවුන්ට සහාය පළ කරමින් විරෝධතාවයක් දියත් කර තිබුනි.

එම විරෝධතාවයට සහභාගී වු සිසුන් බස් රථයකින් යාපනය බලා පැමිණෙමින් සිටියදී යාපනය සන්දිවේලි ප්‍රදේශයේ දී බස් රථය නැවැත්වූ පොලීසිය ඔවුන් අත ශිෂ්‍ය හැදුනුම්පත නොතිබීම චෝදනාවක් කොට ගනිමින් සිසුන් හය දෙනා අත්අඩංගුවට ගෙන අධිකරණයට ඉදිරිපත් කිරීමෙන් පසු එක් අයකුට රුපියල් ලක්ෂයක් බැගින් වු ශරීර ඇප මත සිසුන් නිදහස් කිරීමට අධිකරණය නියෝග කර තිබුනි.

පොලීසිය විසින් අත්අඩංගුවට ගෙන තිබුනේ යාපනය විශ්වවිද්‍යාලයේ එන්.විදුෂන්, ටී.ලජිතර්, එස්.සින්තුජන්, ටී. ගජන්, නෙවිල්කුමාර්, යන සිසුන් පස් දෙනා සහ නැගෙනහිර විශ්වවිද්‍යාලයේ කලා සහ සංස්කෘතික පීඨයේ ශිෂ්‍ය සංගම් නායක කේ.රොබින්සන්ය.
‍
එරාවුර් මහේස්ත්‍රාත් අධිකරණ භුමියට පැමිණ සිටි දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් එහිදී මාධ්‍ය වෙත පවසා තිබුනේ සිසුන් අත්අඩංගුවට ගැනීම සම්බන්ධයෙන් පොලීසිය සදහන් කළ සියළු කරුණු අසත්‍ය බවයි.

” පොලීසිය මේ අත්අඩංගුවට ගැනීම ගැන කියපු කාරණා ඔක්කොම බොරු. එයාලගේ සිංහල ජනාවාස කිසි විරෝධයක් නැතුව පවත්වාගෙන යන කොට ඒකට විරෝධය පළ කරන අයව තර්ජනය කරමින් ඒ විරෝධතා නවත්තන්න, ඒ විරෝධතා තවත් ශක්තිමත් කරන්න ආපු යාපනයේ විශ්වවිද්‍යාලයේ සිසුන් ගත්ත මේ උත්සාහය කොහොමහරි ඒ සිසුන්ව බය කරලා එයාලව දිගටම මේ මයිලත්තමඩු මාදවනෙයි කිරි ගොවියන්ට අත දීම වැලැක්වීමේ කුමන්ත්‍රණයක් ලෙස තමයි අපි මේක බලන්නේ.”

නොවැම්බර් 6 වැනිදා මඩකලපුවේ පැවැත්වු මාධ්‍ය හමුවට එක්වෙමින් යාපනය විශ්වවිද්‍යාලයේ මහා ශිෂ්‍ය සංගමයේ සභාපති අලගරාසා විජයකුමාර් අවධාරණය කළේ පොලීසිය සිදු කරන මෙවැනි ක්‍රියා හරහා විශ්වවිද්‍යාල සිසුන් තව දුරටත් ශක්තිමත් වන බවයි.

“ආණ්ඩුව මෙතන පෙන්වන මේ සිංහල ස්වෝත්තමවාදය පාලනය කළ යුතුයි. ඒ කියන්නේ පොලිස් නිලධාරීන් විසින් අධිකරණය මෙහෙයවන නිසා මෙතන අධිකරණයටත් තර්ජනයක් ඇති වෙලා තියනවා.”

පොලීසිය විසින් නීති විරෝධිව සිසුන් අත්අඩංගුවට ගැනීම සම්බන්ධයෙන් යුක්තිය ඉල්ලා මඩකලපුව බහු ආගමික සංගමයේ ලේකම් කන්දයියා ජෙගදාස් පියතුමා විසින්ද මානව හිමිකම් කොමිෂන් සභාවට තවත් පැමිණිල්ලක් ඉදිරිපත් කර ඇති බවයි පළාත් බද වාර්තාකරුවන් වැඩි දුරටත් පවසන්නේ.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් මෑතකාලීනව පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග ගවයන්ට කැවීම සඳහා භාවිත කළ තණ බිම් අක්කර 6000 ක භුමියෙන් සරුසාරෙට තෘණ වැවෙන අක්කර 2500 ක පමණ ප්‍රදේශයක් සිංහල ගොවියන් බලහත්කාරයෙන් අල්ලා ගෙන සිටින බවට චෝදනා කරන මයිලත්තමඩු, මාදවනෙයි කිරි ගොවීන් එම ඉඩම් නිදහස් කරන ලෙස බලකරමින් සැප්තැම්බර් 15 වැනි සිකුරාදා සිට මඩකලපුව සිත්තාන්ඩි පාසල ඉදිරිපිටදී අඛණ්ඩ විරෝධයක යෙදී සිටී.