නැගෙනහිර පළාතේ බෞද්ධයන් නොමැති ප්‍රදේශයක ප්‍රාදේශිය සභා අනුමැතියකින් තොරව අලුතින් ඉදිකෙරන විහාරයකට ප්‍රදේශයේ දෙමළ ජනයාගෙන් එල්ල වු විරෝධය නොතකා එහි ආගමික කටයුතු ආරම්භ කර තිබේ.
පළාත් බද වාර්තාකරුවන් පවසන්නේ නිලාවේලි පොලිස් වසමේ 06 කනුව, ඉලුප්පුකුලම්හි ඉදිකරන බොරළුකන්ද විහාරස්ථානයේ ශාසනික කටයුතු නොවැම්බර් 6 වැනිදා ආරම්භ කළ බවයි.
බෞද්ධ භික්ෂුන් වහන්සේලා බොරළුකන්ද විහාරස්ථානයේ බුදු පිළිම තැන්පත් කරමින් ආගමික කටයුතු ආරම්භ කර ඇති අතර එම අවස්ථාවට ගිහියන් සහභාගී වී ඇත්තේ අතලොස්සකි.
දිගින් දිගටම එල්ල වු ජනතා විරෝධය නිසා ත්‍රිකුණාමලය බොරළුකන්ද විහාරස්ථානයේ ඉදිකිරීම් කටයුතු තාවකාලිකව නැවැත්වීමට නැගෙනහිර පළාතේ ආණ්ඩුකාරවරයා පියවර ගෙන තිබුනි.
එයට එරෙහිව අගෝස්තු 28 වැනි සඳුදා පෙරවරුවේ ත්‍රිකුණාමලය දිස්ත්‍රික් ලේකම් කාර්යාලය ඉදිරිපිටදී ත්‍රිකුණාමලය ශාසනාරක්ෂක බල මණ්ලය හා ගෝකන්න පුර සුරැකීමේ සංවිධානයේ සංවිධානත්වයෙන් විරෝධතාවයක් දියත් කර තිබු අතර එහිදී පොල්හේන්ගොඩ උපරතන නාහිමියන් ඇතුළු තවත් හිමි නමක් ත්‍රිකුණාමල දිස්ත්‍රික් සංවර්ධන කමිටු (DDC) රැස්වීමට කඩාවැදී ආණ්ඩුකාරවරයාට තර්ජනය කළේය.
එහිදී ඇති වු තත්වය පැහැදිලි කරමින් ආණ්ඩුකාර සෙන්දිල් තොන්ඩමාන් මාධ්‍ය වෙත පවසා තිබුනේ ප්‍රාදේශීය සභාවේ අනුමැතිය නොමැතිව ඉදිකිරීම් සදහා අවසර ලබා දිය නොහැකි බවයි.
“ගරු ස්වාමීන්වහන්සේට මම පැහැදිලි කරලා තියෙනවා, ප්‍රාදේශීය සභාවේ අනුමැතිය නැතිව මේ කන්ස්ට්‍රක්ෂන් එක දෙන්න බෑ කියලා”
ඊට පසුව මාධ්‍ය හමුවක් පවත්වමින් තිඹිරිවැව රජමහා විහාරාධිපති උතුරු නැගෙනහිර තමන්කඩු දෙපළාතේ ප්‍රධාන අධිකරණ සංඝනායක පොල්හේන්ගොඩ උපරතන නායක හිමියන් සදහන් කර තිබුනේ ප්‍රාදේශීය සභාවේ අවහිරය නොතකා බොරළුකන්ද රජමහා විහාරස්ථානයේ ඉදිකිරීම් සිදු කරන බවයි.
“ඔබතුමා හොදට පනත කියවලා බලන්න. මේ පුජනිය ස්ථාන සියල්ලම බද්දෙන් නිදහස් කරලා තියනවා. ආගමික ස්ථාන බද්දෙන් නිදහස් කරලා තියනවා. බද්දෙන් නිදහස් කරාට පස්සේ ඒ ආගමික ස්ථාන ගොඩ නගන්නට තියෙන්නේ අපිට ඕනේ විදිහට. කෝවිල හදන්නේ පුජකයට ඕනේ විදිහට. පන්සල හදන්නේ හාමුදුරුවන්ට ඕනේ විදිහට. මේ දෙකම හදන්න ආණ්ඩුකාරතුමාගෙන් ගිහිල්ලා අවසර ගන්න අවශ්‍යතාවයක් නැ. අවසර ගන්න එන්නෙත් නැ. අපිට අවසර ඕනෙත් නැ. අපේ පන්සල අපි ගොඩනගනවා.”
නැගෙනහිර පළාතේ බෞද්ධයන් නොමැති ප්‍රදේශ වල අලුතින් බෞද්ධ විහාර ඉදිකරමින් ප්‍රදේශයේ ජනයාගේ ඉඩම් කොල්ලකෑම් සිදු කරන බවට දෙමළ දේශපාලඥනයන් මෙන්ම ජනතාවද දිගින් දිගටම චෝදනා කර තිබුනි.
උතුරු නැගෙනහිර දෙමළ ජනයාගේ ඉඩම් බලහත්කාරයෙන් උදුරාගැනීම් සිදු වන බව, දින තුනක කාලයක් සදහා ශ්‍රී ලංකාවට පැමිණ සිටින යුරෝපා පාර්ලිමේන්තු නියෝජිතයන්ට ද දැනුම් දුන් බව ඉලංකෙයි තමිල් අරසු කච්චි පාර්ලිමේන්තු මන්ත්‍රී එම්. ඒ සුමන්තිරද නොවැම්බර් 1 වැනිදා ජනමාධ්‍යවෙත සදහන් කළේය.
Facebook Comments
