යුද්ධයෙන් මියගිය දෙමළ ජනයා අනුස්මරණය සඳහා යාපනයේ විශ්වවිද්‍යාල භුමිය තුළ ඉදිකර තිබූ ස්මාරකය රාජ්‍ය අනුග්‍රහයෙන් විනාශ කර දැමීමෙන් පසු එය යළි ගොඩ නැගීම සඳහා මුස්ලිම් ප්‍රජාවගේද සහාය ලැබී තිබේ.
වසර ආරම්භයේදීම බලහත්කාරයෙන් විනාශ කර දමනු ලැබූ යාපනය විශ්ව විද්‍යාලයේ මුල්ලිවයික්කාල් යුද පීඩිතයන්ගේ සමාධිය සිව් මසක් ගත වීමටත් මත්තෙන් යලි ඉදිකිරීමෙන් අනතුරුව අප්‍රේල් 23 සිකුරාදා විවෘත කර තිබුනේ එම සරසවියේ මහා ශිෂ්‍ය සංගමය විසිනි.
මලින් සහ ආලෝකයෙන් පුද පූජා පවත්වා අභිනව මුල්ලිවයික්කාල් ස්මාරකය විවෘත කිරීමෙන් පසු අදහස් දක්වමින් ශිෂ්‍ය සංගම් නායකයා අවධාරණය කර සිටියේ මෙම ස්මාරකය ප්‍රතිසංස්කරණය කිරීම සඳහා මහජනතාව, ඩයස්පෝරා සාමාජිකයන්, මුස්ලිම් ප්‍රජාව, විදේශීය රාජ්‍යතාන්ත්‍රිකයන් ඇතුළු බොහෝ දෙනෙක් සහාය ලබා දුන් බවයි.
“යාපනය ශිෂ්‍ය සංගමය, යාපනය විශ්වවිද්‍යාල ශිෂ්‍යයන්, ගුරුවරුන් සහ අනධ්‍යයන කාර්යමණ්ඩලයෙන් ලැබුන සහය නිසා, 2021 අප්‍රේල් 23 වන අද දින මෙම ස්මාරකය විවෘත කරන්නට හැකි වුනා.”
මෙම ස්මාරකය තුළින් දෙමළ ජනයාගේ පැවැත්ම සහ ඔවුන් අත්විඳි දුක්ඛිත අත්දැකීම් නිරූපණය වන බවත් ඔහු සදහන් කර තිබුනි.
සෑම ජාතියකටම තම මළවුන් සිහි කිරීමට අයිතියක් පවතින බව පෙන්වා දෙන ශිෂ්‍ය සංගම් නායකයා එහිදී බලධාරීන්ට අවධාරණය කර තිබුනේ මෙහි ත්‍රස්තවාදයට සම්බන්ධ ක්‍රියාවක් නොමැති බවයි.
ස්මාරකය යළි ගොඩ නැගීම වෙනුවෙන් සහාය පළ කළ සියලු දෙනාටත් යාපනය විශ්වවිද්‍යාල ශිෂ්‍ය සංගමය වෙනුවෙන් ඔහු ස්තුතිය පළ කළ බව ප්‍රාදේශීය වාර්තාකරුවෝ පවසති.
යුද්ධයෙන් මළවුන් අනුස්මරණය සඳහා යාපනයේ විශ්වවිද්‍යාල භුමිය තුළ ඉදිකර තිබූ ස්මාරකය කඩා බිඳ දැමීමට මුල්වී තිබුනේ එම සරසවියේ උපකුලපතිවරයාය.
යාපනය සරසවි බිමේ පිහිටි මළවුන්ගේ ස්මාරකය යන්ත්‍රෝපකරණ යොදාගනිමින් සන්නද්ධ හමුදා සහායෙන් ජනවාරි 8 සිකුරාදා රාත්‍රි යාමයේ කඩා බිඳ දැමීමට එරෙහිව යාපනය විශ්ව විද්‍යාලයේ සිසුන් මාරාන්තික උපවාසයක් ආරම්භ කිරීමෙන් පසු එම ස්මාරකය යලි ඉදි කිරීම වෙනුවෙන් යාපනය විශ්ව විද්‍යාලයේ උපකුලපති එස්. ශ්‍රී සත්ගුණරාජාම ජනවාරි 11 සදුදා දිනයේ මුල්ගල් තැබීමට පියවර ගෙන තිබුනි.
සමරුව බිඳ හෙලීම හෙලා දකිමින් දෙමළ උපාධි අපේක්ෂකයන් විසින් දියත් කරන ලද උපවාසයකට සහාය දෙමින් උතුරු නැගෙනහිර පුරා දෙමළ-මුස්ලිම් ඒකාබද්ධ හර්තාලයක් දියත් වෙද්දී නැග ආ ජාත්‍යන්තර විරෝධය හමුවේ ආණ්ඩුවට ද පසුබාන්නට සිදුවී තිබුනි.
Facebook Comments
