කොවිඩ් 19 රෝගී තත්ත්වයෙන් පීඩාවට පත්ව සිටින ජනතාව හට ආධාර ලබා දී ප්‍රචාරක වාසි ලබා ගැනීමෙන් කොරෝනා රෝග ව්‍යාප්තිය වළකා ගත නොහැකි බව මැතිවරණ කොමිසම විසින් ඡන්ද අපේක්ෂකයන් හට පෙන්වා දී තිබේ.
සුළු පිරිසක් දේශපාලන වාසී ලබා ගැනීමට එවැනි දෑ සිදු කරන බවට නිරීක්ෂණය වී ඇති බව පවසන මැතිවරණ කොමිසමේ සභාපතිවරයා වසංගතය පරාජය කිරීමට වෙර දරන මොහොතක මෙවැනි ලාභ ප්‍රයෝජන ගැනීම නොසුදුසු බවයි අවධාරණය කරන්නේ.
“එබැවින් එවැනි දේශපාලන ප්‍රචාරන කටයුතු වලින් වැලකී Covid-19 පරාජය කිරීමට සකලවිද වාද භේද වලින් තොරව විශේෂයෙන්ම දේශපාලන ප්‍රවර්ධන වලින් තොරව සියලු දෙනා ක්‍රියා කරනු ඇතැයි අපේක්ෂා කරමු. එසේ කරන ලෙස සියලු දෙනාගෙන් ඉල්ලා සිටිමු,” යි මහින්ද දේශප්‍රිය සභාපතිවරයා අත්සන් කර නිකුත් කරන ලද නිවේදනයේ දැක්වේ.
කෙසේ වෙතත් ආපදාවෙන් පීඩාවට පත්ව සිටින ජනතාවට සහන සැලසීමට දේශපාලනඥයන්, අගමික නායකයින්, ව්‍යාපාරික ප්‍රජාව, සමාජ සේවයින් හා දානපතියන් ඉදිරිපත් වී සිටීම මැතිවරණ කොමිසමේ ඇගයීමට ලක්ව ඇත.
මේ අතර පීඩාවට පත්ව සිටින ජනතාවට සහන සැලසීමට මැතිවරණ කොමිසමේ අවසරය ඇති එක් එක් දිස්ත්‍රික්ක වල දේශපාලන නියෝජිතයන් යොදා ගැනීමට කටයුතු සකස් කර ඇති බව බැසිල් රාජපක්ෂ පක්ෂ නායක හමුවේදී කියා සිටියේය.
Facebook Comments
