ජනාධිපති ලේකම් “රාජ්‍ය සේවකයන් බියගැන්වීමක”

0

නිලතල අයුතු ලෙස යොදාගනිමින් රාජ්‍ය සේවකයන් බියගැන්වීමේ චෝදනාවට රටේ ජ්‍යෙෂ්ඨතම රාජ්‍ය නිලධාරියා ලක්වී සිටී.

ජනාධිපති ලේකම් විසින් වෙසක් පෝදාට පෙර දින ආයතන ප‍්‍රධානීන් අමතා රාජ්‍ය සේවකයන්ගේ මාසික වැටුප ඉල්ලීම මගින් රජයේ සේවකයන්ට අයුතු බලපෑම් කිරීමට නිලධාරීන්ට මග පාදා දී ඇති බව දිවයිනේ ප්‍රමුඛතම වෘත්තීය සමිති නායකයකු පවසයි.

ජනාධිපතිවරයාගේ සෘජු නියෝජිතයා නිල ලිපි ශීර්ෂය යොදා ගනිමින් සිදු කළ මෙම ඉල්ලීම සමස්ත රාජ්‍ය සේවක ක්ෂේත්‍රයම බියගැන්වීමක් බවයි ලංකා ගුරු සංගමය පවසන්නේ.

“ජනාධිපති කාර්යාලයේ සියලූ දෙනාම මෙම කාර්යයට සහභාගිවීම දිරිගැන්වීමට මා විසින් කටයුතු කරනු ඇත. ඔබටද එසේ ඔබගේ කාර්ය මණ්ඩලය මෙම දායකත්වයට මෙහෙයවීමට කටයුතු කළ හැකි යයි විශ්වාස කරමි,” ජනාධිපති ලේකම් පී.බී ජයසුන්දර විසින් මසක වැටුප ඉල්ලා මැයි 5 දා යවන ලද ලිපියේ සදහන්ව තිබුනි.

රටේ අයවැය හිඟය අඩුකර, ණය කළමනාකරණය වෙනුවෙන් එම ඉල්ලීම සිදු කරන බව ඔහු සදහන් කර තිබුනි.

ජනාධිපති ලේකම්වරයා සිය ලිපියේ ප‍්‍රකාශ කර ඇති පරිදි රාජ්‍ය සේවකයන්ට පසුගිය දිනවල ගමන් වියදම් ඇතුළු විවිධ වියදම් දැරීමට නොමැති වුවද රටේ පවතින තත්වය හමුවේ එදිනෙදා අත්‍යවශ්‍ය ආහාර ද්‍රව්‍ය ලබා ගැනීම සඳහා ම ජනතාවට අධික වියදමක් දැරීමට සිදුව ඇති බව ලංකා ගුරු සංගමය පෙන්වා දෙයි.

අරගලවලට කරන බලපෑමක්

රාජ්‍ය සේවකයන්ගේ මැයි මාසයේ වැටුප ආපසු ආණ්ඩුවටම දෙන ලෙස ජනාධිපති කාර්යාලයෙන් සිදු කළ ඉල්ලීම රාජ්‍ය අංශයේ වැටුප් අරගලවලට කරන බලපෑමක් ද යන්න සම්බන්ධයෙන් ද ලංකා ගුරු සංගමය සැක මතු කර තිබේ.

එම සංගමය විසින් මැයි 6 බ්‍රහස්පතින්දා නිකුත් කර තිබෙන නිවේදනයක සදහන්ව ඇති පරිදි ජනාධිපති ලේකම්වරයාගේ ඉල්ලීම කෝවිඩ් 19 හමුවේ අතරමඟ ඇණහිටි ගුරු-විදුහල්පති වැටුප් අරගලය ඇතුළු රාජ්‍ය අංශයේ වැටුප් අරගලවලට කරන බලපෑමක් ද යන්න එම සංගමය ප්‍රශ්න කරයි.

“සියලූ රාජ්‍ය සේවකයන්ගේ මැයි මස වැටුප පරිත්‍යාග කිරීමේ ආයාචනයක් යොමු කිරීම මගින්, කෝවිඞ් 19 වසංගත තත්වය හමුවේ නතර කිරීමට සිදු වූ ගුරු-විදුහල්පති වැටුප් විෂමතා ඉවත් කර වැටුප් වැඩි කිරීමේ අරගලය, තැපැල්, දුම්රිය, විශ්ව විද්‍යාල අනධ්‍යන කාර්ය මණ්ඩල හා රාජ්‍ය සේවයේ අනෙකුත් සේවාවන්ගේ වැටුප් අරගල ඉදිරියේ දී මතුවීම වැලැක්වීම සඳහා ගන්නා උපක‍්‍රමයක් ද යන ගැටලූව අප ඉදිරියේ ඇත.”

පවතින වාතාවරණය තුළ විදේශ ආධාර ලැබෙමින් තිබියදී සහ ඛනිජ තෙල් මිල ඉතා පහළ මට්ටමක පැවතියදී මෙසේ රාජ්‍ය සේවක වැටුප ඉල්ලා සිටීම රජයට මූල්‍ය අර්බුදයක් ඇති බව රාජ්‍ය සේවකයන්ට මවා පෙන්වීමට දරණ උත්සාහයක් දැයි සැකයක් ද මතු වන බව ලංකා ගුරු සංගමයේ ප්‍රධාන ලේකම් ජෝසප් ස්ටාලින් පවසයි.

ඉතා අවම වැටුප් ලබමින් දැඩි ජීවන අපහසුතාවලින් පෙළෙන රාජ්‍ය සේවකයාගේ අප්‍රේල් සහ මැයි මස ණය වාරික අය නොකිරීමේ තීරණයක් ගන්නා ලද්දේ කෝවිඞ් 19 වසංගත තත්වය හමුවේ රාජ්‍ය සේවකයා මුහුණ දෙන ආර්ථික පීඩනයන් අවම කිරීම සඳහා බව ගුරු සංගම් නායකයා සිය නිවේදනය මගින් අවධාරණය කර තිබේ.

එම සහනය අප්‍රේල් වැටුපට අදාළව ගුරු-විදුහල්පතිවරු ඇතුළු රාජ්‍ය සේවකයන් බොහෝ දෙනෙකුට හිමි නොවු බව ගුරු සංගම් නායකයා වැඩි දුරටත් පවසයි.

එම සහනය ලබාදීම හේතු කොටගෙනම රාජ්‍ය සේවකයාට අප්‍රේල් මස ලබාදීමට නියමිතව තිබූ උත්සව අත්තිකාරම් මුදල ද අහිමි කළ බව ලංකා ගුරු සංගමය සිහිපත් කරයි.

රාජ්‍ය සේවකයාගේ දුෂ්කරතා හඳුනාගෙන 07/2020 රාජ්‍ය පරිපාලන චක‍්‍රලේඛය මගින් අවම සහන ලබා දී, අනෙක් අතට ඔවුන්ගේ මැයි මස වැටුප හෝ ඉන් කොටස් ඉල්ලා සිටීම ගැටලූ සහගත බව ගුරු සංගම් නායක ජෝසප් ස්ටාලින් සිය නිවේදනය මගින් වැඩි දුරටත් අවධාරණය කර සිටී.

Facebook Comments

wedding people