බන්ධනාගාර ගත රැඳවියන්ගේ ඇප අයදුම්පත් සලකා බැලීම හා රිමාන්ඩ් දීර්ඝ කිරීම සඳහා වීඩියෝ තාක්ෂණය භාවිතා කිරීම සඳහා වන වැඩසටහනට කැබ්නට් අනුමැතිය හිමිව තිබේ.
රජයේ ප්‍රවෘත්ති දෙපාර්තමේන්තුවේ දී ජුනි 11 බ්‍රහස්පතින්දා පැවැති කැබිනට් තීරණ දැනුම් දීමේ මාධ්‍ය හමුවට එක්වෙමින් සම කැබිනට් මාධ්‍ය ප්‍රකාශක අමාත්‍ය ආචාර්ය බන්දුල ගුණවර්ධන ඒ බව සදහන් කර ඇත.
ශ්‍රී ලංකා ටෙලිකොම් සමාගම මෙයට දායකත්වය සපයන බව රජයේ ප්‍රවෘත්ති දෙපාර්තුමේන්තුව පවසයි.
බන්දුල ගුණවර්ධන අමාත්‍යවරයා එහිදී සඳහන් කර ඇත්තේ, බන්ධනාගාර 23ක මේ වන විට සිටින දිනකට රැඳවියන් 15000 අතරින් 5400 ක් දිනකට අධිකරණයට රැගෙන යායුතු බවයි.
ඒ සදහා දිනකට ප්‍රවාහන ගාස්තු ලෙස රුපියල් මිලියන 441ක් වැය වන බව ඔහු අවධාරණය කර තිබේ.
රැදවියන් රැගෙන යන විට මඟ රැක සිට පහර දීම් හේතුවෙන් මීට පෙර මරණ පවා සිදු වන තිබෙන අතර එය සලකා බලා රැදවියන්ගේ හා බන්ධනාගාර නිලධාරීන්ගේ ආරක්ෂාව පිණිස මෙම වැඩපිළිවෙල යෝජනා කර ඇත්තේ බන්ධනාගාර ප්‍රතිසංස්කරණ හා පුනරුත්ථාපන ඇමති නිමල් සිරිපාල ද සිල්වා විසින් බව රජයේ ප්‍රවෘත්ති දෙපාර්තමේන්තුව සදහන් කරයි.
මෙම වැඩසටහනේ පළමු අදියර වශයෙන් කොළඹ දිස්ත්‍රික්කයේ අධිකරණ ශාලා 23ක සහ බන්ධනාගාර 04ක ස්ථාන 12ක යෝජිත වැඩසටහන ක්‍රියාත්මක කිරීමට අමාත්‍ය මණ්ඩල අනුමැතිය ලැබී තිබේ.
Facebook Comments
