අට වසරකට ඉහත දී වැලිකඩ බන්ධනාගාරයේ විසි හත් දෙනකු ඝාතනය කිරීම සම්බන්ධයෙන් පවරා ඇති නඩුවේ එක් විත්තිකරුවකු නිදොස් කොට නිදහස් කර තිබේ.
පොලිස් මත්ද්‍රව්‍ය නාශක කාර්යාංශයේ පොලිස් පරික්ෂකවරයෙකු ලෙස කටයුතු කළ නියෝමාල් රංගජීව, වැලිකඩ බන්ධනාගාරයේ හිටපු අධිකාරී එමිල් රංජන් ළමාහේවා සහ වැලිකඩ බන්ධනාගාරයේ බුද්ධි ඒකකයට අනුයුක්තව සේවය කළ ඉමදූවගේ ඉන්දික සම්පත් යන අය මෙම නඩුවේ විත්තිකරුවන් ලෙස නම් කර තිබුණි.
නඩුවේ තුන් වන විත්තිකරු වන බුද්ධි ඒකකයට අනුයුක්තව සේවය කළ ඉමදූවගේ ඉන්දික සම්පත් යන අය හට චෝදනා පවත්වාගෙන යාම සඳහා ප්‍රමාණවත් සාක්ෂි මේ දක්වා ඉදිරිපත් වී නොමැති බව නඩුව අද කැඳවූ අවස්ථාවේදී නීතිපතිවරයා වෙනුවෙන් පෙනීසිටි රජයේ නියෝජ්‍ය සොලිසිටර් ජෙනරාල් ඩිලාන් රත්නායක අධිකරණය හමුවේ කියා සිටියේය.
එබැවින් ඔහු මෙම නඩුවෙන් නිදහස් කරන්නැයි නියෝජ්‍ය සොලිස්ටර් ජෙනරල්වරයා අධිකරණයෙන් ඉල්ලා සිටියේය.
එම කරුණු සැලකිල්ලට ගත් ගිහාන් කුලතුංග, ප්‍රදීප් හෙට්ටිආරච්චි සහ මංජුල තිලකරත්න යන ත්‍රිපුද්ගල විනිසුරු මණ්ඩලය ඉමදූවගේ ඉන්දික සම්පත් නිදොස් කොට නිදහස් කිරීමට 15 බදාදා නියෝග කළේය.
පළමු හා දෙවන සැකකරුවන් වන එමිල් රංජන් ලමාහේවා හා නියෝමාල් රංගජිව යන අයට එරෙහි නඩුව ලබන 30 වනදා යළි කැදවීමට නියමිතව ඇත.
2012 වසරේ නොවැම්බර් මස 9 දා රජයේ ආරක්ෂක අංශ වැලිකඩ සිරගෙදරට කඩා වැදී සහ සිරකරුවන් අතර ගැටුමෙන් රැඳවියන් 27 දෙනෙකු ඝාතනයට ලක්වු අතර හතළිහකට නොඅඩු පිරිසකට තුවාල සිදුවිය.
එම ඝාතන පිළිබඳව සොයා බැලීමට පත් කරන ලද කමිටුවේ විමර්ශන වාර්තාව විශ්‍රාම ලත් විනිසුරු නිමල් නම්බුවසම් අගමැති රනිල් වික්‍රමසිංහ හමුවේ අධිකරණ අමාත්‍ය විජයදාස රාජපක්ෂ වෙත භාර දෙන ලද්දේ 2015 ජුනියේය.
පස් වසරක් ගතවී ඇතත් එම වාර්තාව ප්‍රසිද්ධියට පත් කර නැත.
Facebook Comments
