ඡන්ද ප්‍රචාරණයේ “කෝටිපතියා තරගයෙන්” සජිත් දිනුම්

පාර්ලිමේන්තු මැතිවරණයේ ප්‍රචාරක කටයතු සඳහා දෙසතියක් තුල ප්‍රධාන ධාරවේ දේශපාලන පක්ෂ කෝට් 70ක පමණ මුදලක් වියදම් කර ඇති බව මැතිවරණ නිරීක්ෂණ සංවිධානයක් ගණන් බලා තිබේ.

ජුලි මස 02 වනදා සිට 15 වෙනිදා දක්වා කරන ඡන්ද ප්‍රචාරණය සඳහා වැඩිම මුදලක් යොදවා ඇත්තේ සමගි ජන බලවේගය බවටයි මැතිවරණ ප්‍රචණ්ඩ ක්‍රියා නිරීක්ෂණය කිරීමේ මධ්‍යස්ථානය (CMEV) නිකුත් කරන ලද අලුත්ම ගණන් හිලව් අනුව හෙළිදරව් වන්නේ.

මිලියන 168 ක් විද්‍යුත් මාධ්‍ය ප්‍රචාරණය වෙනුවෙන්ද මිලියන 6 ක් මුද්‍රිත මාධ්‍ය පිරිවැය ලෙසද මිලියන 2 ක් සමාජ මාධ්‍ය වෙනුවෙන් හා මිලියන 09 ක් වෙනත් පිරිවැය ලෙසින්ද භාවිත කර එම සති දෙක තුල සජිත් ප්‍රේමදාසගේ නායකත්වෙයන් යුත් පක්ෂය මිලියන 185ක් වියදම් කර ඇති බවයි ඔවුන් පවසන්නේ.

ප්‍රචාරණ වියදම් ලැයිස්තුවේ දෙවන ස්ථානයට ශ්‍රී ලංකා පොදුජන පෙරමුණ පත්ව ඇති අතර ඔවුන් එම කාලය තුලදී රුපියල් මිලියන 151ක පමණ මුදල් විය පැහැදම් කර ඇත.

ඉන් මිලියන 107 ක් විද්‍යුත් මාධ්‍ය වෙනුවෙන්ද මිලියන 19 ක් මුද්‍රිත මාධ්‍ය වෙනුවෙන්ද සමාජ මාධ්‍ය වෙනුවෙන් රුපියල් මිලියන 5 ක්ද වෙතන් පිරිවැය ලෙස රුපියල් මිලියන 20 ක්ද භාවිත කර ඇතැයි යන්න මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානයේ තක්සේරුවයි.

එම කාලය තුල එක්සත් ජාතික පක්ෂය මැතිවරණ ප්‍රචාරණය වියදම් සදහා භාවිත කර ඇති බවට තක්සේරු කරන මුදල රුපියල් මිලියන 123 කි.

මිලියන 111 ක් විද්‍යුත් මාධ්‍ය වෙනුවෙන්ද මිලියන 10 ක් මුද්‍රිත මාධ්‍ය වෙනුවෙන්ද සමාජ මාධ්‍ය හා වෙනත් පිරිවැය වෙනුවෙන් රුපියල් මිලියනය බැගින්ද වෙන් කර ඇත.

ජාතික ජන බලවේගය රුපියල් මිලියන 36 ක් වියදම් කර ඇති අතර එම මුලු මුදලම වියදම් කර ඇතැයි ඇස්තමේන්තු කර ඇත්තේ විද්‍යුත් මාධ්‍ය ප්‍රචාරණය සදහා බවටයි මැතිවරණ ප්‍රචණ්ඩ ක්‍රියා නිරීක්ෂණය කිරීමේ මධ්‍යස්ථානය පෙන්වා දෙන්නේ.

එම දෙසතිය තුලදී අපේ ජන බල පක්ෂය මිලියන 13ක මුදලක් සහ ශ්‍රී ලංකා නිදහස් පක්ෂය මිලියන 5ක මුදලක් තම මැතිවරණ ප්‍රචාරක කටයුතු වෙනුවෙන් වෙන් කර ඇති බව CMEV පවසයි.

සති දෙකක කාල සීමාව තුලදී රුපියල් මිලියනය අවම මුදලක් තම ප්‍රචාරණ කටයුතු සඳහා යොදාගෙන ඇත්තේ ඉලංකෙයි තමිල් අරසු කච්චි පක්ෂය වන අතර ඒවා වෙනත් වියදම් ලෙස එම පක්ෂය යොදා ගෙන ඇති බවටයි මැතිවරණ ප්‍රචණ්ඩ ක්‍රියා නිරීක්ෂණය කිරීමේ මධ්‍යස්ථානය (CMEV) නිකුත් කළ වාර්තාවේ දැක්වෙන්නේ.