“රාජ්‍යයන්හී අභ්‍යන්තර කටයුතු වලට මැදිහත් නොවන්න” ජනපති එක්සත් ජාතීන්ගෙන් ඉල්ලයි

රාජ්‍යයන්හී අභ්‍යන්තර කටයුතුවලට මැදිහත් නොවීම එක්සත් ජාතීන්ගෙන් අපේක්ෂා කරන බව ජනාධිපතිවරයා ජාත්‍යන්තර සමුළුවකදී පවසා තිබේ.

එක්සත් ජාතීන්ගේ 75 වන සංවත්සරයට සමගාමීව පැවති ඉහළ පෙළේ එක් දින සමුළුවක් වීඩියෝ තාක්ෂණය ඔස්සේ අමතමින් සැප්තැම්බර් 21 වනදා ජනාධිපති ගෝඨාභය රාජපක්ෂ මේ බව ප්‍රකාශ කර ඇත.

ලෝකය පොදු හා අසමාන තර්ජනයකට මුහුණ පා සිටින බව පෙන්වා දී ඇති ජනපති “අපට අවශ්‍ය එක්සත් ජාතීන්” (United Nation We Need) යන පාඨය රාජ්‍යයන්ගේ ස්වෛරි සමානාත්මතාවට සහ භෞමික අඛණ්ඩතාවට දක්වන ගෞරවය නිසි අවධානයට ලක් කරනු ඇතැයි තමා විශ්වාස කරන බව පැවසු බවයි ජනාධිපති මාධ්‍ය අංශය නිවේදනය කරන්නේ.

සුළු පිරිසකගේ අවශ්‍යතාවට කිසිදු රටක් ප්‍රාණ ඇපයට නොගැනීමෙන්, සාමාජික රටවල් සහ එක්සත් ජාතීන් අතර හවුල්කාරිත්වය මෙන්ම එක්සත් ජාතීන්ගේ තිරසර පැවැත්ම උපරිමයෙන් සාක්ෂාත් කරගත හැකි බව ද ජනාධිපතිවරයා සඳහන් කර තිබේ.

මහා මණ්ඩල සැසිවාරයේ සභාපති වොල්කන් බොස්කීර් සහ එක්සත් ජාතීන්ගේ මහ ලේකම් අන්තෝනියෝ ගුතේරස් 75 වන සමුළුවේ පළමු සහ දෙවන ප්‍රකාශ කළ අතර රාජ්‍ය නායකයෝ 180 දෙනෙක් වීඩියෝ තාක්ෂණය ඔස්සේ සමුළුව ඇමතූහ.

එක්සත් ජාතීන්ගේ සංවිධානය ශක්තිමත් කිරීමට ගනු ලබන ප්‍රයත්නයන් එහි සාමාජිකයෙකු වන අපගේ අනාගතය සහතික කිරීම පිණිස ඉවහල් වනු ඇති බවට ජනාධිපති ගෝඨාභය රාජපක්ෂ විශ්වාසය පළ කළ බවයි ජනාධිපති මාධ්‍ය අංශය නිකුත් කරන ද නිවේදනයේ වැඩි දුරත් සඳහන් කර ඇත්තේ.