දිවයිනට බලපා ඇති තද සුළං සහ වැසි හේතුවෙන් දිස්ත්‍රික්ක තුනක හත් දෙනකු මියගොස් ඇතැයි පවසන රජය අවදානම් සහගත තත්වය තවමත් පහව ගොස් නැති බවට අනතුරු අඟවයි.
ගාල්ල සහ බදුල්ල දිස්ත්‍රික්ක වල තුන්දෙනකු බැගින්ද ගම්පහ දිස්ත්‍රික්කයේ එක් අයකුද මරුමුවට පත් වී තිබේ.
අයහපත් කාළගුණ තත්ත්වයෙන් පවුල් 14617 ක පුද්ගලයින් 55855 ක් පීඩාවට පත්ව ඇති බව ආපදා කළමාණකරණ මධ්‍යස්ථානය 01 සිකුරාදා උදෑසන නිකුත් කල නිවේදනයේ සඳහන් වේ.
කාලගුණයේ අයහපත් බලපෑමෙන් පීඩාවට පත් දහඅට දහසකට අධික ජනකායෙන් වැඩිම පිරිස වන 34336 වාර්තා වන්නේ බස්නාහිර පළාතේ බව එම මධ්‍යස්ථානය නිකුත් කරයි.
නිල්වලා, ගිං සහ කළු ගංගාවල ජල මට්ටම සීග්‍රයෙන් ඉහල යමින් පවතින හෙයින් ගඟ දෙපස ජනතාව විමසිලිමත්ව සිටිය යුතු බව පවසන ආපදා කලමණාකරන මධ්‍යස්ථාන ප්‍රකාශක ප්‍රදීප් කොඩිප්පිලි කුකුලේගඟ වාන් දොරටු දෙකක් විවෘත කිරීම නිසා පිටවන ජලධාරාවේ බලපෑමට හසු වීමේ අවදානමට ලක්වීමට නියමිත අගලවත්ත, බදුරලිය, ඉංගිරිය, මිල්ලනිය සහ මදුරාවල අවට ජනතාවට දැනුම් දුන් විගස ඉවත් වීමට සුදානම් වී සිටින ලෙස ඉල්ලා සිටී.
රත්නපුර, බදුල්ල සහ මාතලේ දිස්ත්‍රික්කයන් සඳහා ජාතික ගොඩනැගිලි පර්යේෂන සංවිධානය විසින් නිකුත් කල නාය යාමේ අවධානම සහිත රතු නිවේදනය තවදුරටත් වලංගු බව එම සංවිධානය පවසයි.
Facebook Comments
