පසුගිය දිනවල දී වාර්තා වූ දළ ඇතුන් මරා දැමීමේ සිද්ධි පිළිබඳ පරීක්ෂ අපරාධ පරීක්ෂණ දෙපාර්තමේන්තුවට පවරන්න යැයි නීතිය හා සාමය සහ දක්ෂිණ සංවර්ධන අමාත්‍ය සාගල රත්නායක මහ විසින් වැඩබලන පොලිස්පති, ජ්‍යෙෂ්ඨ නියෝජ්‍ය පොලිස්පති සී.ඩී. වික්‍රමරත්න නියෝග කොට ඇතැයි රජය පවසයි.
දිවයිනේ විවිධ ප්‍රදේශවලින් දළ ඇතුන් මරා දැමීමේ සිද්ධි කීපයක් පසුගිය දින කිහිපය පුරා වාර්තා වූ අතර ගල්ගමුවේ දළ පූට්ටුවා නැමැති දළ ඇතාගේ දළ යුගල පසුගියදා පොල්පිතිගම ප්‍රදේශෙයේ දී අත්අඩංගුවට ගන්නා ලදී.
මේ අතර පසුගිය දා තබ්බෝව රක්ෂිත මායිමේ දී තවත් දළ ඇතෙකු වෙඩි තබා ඝාතනය කර තිබූ අතර කතරගම ප්‍රදේශයේ දී ගසක බැඳ දමා සිටි වන අලි පැටවෙකු සොයාගැනීමට පොලීසියට හැකි විය.
එම කරුණු සියල්ල සලකා බලා දළ ඇතුන් මරාදැමීම සහ වන අලි ජාවාරම පිලිබඳ පරීක්ෂණ අපරාධ පරීක්ෂණ දෙපාර්තමේන්තුවට පවරන්නැයි අමාත්‍යවරයා නියෝග කල බවයි රජය වැඩි දුරටත් නිවේදනය කරන්නේ.
ඇත් දළ ලබා ගැනීමේ අරමුණින් මරා දමන්නට ඇතැයි විශ්වාස කෙරෙන ගල්ගමුව, සියඹලන්ගමුව ප්‍රදේශයේ සැරිසැරු “දළ පූට්ටුවා” නැමැති ඇතාගේ ඝාතකයන් සම්බන්ධයෙන් දැඩි නීතිමය පියවර ගන්නා බව තිරසර සංවර්ධන හා වනජීවී අමාත්‍යවරයා 29 බදාදා පාර්ලිමේන්තු සංකීර්ණයේ පැවැති මාධ්‍ය හමුවකදී කියා සිටියේය.
එම ඝාතනය පිටුපස බලවත් අය කවුරු වුවත් ඒ අයට විරුද්ධව කටයුතු කරන බව අමාත්‍ය ගාමිණී ජයවික්‍රම පෙරේරා වැඩි දුරටත් අවධාරණය කළේය.
Facebook Comments
