මහර බන්ධනාගාර ගැටුමේ පුර්ණ වාර්තාව මසක් තුලදී

0

රැදවියන් එකොලොස් දෙනෙකුට දිවි අහිමි කර, සීයකට අධික පිරිසකට තුවාල සිදුකළ මහර බන්ධනාගාරයේ ගැටුම පිළිබදව සොයා බැලීම සදහා අධිකරණ අමාත්‍යවරයා විසින් පත් කළ කමිටුවේ අතුරු වාර්තාව ඔහු වෙත ලැබී තිබේ.

කමිටුවේ සභාපතිනි හිටපු මහාධිකරණ විනිසුරු කුසලා සරෝජිනී වීරවර්ධන විසින් අදාළ අතුරු වාර්තාව දෙසැම්බර් 7 සදුදා පස්වරුවේ අධිකරණ අමාත්‍ය ජනාධිපති නීතිඥ මොහොමඩ් අලි සබ්රි වෙත භාර දුන් බව අධිකරණ අමාත්‍යාංශ්‍ය නිවේදනය කර ඇත.

එය හඳුන්වා ඇත්තේ “මහර බන්ධනාගාරයේ ඇතිවු සිද්ධිය පිළිබදව සොයා බලා වාර්තා කිරිමට පත් කළ කමිටුවේ අතුරු වාර්තාව” ලෙසිනි.

අධිකරණ අමාත්‍යවරයාගේ සම්බන්ධිකරණ ලේකම් නීතිඥ නලින් සමරකෝන් විසින් නිකුත් කර තිබෙන මාධ්‍ය නිවේදනය මගින් දැනුම් දී ඇත්තේ අදාළ කමිටුව පුර්ණ වාර්තාවක් මසක් තුළ ඉදිරිපත් කිරීමට නියමිත බවයි.

අද දින අමාත්‍යවරයාට බාර දුන් කමිටුවේ අතුරු වාර්තාව ප්‍රසිද්ධියට පත් කරන්නේදැයි එම නිවේදනයේ සඳහන් නොවේ.

හිටපු මහාධිකරණ විනිසුරු කුසලා සරෝජිනී වීරවර්ධන විසින් අදාළ අතුරු වාර්තාව අධිකරණ අමාත්‍යවරයා වෙත භාරදීම සිදු කළ අවස්ථාවට බන්ධනාගාර හා සිරකරුවන් පුනරුත්ථාපන අමාත්‍ය ලොහාන් රත්වත්තේ සහ කමිටුවේ සාමාජිකයන් වන ජනාධිපති නීතිඥ යු.ආර්.ද සිල්වා අධිකරණ අමාත්‍යාංශයේ අතිරේක ලේකම් රෝහන හපුගස්වත්ත හිටපු බන්ධනාගාර කොමසාරිස් ගාමිණි ජයසිංහ විශ්‍රාමික ජ්‍යෙෂ්ඨ නියෝජ්‍ය පොලිස්පති ඩී.ආර්.එල් .රණවීර ද සහභාගී වී ඇත.

එහිදි අදහස් දක්වමින් අධිකරණ අමාත්‍ය ජනාධිපති නීතිඥ මොහොමඩ් අලි සබ්රි පවසා ඇත්තේ කොවිඩ් 19 වෛරසයේ දෙවන රැල්ල බන්ධනාගාරය තුළ ව්‍යාප්ත වු පසු 2020 ඔක්තෝම්බර් 12 දින වන විට බන්ධනාගාර තුළ සිරකරුවන් 32200 ක් සිටි නමුත් දෙසැම්බර් 5 වන විට එය සිරකරුවන් 26364 ක් දක්වා අඩු කර තිබෙන බවයි.

“දින කිහිපයක් තුළ 6000 ක් අපි නිදහස් කර තිබෙනවා. සමස්ත බන්ධනාගාර පද්ධතිය තුළ පවතින ක්‍රමවේදය පිළිබදව සලකා බැලිය යුතුයි.මත් ද්‍රව්‍ය වලට යොමු වුවන් පුනරුත්ථාපනය කිරීම අපේ අරමුණයි.සමස්ත බන්ධනාගාර පද්ධතියම යහපත් කිරීම සිදු කළ යුතුයි.”

සිර කදවුරු වෙනුවට පුනරුත්ථාපන කදවුරු ඇති කර විශේෂයෙන් මත් ද්‍රව්‍යවලට ඇබ්බැහි වු අය ඒ තුළින් මුදවා ගැනීම සිදු කළ යුතු බව අමාත්‍යවරයා වැඩි දුරටත් සදහන් කර තිබේ.

මත් ද්‍රව්‍ය වලට ඇබ්බැහි වූවන් බන්ධනාගාරගත කිරීම යෝග්‍ය නොවන බව අවධාරණය කරන ඉකුත්දා නිකුත් කළ ශ්‍රී ලංකා මානව හිමිකම් කොමිසමේ විශේෂ අධ්‍යයන වාර්තාවක් ඔවුන් පුනරුත්ථාපනය කළ යුතු බව නිර්දේශ කර තිබේ.

Facebook Comments

wedding people