විරෝධතාවක යෙදී සිටියදී අත්අඩංගුවට ගන්නා ලද මෙරට ප්‍රමුඛ පෙළේ ශිෂ්‍ය සංවිධානයක නායක හිමිනමකට පොලිස් නිලධාරීන් පරුෂ වචනයෙන් බැන වදින අයුරු අග නගරයේ මාධ්‍යවේදීන්ගේ කැමරාකාචයට හසුවී තිබේ.
අගමැති නිල නිවස වන අරලියගහ මන්දිරය ඉදිරිපිට ජනවාරි 12 අගහරුවාදා පැවති උද්ඝෝෂණයක දී පොලීසිය විසින් අත්අඩංගුවට ගත් අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කාර රත්කරව්වේ ජිනරතන හිමියන් සුදු පැහැති රථයකට නංවා ගැනීමට උත්සාහ දරන අතරතුරදී වාහනයට නැගීමට කැමැත්ත පළ කළ හිමියන්ට පොලිස් නිලධාරියකු පවසා තිබුනේ “නැගපං එහෙනම් පරයා” යනුවෙනි.
2019 වසරේ උසස් පෙළ කඩඉම් ලකුණු ගැටලුවෙන් අසාධාරණයට පත් සියලු දෙනා විශ්වවිද්‍යාලවලට වහා බඳවාගන්නා ලෙස ඉල්ලමින් අගමැති නිල නිවාස අසළ විරෝධතාවය දියත් කර තිබුනි.
සිසු ඉල්ලීම් අගමැතිවරයා වෙත ඉදිරිපත් කිරීම සදහා අගමැති නිල නිවස ඉදිරිපිටට පැමිණි බව අන්තර් විශ්වවිද්‍යාලයීය ශිෂ්‍ය බලමණ්ඩලයේ නියෝජිතයන් විරෝධතාවයට බාධා කළ සහකාර පොලිස් අධිකාරිවරයකුට පවසන අයුරුද වීඩියෝ ගත වී තිබේ.
පොලීසිය පවසන්නේ, විරෝධතාවය අතරතුර ශබ්ද විකාශන යන්ත්‍ර භාවිත කිරීම හේතුවෙන් හිමියන් අත්අඩංගුවට ගත් බවයි.
එම ස්ථානයේ ශබ්ද විකාශන යන්ත්‍ර භාවිත කළහොත් අත්අඩංගුවට ගන්නා බවට පොලීසිය පුර්ව දැනුම් දීමක් කළත් අත්අඩංගුවට ගන්නා ලෙස අභියෝග කරමින් අන්තර් විශ්වවිද්‍යාලයීය ශිෂ්‍ය බලමණ්ඩලයේ කැඳවුම්කර හිමියන් ශබ්ද විකාශන යන්ත්‍රය භාවිත කරන අයුරුද අග නගරයේ මාධ්‍යවේදීන්ගේ කැමරාකාචයට හසුව තිබේ.
මෙම විරෝධතාවය සංවිධානය කර තිබුනේ නිදහස් අධ්‍යාපනය උදෙසා සිසු ජන ව්‍යාපාරය විසිනුයි.
Facebook Comments
