මහර ඝාතන සියසින් දුටු අයට වධහිංසා කරන බවට චෝදනා (VIDEO)

0

එකොලොස් දෙනෙකු වෙඩි තබා මරා දැමූ මහර සිරගෙදර සමුලඝාතන අපරාධය ඇසින් දුටු සාක්ෂිකරුවන්ට වධහිංසා පමුණුවමින් ඔවුන් බන්ධනාගාරය තුළ බලහත්කාරයෙන් සිරකොටගෙන සිටින බවට බන්ධනාගාර පාලනාධිකාරියට එරෙහිව චෝදනා එල්ල වී තිබේ.

සිද්ධිය ඇසින් දුටු ඇප ලබා සිටින රැඳවියන් නිදහස් කර නොයවා පිටතට ඒම වලක්වා මහර සමුලඝාතනයේ සාක්ෂි වසන් කිරීමට බලධාරීන් වීරිය කරන බව දිගටම එල්ල වී ඇති චෝදනාවකි.

උසාවිය සහ රහස් පොලිසිය විමර්ශන පවත්වද්දී සාක්ෂිකාර රැඳවියන්ට බලපෑම් සහ වධහිංසා පමුණුවමින් බලහත්කාර ප්‍රකාශ ලබා ගැනීමේ උත්සාහයක් පවතින බව සිරකරු අයිතිවාසිකම් සුරැකීමේ සංවිධානය ජනාධිපතිවරයාටද දන්වා යවා තිබේ.

අධිකරණය විසින් ඇප ලබා දී තිබියදීත් මාස දෙකකට අධික කාලයක් තිස්සේ සිය පුතු නිදහස් නොකොට රදවාගෙන සිටින බවට එක් පියකු චෝදනා කළේ රැඳවියන්ට හිංසා කිරීම වහා නවතනු තේමාව පෙරටු කරගනිමින් ගම්පහ දිසා අධිකරණය ඉදිරිපිට දියත් කළ නිහඩ විරෝධතාවකට එක්වෙමිනි.

“දැන් මාස දෙකක් වෙනවා එළියට දුන්නේ නෑ. ඇතුලේ තියාගෙන හිටියා. ඉඳලා අහක්වෙලා දැන් ගහනවා. හොදටම ගගහ කාමරවලට දානවලු සැක පිටයි කියලා,” යි ඇන්තනී සිල්වා කියා සිටියේය.

සිය පුතු බන්ධනාගාර නිලධාරීන් විසින් බලහත්කාරයෙන් රදවාගෙන සිටි බවට චෝදනා නගන ඇන්තනී සිල්වා පියා වැඩි දුරටත් පවසන්නේ රැදවියන්ගේ අවම සනීපාරක්ෂක පහසුකම් වලට පවා බන්ධනාගාර නිලධාරීන් හරස් වී ඇති බවයි.

“ඒ ළමයිට කන්න දෙන්නේ නෑ. ටොයිලට් යන්න දෙන් නෑ. සිලි කවරයක් දෙනවලු පස් දෙනෙකුට ටොයිලට් යන්න. වතුර ටිකක් බොන්න දෙන්නේ නෑ. කන්ද දෙන්නේ නැ. මතක් වෙන මතක් වෙන ගානේ එක එක නිලධාරී ඒ කියන්නේ බන්ධනාගාර නිලධාරීන් ඇවිල්ලා එලියට අරගෙන කාමරෙන් ගහලා ආයි ඇතුලට දාලා අහක්වෙලා වහනවාලු. ”

වසංගත සමයේ පෝෂ්‍යදායක ආහාර අවශ්‍ය මොහොතක රැඳවියන්ට නිසි පරිදි ආහාර නොලැබෙන බව පෙන්වා දෙන ඇන්තනී සිල්වා පියා තව දුරටත් අවධාරණය කර සිටියේ දරුවන්ගේ ජීවිත වලට අනතුරක් සිදු වුවහොත් බන්ධනාගාර නිලධාරීන් එහි වගකීම බාර ගත යුතු බවයි.

අතපය කඩා දැමු රැඳවියන් කිහිප දෙනෙකුම කිසිදු සොයා බැලීමකින් තොරව පැත්තකට දමා සිටින බවටද ජනවාරි 18 සඳුදා පැවැති නිහඩ විරෝධතාවය අතරතුරදී පළාත් බද මාධ්‍යවේදීන් සමග ඇන්තනී සිල්වා පියා සදහන් කර තිබුනි.

අධිකරණය විසින් ඇප ලබා දී තිබියදීත් බන්ධනාගාර නිලධාරීන් විසින් තව දුරටත් රඳවාගෙන සිටින කිහිප දෙනකුගේම පවුල් වල ඥාතීහු විරෝධතාවට එක්ව සිටියහ.

සිරකරු අයිතිවාසිකම් සුරැකීමේ කමිටුවේ ප්‍රධාන ලේකම් සුදේශ් නන්දිමාල් සිල්වා එහිදී සදහන් කළේ මහර බන්ධනාගාරයේ සිදුවු අමානුෂික සිරකරු ඝාතනය සාධාරනීකරණය කර ගැනීම සදහා ඇප නියම වී සිටින රැදවියන්ට නඩු පැවරීමට වැඩ පිළිවෙලක් බන්ධනාගාර නිලධාරීන් විසින් දියත් කර තිබෙන බවයි.

“අපිට විශාල සැකයක් තියනවා මේ සම්බන්ධව මේ ඝාතකයන්ව ආරක්ෂා කරන්න මේක බැලන්ස් කරන්නද මේ නඩුවක් පවරන්නේ කියන සැකය අපිට තියනවා. මොකද දැන් මේ ඇප දීපු රැඳවියන්ව එළියට දාන්නේ නැතුව බන්ධනාගාරය තුළ රදවාගෙන තියන එකේන්ම පේනනේ මේ සාක්ෂි විනාශ කිරීමේ උත්සාහයක්.”

බන්ධනාගාර නිලධාරීන්ගේ ක්‍රියා කලාපය නීති විරෝධී මෙන්ම සිරකරුවන්ගේ මානව හිමිකම් උල්ලංඝනයක් බව සුදේශ් නන්දිමාල් සහ නීතිඥ සේනක පෙරේරා සිරකරු අයිතිවාසිකම් සුරැකීමේ කමිටුව වෙනුවෙන් ජනාධිපතිවරයාට ලියා දන්වා ඇත.

එය නවත්වා දැමීමට වහාම මැදිහත් වන ලෙස ජනාධිපති ගෝඨාභය රාජපක්ෂගෙන් ඉල්ලා සිටින ලිපිය යවා ඇත්තේ රැඳවියන්ගේ ඥාතීන් විසින් අත්සන් කරන ලද සන්දේශයක් ද සහිතවය.

එකොලොස් දෙනකු මරා දමමින් සියයකට වැඩි පිරිසකට තුවාල සිදු කළ මහර බන්ධනාගාරයේ සමුලඝාතක ප්‍රහාරයෙන් මිය ගිය සියලු දෙනාගේම මරණ සිදුව ඇත්තේ වෙඩි පහරින් බව මේ වන විට අධිකරණය හමුවේ තහවුරු වී තිබේ.

Facebook Comments

wedding people