“ජාත්‍යන්තර අවධානය” සඳහා අංගම්පොර දියුණු කිරීමේ සැලැස්මක්

සංචාරක ව්‍යාපාරය ඔස්සේ ආර්ථික අභිවෘද්ධිය ඇති කිරීම අරමුණු කරගනිමින් අංගම්පොර සටන් කලාව ප්‍රවර්ධනය කිරීම කෙරෙහි රජයේ අවධානය යොමුව තිබේ.

“මෙම සටන් කලාව ප්‍රවර්ධනය කිරීම මගින් ජාත්‍යන්තර අවධානය දිනාගැනීමටත්, සංචාරක ව්‍යාපාරය ඔස්සේ ආර්ථික අභිවෘද්ධිය ඇති කරගැනීමටත් අමාත්‍යාංශය අපේක්ෂා කරයි. ”

රජයේ ප්‍රවෘත්ති දෙපාර්තමේන්තුව 2021 ජනවාරි 21 බ්‍රහස්පතින්දා නිකුත් කර තිබෙන නිවේදනයක දැක්වෙන පරිදි දේශිය සාම්ප්‍රදායික ක්‍රීඩා සංවර්ධනය කිරීමේ රජයේ ප්‍රතිපත්තිය යටතේ ” දේශිය ක්‍රීඩාවයි තරුණ ජවයයි 2021″ව්‍යාපෘතිය ග්‍රාමීය පාසල් ක්‍රීඩා යටිතල පහසුකම් ප්‍රවර්ධන අමාතාංශය මගින් ආරම්භ කර ඇත.

එම නිවේදනයේ වැඩි දුරටත් සදහන්ව ඇත්තේ අමාත්‍යාංශය මගින් සිදු කළ අධ්‍යනයකදී දේශිය සාම්ප්‍රදායික ක්‍රීඩා දහසකට අධික ප්‍රමාණයක් පවතින බව හදුනාගෙන ඇති අතර එම ක්‍රීඩා අතුරින් වඩා ක්‍රියාශිලී ක්‍රීඩා අංගයක් වශයෙන් අංගම්පොර සටන් කලාව හදුනාගෙන තිබෙන බවයි.

පාරම්පරික අංගම්පොර සටන් ශිල්පීන් හදුනාගෙන ඔවුන් සටන් උපදේශකයන් ලෙස අමාත්‍යාංශයේ අධික්ෂණය යටතේ අංගම්පොර පුහුණු වැඩසටහන් සදහා සම්පත් දායකයන් වශයෙන් සම්බන්ධකරගැනීමටද නියමිත බව රජය වැඩි දුරටත් පවසයි.

අංගම්පොර නීත්‍යානුකූල කිරීම

මෙරට තුළ තහනම් කර තිබු අංගම්පොර සටන් කලාව නීත්‍යානුකූල සටන් කලාව ක් බවට පත් කිරීමට මෛත්‍රීපාල සිරිසේන ජනපතිගේ සහ රනිල් වික්‍රමසිංහ අගමැතිගේ නායකත්වයෙන් යුත් කැබිනට් මණ්ඩලයේදී ඒකමතිකව අනුමැතිය හිමි වූ බව එවකට නිවාස, ඉදිකිරීම් හා සංස්කෘතික කටයුතු අමාත්‍ය සජිත් ප්‍රේමදාස 2019 වසරේ මාර්තු මසදී පවසා තිබුනි.

එහිදී අමාත්‍යවරයා වැඩි දුරටත් පවසා තිබුනේ “ඌව වෙල්ලස්ස කැරැල්ලේ සෙන්පතිවරුන්ට ඉමහත් සවියක් වූ අංගම්පොර සටන් කලාව මේ වන තුරු තහනම් සටන් කලාව ක් බවට පත්ව තිබුණා. ඌව වෙල්ලස්ස කැරැල්ල සමග අධිරාජ්‍යවාදීන් අංගම්පොර සටන් කලාව තහනම් සටන් කලාව ක් බවට තහංචි පනවනු ලැබුවා. මෙතෙක් තහනමට ලක්ව තිබූ අංගම්පොර සටන් කලාව නීත්‍යානුකූල සටන් කලාව ක් බවට පත් කරන්නට යහපාලන රජයේ ජනාධිපතිතුමාගේ සහ අගමැතිතුමාගේ නායකත්වයෙන් යුතු කැබිනට් මණ්ඩලයේදී ඒකමතිකව තීරණය කරනු ලැබුවා” යනුවෙනි.

යුධ හමුදාවටත් අගම්පොර

වසර 5000 කට අධික ඉතිහාසයකට උරුමකම් කියන බව පැවසෙන ‘අංගම්පොර’ සටන් කලාව අඛණ්ඩව පුනර්ජීවනය කිරීම සඳහා ශ්‍රී ලංකා යුද්ධ හමුදාව කිලිනොච්චි ආරක්‍ෂක සේනා මූලස්ථානයට යාබදව පිහිටි ඉරානමඩු වැව් බැම්ම අසල ස්ථාපිත කරන ලද ‘අංගම්පොර’ සටන් කලා ගම්මානයක් 2019 වසරේ ජුලි 26 දා විවෘත කර තිබුනි.

මෙම ‘අංගම්පොර’ සටන් කලා ගම්මානය එවකට යුද්ධ හමුදාධිපති ලුතිනන් ජෙනරාල් මහේෂ් සේනානායක විසින් විවෘත කිරීමෙන් අනතුරුව සාම්ප්‍රදායික ආයුධ වන එතුනු කඩු, කඩු, යුධ පොරවවල්, කිනිසි හා අත්මුගුරු සමඟ ඒකාබද්ධව කරන සුවිශේෂී අත්-සටන්වලින් සමන්විත ‘අංගම්පොර රණශූරයන් සමඟ දිනක් ගත කළ හැකි’ සහ අනාගතයේ දී ඔවුන්ගේ දෛනික පුහුණුව පිළිබඳව හුරුපුරුදු විය හැකි සියලු අපේක්ෂකයන් සඳහා පුහුණු මධ්‍යස්ථානයක් ලෙස මෙම ‘අංගම්පොර’ ගම්මානය පවත්වාගෙන යාහැකි බව කිලිනොච්චි ආරක්‍ෂක සේනා ආඥාපති මේජර් ජෙනරාල් විජිත රවිප්‍රිය පවසා තිබුනි.

ශ්‍රී ලංකා යුද්ධ හමුදාව රාජ්‍ය අනුග්‍රහය ඇතිව පානගොඩ හමුදා කඳවුරේ ස්ථාපිත කරන ලද ශ්‍රී ලංකාවේ ප්‍රථම අංගම්පොර පර්යේෂණ ආයතනය සහ පුහුණු මධ්‍යස්ථානය විවෘත කිරීම මෙන්ම පුහුණුව ලැබු යුද්ධ හමුදා අංගම්පොර සටන්කරුවන්ගේ කලඑලි මංගල්‍යය 2018 දෙසැම්බර් මස 04 වන දින එවකට යුද්ධ හමුදාධපති ලුතිනන් ජෙනරාල් මහේෂ් සේනානායකගේ ප්‍රධානත්වයෙන් පැවැත්විණි.

‘අංගම්පොර’ සටන් කලාව දේශීය ආත්මාරක්‍ෂක සටන් කලාවක් ලෙස ඉපැරණි ශ්‍රී ලාංකීක රාජකීයයන් භාවිතා කළ අතර නිල සටන් කලාව , මායා අංගම්, යන්ත්‍ර මන්ත්‍ර ගුරුකම්, වෙදහෙදකම්, භාවනා ක්‍රම, නක්‍ෂත්‍රය ඇතුළු ලක්‍ෂණ රැසකින් ද මෙම සටන් කලාව සමන්විත වේ.

විදේශිකයන් රට ආක්‍රමණය කල අවස්ථාවල දී අංගම්පොර ශිල්පීන් විසින් විදේශිය හමුදාව වෙත ප්‍රහාර එල්ල කරමින් විදේශිය හමුදා ශක්තිය විනාශ කර ඇති අතර විදේශිය ආක්‍රමණිකයන් පසුකාලීනව ‘අංගම්පොර’ සටන් කලාව මෙරට තුළ භාවිතය තහනම් කර ඇති බව පැවසේ.