ඩොලර් කෝටි ගණනක විදේශ විනිමය අහිමි වීමේ අවදානමේ ශ්‍රී ලංකාව හෙලා තිබෙන ත්‍රස්ත නීති යොදාගෙන හත් මාසයක් තිස්සේ අත්අඩංගුවේ දමා සිටින බස්නාහිර පළාත් හිටපු ආණ්ඩුකාර අසාද් සාලි ගොනු කළ මූලික අයිතිවාසිකම් පෙත්සමක් විභාගයට ගැනීමට ශ්‍රේෂ්ඨාධිකරණය අවසර ලබා දී තිබේ.
නීතිවිරෝධී ලෙස අත්අඩංගුවට ගෙන ත්‍රස්තවාදය වැළැක්වීමේ පනත යටතේ රඳවා ගැනීමට අපරාධ පරීක්ෂණ දෙපාර්තමේන්තුව ගත් තීරණය නිසා තම මූලික අයිතිවාසිකම් කඩවී ඇති බවට තීරණය කරන්නැයි ඉල්ලා බස්නාහිර පළාත් හිටපු ආණ්ඩුකාර, ජාතික සමගි පෙරමුනේ නායක අසාද් සාලි ගොනු කළ පෙත්සම විභාග කිරීමට ජයන්ත ජයසූරිය, එස්. තුරෙයිරාජා සහ යසන්ත කෝදාගොඩ ශ්‍රේෂ්ඨාධිකරණ ත්‍රිපුද්ගල විනිසුරු මඩුල්ල විසින් නියෝග කරන ලදී.
නීතිපති, පොලිස්පති, රහස් පොලිස් අධ්‍යක්ෂක නිෂාන්ත ද සොයිසා, එහි ප්‍රධාන පොලිස් පරීක්ෂක ජයන්ත පයාගල, මහජන ආරක්ෂක අමාත්‍ය සරත් වීරසේකර, එම අමාත්‍යාංශයේ ලේකම් මේජර් ජනරාල් (විශ්‍රාමික) ජගත් අල්විස් පෙතමේ වග උත්තරකරුවන් ලෙස නම් කොට ඇත.
ඉකුත් මාර්තු 09 වැනිදා ප්‍රවෘත්ති සාකච්ඡාවක් පවත්වා `ශ්‍රී ලංකාවේ මුස්ලිම් ජනතාවගේ කටයුතු මුස්ලිම් නීතියට අනුව සිදුවිය යුතුයැයි` අවධානය යොමු කරවීම මාධ්‍ය මගින් ප්‍රචාරය වීමෙන් පසු විවිධ පුද්ගලයන් ඒ ගැන විවිධ අදහස් දක්වන ලද බවත්, මහජන ආරක්ෂාව පිළිබද අමාත්‍ය සරත් වීරසේකර ප්‍රවෘත්ති සාකච්ඡාවක් පවත්වා , “තමන් පිළිබදව ද්වේශ සහගතව ප්‍රකාශ කිහිපයක්ද සිදු කළ” බව පෙත්සම මගින් පෙන්වා දෙන බස්නාහිර පළාත් හිටපු ආණ්ඩුකාර අසාද් සාලි වැඩි දුරටත් අවධාරණය කර ඇත්තේ “තමා කිසිදු ආකාරයකින් පාස්කු ඉරැදින ප්‍රහාරයට හෝ මාවනැල්ල බුදු පිළිම කඩා බිද දැමීමට සම්බන්ධ නොමැති” බවය. එම පුවත් පත් සාකච්ජාවෙන් අනතුරුව මාර්තු 16 වැනිදා අසාද් සාලි අපරාධ පරීක්ෂණ දෙපාර්තමේන්තුව මගින් අත් අඩංගුවට ගනු ලැබුවේ ඔහු පළකළ අදහස්වලින් ජාතීන් අතර සහෝදරත්වය හා සංහිඳියාව බිඳහෙළීමට ක්‍රියා කළේ යැයි චෝදනා කරමින්ය.
සැප්තැම්බර් 21 වැනිදා අසාද් සාලි වෙනුවෙන් ඉදිරිපත් කළ ඇප අයදුම්පත සලකා බැලූ කොළඹ මහාධිකරණ විනිසුරු මංජුල තිලකරත්න කියා සිටියේ වෙනත් අධිකරණයක අධි චෝදනා ගොනු කර ඇති බැවින් ඉල්ලීම සලකා බැලීමට නොහැකි බවයි.
මෙම නඩු විභාගයේදී හෙළි වූයේ කොළඹ ප්‍රධාන මහේස්ත්‍රාත් බුද්ධික සී රාගල විසින් මීට පෙර අවස්ථාවක නියෝගයක් ලබා දෙමින් ප්‍රකාශ කර ඇත්තේ මාධ්‍ය හමුවකදී අසාද් සාලි ප්‍රකාශ කළ අදහස් හා රුපවාහිනි නාලිකා විසින් ප්‍රචාරය කරන ලද දර්ශන අතර දැඩි පරස්පරයක් ඇතැයි පෙනෙන්නට තිබූ බවයි.
සංස්කරණය නොකළ මාධ්‍ය සාකච්ඡාවේ සම්පූර්ණ හඬ පට ප්‍රකාශයට පත් කළේ නම් සැකකරු “ජනතාව අතර සාමය ගොඩනැගීමට සහ එක ජාතියක් ලෙස නැගී සිටීමේ අදහස” ප්‍රකාශ කළ බව පැහැදිලි වන බව ප්‍රධාන මහේස්ත්‍රාත්වරයා නිරීක්ෂණය කර තිබේ. ජනමාධ්‍ය විසින් ප්‍රකාශයට පත් කොට ඇත්තේ සංස්කරණය කරන ලද්දකි.
අපරාධ පරීක්ෂණ දෙපාර්තමේන්තුව විසින් “ත්‍රස්තවාදය වැළක්වීමේ පනත යටතේ ඉදිරිපත් කර ඇති වාර්තාවෙන් ඔහුට එරෙහි කිසිදු වරදක් අනාවරණය නොවන බැවින්” අසාද් සාලි මුදාහැරීමේ නියෝගයක් නිකුත් කරන ලෙස ජනාධිපති නීතිඥ මෛත්‍රී ගුණරත්න අධිකරණයෙන් ඉල්ලා සිටීමෙන් අනතුරුව, “තම අවශ්‍යතාවයට ගැලපෙන පරිදි මුල් පිටපත විකෘති කළ පුද්ගලයන් ගැන අපරාධ පරීක්ෂණ දෙපාර්තමේන්තුව සොයා බැලිය යුතුයැ,” යි කොළඹ ප්‍රධාන මහේස්ත්‍රාත් පැවසීය.
“එම මාධ්‍ය හමුවම පදනම් කරගෙන මහාධිකරණයට අධි චෝදනා ගොනු කර තිබූ බැවින් සැකකරු නිදහස් කිරීමට ඔහුට බලයක් නොමැති” බව කොළඹ ප්‍රධාන මහේස්ත්‍රාත්වරයා පවසා තිබේ.
දෙසැම්බර් 15 වැනිදා ආරම්භවීමට නියමිත අසාද් සාලි ගේ මුලික අයිතිවාසිකම් පෙත්සම් විභාගයට අදාළව ප්‍රතිවිරෝධතා ඇත්නම් නොවැම්බර් 19 වැනිදාට පෙර ගොනු කරන ලෙස වග උත්තරකරුවන්ට අධිකරණය නියෝග කළේය.
බෙල්ජියමේ බ්‍රසල්ස් නුවර පිහිටා ඇති යුරෝපා පාර්ලිමේන්තුවේදී පසුගිය ජුනි මාසයේ සම්මත කරගන්නා ලද යෝජනාවකින් ත්‍රස්තවාදය වැළැක්වීමේ පනත සුළු ජාතීන් මර්දනයට යොදා ගැනීම කෙරේ විශේෂ අවධානයක් යොමුකර තිබුණි.
එක්සත් ජාතීන්ගේ සංවිධානය ඇතුළු මානව හිමිකම් ක්ෂේත්‍රයේ ගර්හාවට ලක්වී ඇති ත්‍රස්තවාදය වැළක්වීමේ පනත සංශෝධනය නොකරන්නේ නම්, ශ්‍රී ලංකාවට යුරෝපා වෙළෙඳපොළට වාසි සහගත ලෙස ඇතුළුවීමට ඉඩ සැලසෙන GSP+ වරප්‍රසාදය අහිමි වීමේ අවදානමක් පවතී.
Facebook Comments
