යුද පීඩිත වන්නියේ දෙමළ ජනතාව සිය ආර්ථිකය සවිමත් කර ගැනීමට දරන වෙහෙසට අමතරව වන අලි සමග සටන් වදින්නටද සිදු වී තිබේ.
පළාත් බද මාධ්‍යවේදීන් පවසන්නේ නොවැම්බර් 4 වැනිදා රාත්‍රියේ කඩා වැදුන අලි රංචුවක් මුලතිව් කොක්කුතුඩුවායි උතුර ග්‍රාමයේ පොල් වගාවක පොල් ගස් 300 ට අධික ප්‍රමාණයක් විනාශ කර දමා තිබෙන බවයි.
පොල් අස්වැන්න නෙලන වයසේ පසුවන වගාවට සිදු වු හානිය සිය ඉදිරි ආර්ථිකයට දැඩි බලපෑමක් එල්ල කරනු ඇති බවයි එහි හිමිකරුවන් පවසන්නේ.
ප්‍රදේශයේ පවතින අලි තර්ජනයට මුහුණ දීම සදහා අලි වැටක් ඉදි කර දෙන ලෙස වසර ගණනාවක් තිස්සේ බලධාරීන්ගෙන් ඉල්ලා සිටියත් මේ තාක් ඊට විසදුම් ලබා දී නොමැති බවටත් ඔවුන් චෝදනා කරති.
උතුරේ යුද ගිනි ඇවිලීමත් සමග 1984 වසරේ සිය ගම් බිම් අතහැර ජීවිත ආරක්ෂාව පතා පිටව ගිය මුලතිව් කොක්කුතුඩුවායි උතුර ග්‍රාමයේ ජනතාව නැවත එහි පදිංචියට පැමිණ ඇත්තේ 2012 වසරේදීය.
ඉන් පසුව සිදු කළ පොල් වගාවක් වන අලි විසින් මෙලෙස විනාශ කර ඇති බව පළාත් බද මාධ්‍යවේදීහු වැඩි දුරටත් සදහන් කරති.
රටේ වැඩි කොටසක අලි මිනිස් ගැටුම්
ශ්‍රී ලංකාවේ පරිපාලන දිස්ත්‍රික්ක විසි පහෙන්, දහ නමයකම අලි මිනිස් ගැටුම් පවතින බව රජය පසුගියදා පිළිගෙන තිබුනි.
ශ්‍රී ලංකාවේ දිස්ත්‍රික්ක දහ නමයක් තුළ පිහිටි ප්‍රාදේශිය ලේකම් කොට්ඨාස 133 ක දැනට අලි මිනිස් ගැටුම් වාර්තා වේ.
2020 වසරේ ජනපති උපදෙස
වන අලි ගම් වදිනවා වෙනුවට කැලෑ වදින ක්‍රමවේදයක් සකස් කර අලි මිනිස් ගැටුමට දෙවසරක් තුළ ස්ථීර විසඳුමක් දෙන්නැයි ජනාධිපති ගෝඨාභය රාජපක්ෂ ගිය වසරේ ඔක්තෝබර් මාසයේදී නිලධාරීන්ට උපදෙස් ලබා දී තිබුනි.
එහිදී ජනාධිපතිවරයා අවධාරණය කර තිබුනේ මිනිසා සහ අලියා යන දෙකොටසම සුරැකෙන කඩිනම් සහ ස්ථීර විසඳුම් සෙවීම ප්‍රමුඛ කාර්යක් බවයි.
මිනිස් ක්‍රියාකාරකම් නිසා වාසභූමි අහිමිවූ අලි ගම් වැදීමෙන් වැඩිම හානිය සිදුවී ඇත්තේ අලින්ටය.
රජයේ සංඛ්‍යාලේඛන අනුව 2020 වසර තුළ අලි මරණ 327ක් සහ මිනිස් මරණ 113ක් වාර්තාවී ඇත. වනජීවී සංරක්ෂණ දෙපාර්තමේන්තුවේ දත්ත වලට අනුව ශ්‍රී ලංකාවේ අලි මිනිස් ගැටුම වඩාත්ම උත්සන්න වී ඇත්තේ 2019 දීය. එම වසරේදී 122ක් මරණයට පත්වෙද්දී මියගිය අලි ගණන 407කි.
රාජ්‍ය ගිණුම් කාරක සභාවේ වාර්තා
ශ්‍රී ලංකා පාර්ලිමේන්තුවේ රාජ්‍ය ගිණුම් කාරක සභාවේ වාර්තාවන්ට අනුව, අලි මිනිස් ගැටුම නිසා ලෝකයේ වැඩියෙන්ම අලි මරණයට පත්වන රට බවට ශ්‍රී ලංකාව පත්ව තිබේ.
වසරකට ශ්‍රී ලංකාවේ මියයන අලි ඇතුන් සංඛ්‍යාවේ සාමාන්‍ය අගය 272කි.
එමෙන්ම අලි මිනිස් ගැටුම නිසා වාර්ෂිකව අහිමිවන මිනිස් ජීවිත සංඛ්‍යාවේ සාමාන්‍ය අගය 85ක් වේ.
2020 වසර තුළ ශ්‍රී ලංකාවේ අලි මිනිස් ගැටුම් නිසා අලි 327ක් සහ මිනිසුන් 113ක් මරණයට පත්ව තිබේ.
වනජීවී සංරක්ෂණ දෙපාර්තමේන්තුවේ දත්ත වලට අනුව ශ්‍රී ලංකාවේ අලි මිනිස් ගැටුම වඩාත්ම උග්‍ර වූ වසර ලෙස 2019 වසර සටහන්ව ඇත.
අවසන් වරට ශ්‍රී ලංකාවේ අලි සංගණනයක් සිදු කර ඇත්තේ 2011 වසරේදීය.
එම දත්ත වලට අනුව ලංකාවේ අලි ගහනය 5879කි. ඉන් 55 දෙනෙකු වැඩුණු දළ ඇතුන් විය.
Facebook Comments
