කොළඹ තුරඟ තරග පිටියේ ක්‍රීඩා ප්‍රේක්ෂකාගාරයේ පහත මහලේ පිහිටි, ජාත්‍යන්තර ආහාර සැකසූම් සමාගමකට අයත් හෝටල් පරිශ්‍රයක අද අලුයම් කාලයේ පිපිරීමක් සමග ගින්නක් හටගෙන ඇති බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරිය නිහාල් තල්දූව පැවසීය.
අළුයම 05.30ට පමණ මෙම ගින්න හට ගෙන ඇති අතර ගින්න හේතුවෙන් අවන්හල පිහිටි ගොඩනැගිල්ලට දැඩි හානි සිදුවී තිබේ.
ගින්න සැලවීමත් සමගම ගිනි නිවන හමුදාව, කොළඹ මහ නගර සභා ගිනි නිවීම් ඒකකය සහ පොලීසිය වහාම ක්‍රියාත්මක වී ගින්න සම්පූර්ණයෙන්ම නිවා දමා ඇත.
පිපිරිමෙන් තරුණයන් දෙදෙනෙක් සුළු තුවාල ලබා ඇති බවත් ගෑස් කාන්දුවක් හේතුවෙන් මෙම ගින්න හටගෙන ඇති බව අනාවරණය වී ඇති බව ද පොලිස් මාධ්‍ය ප්‍රකාශකවරයා වැඩිදුරටත් කීය.
පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරි නිහාල් තල්දුව සදහන් කලේ කුලි රථයක් එනතුරු රැදි සිටි තරුණයන් දෙදෙනෙක් මෙලෙස තුවාල ලබා ඇති බවයි.
ඔවුන් දෙදෙනා රෝහල වෙත ගොස් ප්‍රතිකාර ලබා ගැනීමෙන් අනතුරුව පිටව ගොස් තිබේ.
පිපිරීමට හේතුව නිශ්චිතය තහවුරු කර ගැනීම සඳහා රජයේ රස පරීක්ෂකවරයා එම ස්ථානය නිරීක්ෂණය කිරීමට නියමිත අතර සිද්ධිය සම්බන්ධයෙන් මේ වනවිට පොලිස් පරීක්ෂණයක් ද ආරම්භ කර තිබේ.
Facebook Comments
