කොරෝනා අවදානම මැද ඇස් අන්ධ වීමක් ගැන ලංකාවට අනතුරු ඇඟවීමක්

ලොව ජනගහනයෙන් ලක්ෂ හතලිස් පහක් ජනතාව ග්ලෝකෝමාව හේතුවෙන් සදාකාලික අන්ධ භාවයට පත්ව ඇති අතර 2020 වන විට එම ප්‍රමාණය මිලියන 11.2 ක් දක්වා වර්ධනය වන බවට මේ වන විට ඇස්තමේන්තු කර ඇතැයි කොළඹ ජාතික අක්ෂි රෝහල සදහන් කරයි.

මුල් අවධියේ දී හඳුනාගැනීම මඟින් ග්ලෝකෝමාව නිසා සිදු වන අන්ධ භාවය වළක්වා ගැනීම සඳහා රෝගී වීමට පෙර ඒ පිළිබඳව දැනුවත්වීම වටිනා බවයි ජාතික අක්‍ෂි රෝහලේ අධ්‍යක්‍ෂ විශේෂඥ වෛද්‍ය ලක්ෂ්මී කුමාරතිලක පවසන්නේ.

ඇය ඒ බව පවසා ඇත්තේ 2020 මාර්තු 10 දින ජාතික අක්‍ෂි රෝහල් ශ්‍රවණාගාරයේ දී පැවති ග්ලෝකෝමා සතිය පිළිබඳව මාධ්‍ය දැනුවත් කිරීමේ සම්මන්ත්‍රණයකට එක්වෙමිනි.

ලෝක ග්ලෝකෝමා සතිය මාර්තු 08 සිට 14 දින දක්වා ප්‍රකාශයට පත් කර තිබෙන බව රජයේ ප්‍රවෘත්ති දෙපාර්තමේන්තුව සදහන් කරයි.

ලෝක ග්ලෝකෝමා සංගමය මඟින් සෑම වර්ෂයකම මාර්තු මස ග්ලෝකෝමා සතිය ප්‍රකාශයට පත් කරනු ලබයි.

එහි අරමුණ වන්නේ ග්ලෝකෝමාව පිළිබඳව ජනතාව දැනුවත් කිරීම මඟින් අක්‍ෂි පරික්ෂාව සඳහා යොමුකර ග්ලෝකෝමාව නිසා ඇතිවන අන්ධභාවය වළක්වාලීමයි.

ඒ අනුව, “අදෘශ්‍යමාන ග්ලෝකෝමාව පරදවමු” යන්න මෙවර තේමාව වී තිබේ.

අක්‍ෂි පරික්ෂාවට යොමු වී දෑසේ පෙනුම ආරක්ෂා කර ගන්නා ලෙස බලකිරීම එහි අරමුණයි.

ශ්‍රී ලංකා අක්‍ෂි වෛද්‍යවරුන්ගේ සංගමයේ ග්ලෝකෝමා අන්ධ භාවය තුරන් කිරීම වෙනුවෙන් මෙහෙවර කරන විශේෂඥ වෛද්‍යවරුන් විසින් ලෝක ග්ලෝකෝමා සතියට සමගාමිව ශ්‍රී ලංකාවේ ද ජනතාව දැනුවත් කිරීමේ හා ග්ලෝකෝමාව සඳහා රෝගීන් පරික්ෂා කිරීමේ සායන සංවිධානය කර ඇති බව රජයේ ප්‍රවෘත්ති දෙපාර්තමේන්තුව පෙන්වා දෙයි.

ඒ අනුව, සෞඛ්‍ය අමාත්‍යංශයේ විෂන් 2020 වැඩසටහන, සෞඛ්‍ය අමාත්‍යංශය සහ ශ්‍රී ලංකා අක්‍ෂි වෛද්‍යවරුන්ගේ සංගමය එක්ව විශේෂ අක්‍ෂි සායනයක් ගුවන් හමුදා මුලස්ථානයේ දී පැවැත්වීමටත්, ග්ලෝකෝමා සතිය සැමරීම සඳහා මාර්තු 12 වන දා පාගමනක් නෙලුම්කුළුන පරිශ්‍රයේ සිට ජාතික අක්‍ෂි රෝහල දක්වා ඇරඹීමටත් කටයුතු සංවිධානය කර ඇති බව වෛද්‍ය ලක්ෂ්මී කුමාරතිලක වැඩි දුරටත් පවසා තිබේ.

ග්ලෝකෝමා යනු ඇසේ සිට මොළයට අප දකින දේ සන්නිවේදනය කරන දෘෂ්ඨි ස්නායුවට ඇස තුළ දී ක්‍රම ක්‍රමයෙන් සිදු වන හානියයි.

ඇසෙහි මනා ක්‍රියාකාරිත්වය සඳහා ඇසෙහි පීඩනය ප්‍රශස්ත මට්ටමක පවත්වා ගැනීම වැදගත් බව අක්ෂි විශේෂඥ වෛද්‍යවරු පවසති.

ග්ලෝකෝමාව ඕනෑම කෙනකුට ඇති විය හැකි වුව ද වඩාත් අවදානම් කණ්ඩායම වශයෙන් අවුරුදු 40 ත් 50 ත් අතර වයසේ සිටින පුද්ගලයින්ට හදුනාගෙන තිබේ.

එමෙන්ම, පවුලේ අයෙකුට ග්ලෝකෝමාව ඇත්නම් සෙසු අයට ද එම අවදානම ඇති හෙයින් ඒ සඳහා අක්‍ෂි පරීක්ෂාවක් සිදු කළ යුතු බවත්, දීර්ඝ කාලීනව ස්ටෙරොයිඩ් ඖෂධ භාවිතා කරන අය, දියවැඩියාව ඇති අය මෙන්ම කුඩා කල සිට උපැස් යුවල භාවිතා කරන සහ දුර නොපෙනෙන පුද්ගලයන් සහ ඇසට අනතුරු වී ඇති අයට ද මෙම රෝගී තත්ත්වය ඇති විය හැකි බව වෛද්‍ය ලක්ෂ්මී කුමාරතිලක එහි දී අවධාරණය කර ඇත.